சென்னை பெரம்பூர் தொகுதியில் முதலமைச்சர் விஜய் பெற்ற தேர்தல் வெற்றியை எதிர்த்து தொடரப்பட்ட தேர்தல் வழக்கில், விஜய் தரப்பில் தாக்கல் செய்யப்பட்ட மனு மீதான தீர்ப்பை சென்னை உயர் நீதிமன்றம் அக்டோபர் 14ஆம் தேதி வழங்க உள்ளதாக தகவல் வெளியாகியுள்ளது.
விஜய்யின் தேர்தல் வெற்றிக்கு எதிராக வழக்கு
நடைபெற்ற சட்டப்பேரவைத் தேர்தலில் பெரம்பூர் தொகுதியில் விஜய் வெற்றி பெற்றார். அவரது தேர்தல் வெற்றியை எதிர்த்து திமுக வேட்பாளர் ஆர்.டி.சேகர் மற்றும் வாக்காளர்கள் தினேஷ், லட்சுமி நரசிம்மன் ஆகியோர் சென்னை உயர் நீதிமன்றத்தில் தேர்தல் வழக்குகளைத் தொடர்ந்தனர்.
வேட்புமனுவில் சொத்து விவரங்கள் உள்ளிட்ட சில தகவல்கள் தொடர்பாக முறைகேடுகள் இருப்பதாக மனுதாரர்கள் தரப்பில் குற்றச்சாட்டுகள் முன்வைக்கப்பட்டுள்ளன. குறிப்பாக, பண்ருட்டியில் உள்ளதாகக் கூறப்படும் ரூ.30 கோடி மதிப்பிலான சொத்து வேட்புமனுவில் குறிப்பிடப்படவில்லை என ஒரு மனுவில் தெரிவிக்கப்பட்டுள்ளது.
விஜய் தரப்பில் விளக்கம்
தனது வேட்புமனுவில் தனக்கும் தனது மனைவிக்கும் சொந்தமான சொத்துகள் மற்றும் வருமான வரி தொடர்பான விவரங்கள் குறிப்பிடப்பட்டுள்ளதாக விஜய் தரப்பில் நீதிமன்றத்தில் வாதிடப்பட்டது.
மேலும், சில தவறுகள் இருந்திருக்கலாம் என்றாலும், அதற்காக வேட்புமனுவை ஏற்றதே தவறு எனக் கூற முடியாது என்றும், தன்னுடைய தேர்தல் வெற்றியை எதிர்த்து தொடரப்பட்ட வழக்குகளை நிராகரிக்க வேண்டும் என்றும் விஜய் தரப்பில் கோரப்பட்டது.
அக்டோபர் 14ல் தீர்ப்பு
இந்த வழக்கில் இருதரப்பு வாதங்களும் நீதிமன்றத்தில் முன்வைக்கப்பட்டுள்ள நிலையில், விஜய் தரப்பில் தாக்கல் செய்யப்பட்ட மனு மீதான தீர்ப்பு அக்டோபர் 14ஆம் தேதி வெளியாக உள்ளது.
இந்த தீர்ப்பில் தேர்தல் வழக்குகள் தொடர்ந்து விசாரிக்கப்படுமா அல்லது விஜய் தரப்பின் மனு ஏற்கப்பட்டு வழக்குகள் நிராகரிக்கப்படுமா என்பது தெரியவரும்.
மானூர் அரசு பள்ளி குடிநீர் தொட்டியில் மலம் கலந்ததாக புகார் – விசாரணையில் புதிய தகவல்!