இந்தியாவில் வாக்காளர் பட்டியல் சிறப்பு தீவிர திருத்தப் பணியின்போது (SIR) சுமார் 13 கோடி வாக்காளர்களின் பெயர்கள் தொடர்பாக எழுந்துள்ள சர்ச்சை குறித்து, அமெரிக்க இந்திய வம்சாவளி பெண் எம்.பி. பிரமிளா ஜெயபால் கவலை தெரிவித்துள்ளார்.
அமெரிக்காவின் வாஷிங்டன் மாகாணத்தைச் சேர்ந்த ஜனநாயகக் கட்சி பிரதிநிதியான பிரமிளா ஜெயபால், தனது எக்ஸ் சமூக வலைதளப் பதிவில் இந்தியாவின் வாக்காளர் பட்டியல் திருத்த நடவடிக்கை குறித்து கருத்து தெரிவித்துள்ளார்.
ஜனநாயக உரிமைகள் குறித்த கவலை
இந்தியாவில் 13 கோடி மக்களின் பெயர்கள் வாக்காளர் பட்டியலிலிருந்து நீக்கப்பட்டுள்ளதாகக் கூறப்படும் தகவல் தனக்கு மிகுந்த கவலையை ஏற்படுத்துவதாக அவர் தெரிவித்துள்ளார். மேலும், அமெரிக்காவில் டிரம்ப் நிர்வாகம் வாக்குரிமையைப் பாதிக்கும் வகையில் செயல்படுவதாக விமர்சகர்கள் கூறும் உத்தியைப் போன்றே இந்தியாவிலும் நடைபெறுவதாகத் தோன்றுகிறது என அவர் குறிப்பிட்டுள்ளார்.
அனைத்து நாடுகளிலும் ஜனநாயகத்தைப் பாதுகாப்பது அவசியம் என்றும், அமெரிக்க மக்களைப் போலவே இந்திய மக்களும் சுதந்திரமான மற்றும் நேர்மையான தேர்தல்களைப் பெறுவதற்கு உரிமை உடையவர்கள் என்றும் அவர் தெரிவித்துள்ளார்.
அகிம்சை வழிப் போராட்டங்களுக்கு ஆதரவு
இந்தியாவில் ஜனநாயகத்திற்கு எதிரான நடவடிக்கைகளை எதிர்கொள்ளும் வகையில் அகிம்சை வழியில் போராடி வரும் மக்களுக்கு ஆதரவு தெரிவிப்பதாகவும் பிரமிளா ஜெயபால் கூறியுள்ளார். வாக்குரிமை மற்றும் ஜனநாயகத்தைப் பாதுகாப்பதில் அமைதியான எதிர்ப்பு இயக்கங்கள் முக்கியப் பங்கு வகிப்பதாகவும் அவர் வலியுறுத்தியுள்ளார்.
13 கோடி வாக்காளர்கள் விவகாரம்: தேர்தல் ஆணையம் விளக்கம்
இதற்கிடையே, 13 கோடி வாக்காளர்களின் பெயர்கள் இறுதி வாக்காளர் பட்டியலிலிருந்து நீக்கப்பட்டுவிட்டதாகக் கூறப்படுவது தவறாக வழிநடத்தக்கூடியது என இந்தியத் தேர்தல் ஆணையம் விளக்கம் அளித்துள்ளது.
தேர்தல் ஆணையத்தின் தகவலின்படி, இந்த எண்ணிக்கையில் இறந்தவர்கள், நிரந்தரமாக இடம்பெயர்ந்தவர்கள், முகவரியில் கண்டறிய முடியாதவர்கள் மற்றும் ஒன்றுக்கு மேற்பட்ட இடங்களில் பதிவு செய்யப்பட்டவர்கள் உள்ளிட்ட பிரிவுகளின் கீழ் வகைப்படுத்தப்பட்ட பெயர்களும் அடங்கும். தகுதியுள்ள வாக்காளர்கள் தங்களது பெயர்களைச் சேர்க்கவும், விடுபட்ட பெயர்கள் குறித்து ஆட்சேபனைகள் தெரிவிக்கவும் வாய்ப்பு வழங்கப்பட்டுள்ளதாகவும் ஆணையம் தெரிவித்துள்ளது.
வாக்காளர் பட்டியல் திருத்த நடவடிக்கை தொடர்பாக எதிர்க்கட்சிகள் மற்றும் பல்வேறு தரப்பினர் கேள்வி எழுப்பி வரும் நிலையில், பிரமிளா ஜெயபாலின் கருத்து இந்த விவகாரத்தை சர்வதேச அளவிலும் கவனத்திற்கு கொண்டு வந்துள்ளது.
லாபம் அதிகரித்தும் நெட்ஃபிக்ஸ் எடுத்த அதிரடி முடிவு – 6% ஊழியர்கள் பணிநீக்கம்!