டெல்லியில் இன்று (நவம்பர் 1) இந்தியா கூட்டணி சார்பில் நடைபெற உள்ள பிரமாண்ட போராட்டத்தை முன்னிட்டு, தலைநகர் முழுவதும் பலத்த பாதுகாப்பு ஏற்பாடுகள் செய்யப்பட்டுள்ளன. சுமார் 10,000 போலீசார் மற்றும் துணை ராணுவப் படையினர் பாதுகாப்புப் பணியில் ஈடுபடுத்தப்பட்டுள்ளனர்.
தலைமை தேர்தல் ஆணையர் ஞானேஷ் குமார் பதவி விலகக் கோரி, காங்கிரஸ் தலைமையிலான இந்தியா கூட்டணி சார்பில் ‘சலோ டெல்லி’ பேரணி மற்றும் பொதுக்கூட்டம் நடைபெறுகிறது.
ராம்லீலா மைதானத்தில் பிரமாண்ட பொதுக்கூட்டம்!
டெல்லி ராம்லீலா மைதானத்தில் நடைபெற உள்ள இந்தப் போராட்டத்தில் இந்தியா கூட்டணியின் முக்கிய தலைவர்கள், நாடாளுமன்ற உறுப்பினர்கள் மற்றும் பல்வேறு கட்சிகளைச் சேர்ந்த தொண்டர்கள் பங்கேற்க உள்ளனர்.
மத்திய டெல்லியில் உள்ள மின்டோ ரோடு – கனாட் பிளேஸ் சந்திப்பிலிருந்து நண்பகல் 12 மணிக்கு பேரணி தொடங்கி, ராம்லீலா மைதானத்தை சென்றடைய உள்ளது. பொதுக்கூட்டம் காலை 10 மணி முதல் மாலை 5 மணி வரை நடைபெற அனுமதி வழங்கப்பட்டுள்ளது.
10,000 போலீசார் பாதுகாப்புப் பணியில்!
போராட்டத்தை முன்னிட்டு டெல்லி போலீசார் மற்றும் துணை ராணுவப் படையினர் என மொத்தம் சுமார் 10,000 பாதுகாப்புப் படையினர் குவிக்கப்பட்டுள்ளனர்.
இதில் சுமார் 3,000 டெல்லி போலீசாரும், 7,000 துணை ராணுவப் படையினரும் பாதுகாப்புப் பணியில் ஈடுபடுத்தப்பட உள்ளனர். மேலும், கூடுதல் பாதுகாப்புப் படையினரும் தயார் நிலையில் வைக்கப்பட்டுள்ளனர்.
ராம்லீலா மைதானம் மற்றும் பேரணி செல்லும் வழித்தடங்களில் பல அடுக்கு தடுப்புகள் அமைக்கப்பட்டுள்ளன. சுமார் 250 அதிநவீன சிசிடிவி கேமராக்கள், ட்ரோன்கள் மற்றும் செயற்கை நுண்ணறிவு தொழில்நுட்பத்துடன் கூடிய கண்காணிப்பு கேமராக்கள் மூலம் கண்காணிப்பு மேற்கொள்ளப்பட உள்ளது.
மத்திய டெல்லியில் போக்குவரத்து மாற்றம்!
போராட்டம் காரணமாக மத்திய டெல்லியின் முக்கிய சாலைகளில் போக்குவரத்து மாற்றங்கள் அறிவிக்கப்பட்டுள்ளன.
ஐடிஓ, டெல்லி கேட், ராஜ்காட், அஜ்மேரி கேட் உள்ளிட்ட முக்கிய சந்திப்புகளில் போக்குவரத்து கட்டுப்பாடுகள் அமல்படுத்தப்பட உள்ளன.
பஹதூர் ஷா ஜாபர் மார்க், ஜவஹர்லால் நேரு மார்க், மின்டோ ரோடு உள்ளிட்ட சாலைகளில் கடுமையான போக்குவரத்து நெரிசல் ஏற்பட வாய்ப்புள்ளது.
இதனால் பொதுமக்கள் மெட்ரோ ரயில் சேவையைப் பயன்படுத்தவும், பாதிக்கப்பட்ட சாலைகளைத் தவிர்த்து மாற்றுப் பாதைகளில் பயணிக்கவும் அறிவுறுத்தப்பட்டுள்ளனர்.
தேர்தல் ஆணையத்திற்கு எதிராக இந்தியா கூட்டணி போராட்டம்!
வாக்காளர் பட்டியல் சிறப்பு தீவிர திருத்தப் பணிகளில் (SIR) முறைகேடுகள் நடைபெற்றுள்ளதாக இந்தியா கூட்டணி குற்றம்சாட்டி வருகிறது.
வாக்காளர் பட்டியலில் இருந்து அதிக அளவில் பெயர்கள் நீக்கப்பட்டதாகக் கூறி, தலைமை தேர்தல் ஆணையர் ஞானேஷ் குமார் பதவி விலக வேண்டும் என எதிர்க்கட்சிகள் வலியுறுத்தி வருகின்றன.
இந்தக் கோரிக்கையை முன்வைத்து நடைபெறும் இன்றைய போராட்டத்தில் ராகுல் காந்தி, மல்லிகார்ஜுன கார்கே உள்ளிட்ட முக்கிய எதிர்க்கட்சித் தலைவர்கள் பங்கேற்க உள்ளனர்.
டெல்லியில் நடைபெறும் இந்தப் போராட்டத்தை முன்னிட்டு பாதுகாப்பு ஏற்பாடுகள் தீவிரப்படுத்தப்பட்டுள்ளதால், தலைநகரில் அரசியல் பரபரப்பு அதிகரித்துள்ளது.