டெல்லியில் ‘இந்தியா’ கூட்டணி சார்பில் நடைபெற்று வரும் ‘வாக்கைக் காப்போம், நாட்டைக் காப்போம்’ (Vote Bachao, Desh Bachao) பேரணியில் பங்கேற்பதற்காக, மக்களவை எதிர்க்கட்சித் தலைவர் ராகுல் காந்தி, சமாஜ்வாதி கட்சித் தலைவர் அகிலேஷ் யாதவ் உள்ளிட்ட முக்கிய எதிர்க்கட்சித் தலைவர்கள் ராம்லீலா மைதானத்தை நோக்கிப் பேரணியாகச் சென்றனர்.
முக்கியத் தலைவர்கள் பங்கேற்பு
காங்கிரஸ் தலைவர் மல்லிகார்ஜுன கார்கே, ராகுல் காந்தி, அகிலேஷ் யாதவ், திரிணாமூல் காங்கிரஸ் எம்பி அபிஷேக் பானர்ஜி, காங்கிரஸ் பொதுச்செயலாளர் கே.சி. வேணுகோபால் உள்ளிட்ட பல்வேறு கட்சிகளின் தலைவர்கள் இந்தப் பேரணியில் பங்கேற்றனர்.
கூட்டணியில் இடம்பெற்றுள்ள 21 கட்சிகளின் பிரதிநிதிகள் பங்கேற்கும் வகையில் இந்த நிகழ்ச்சி ஏற்பாடு செய்யப்பட்டுள்ளது. மின்டோ சாலை – கனாட் பிளேஸ் சந்திப்பிலிருந்து அஜ்மேரி கேட் வழியாக ராம்லீலா மைதானம் வரை பேரணி நடைபெறுகிறது.
SIR நடவடிக்கைக்கு எதிராகப் போராட்டம்
தேர்தல் ஆணையம் மேற்கொண்டு வரும் வாக்காளர் பட்டியல் சிறப்புத் தீவிரத் திருத்தம் (SIR) நடவடிக்கையில் முறைகேடுகள் நடைபெறுவதாக இந்தியா கூட்டணி கட்சிகள் குற்றம்சாட்டி வருகின்றன. தகுதியான வாக்காளர்களின் பெயர்கள் பட்டியலில் இருந்து நீக்கப்படுவதாகவும், தேர்தல் நடைமுறைகளின் நம்பகத்தன்மையை உறுதிப்படுத்த வேண்டும் என்றும் எதிர்க்கட்சிகள் வலியுறுத்துகின்றன.
மேலும், தலைமைத் தேர்தல் ஆணையர் ஞானேஷ் குமார் பதவி விலக வேண்டும் என்பதும் இந்தப் போராட்டத்தின் முக்கியக் கோரிக்கையாக உள்ளது.
டெல்லியில் பலத்த பாதுகாப்பு
முக்கியத் தலைவர்கள் மற்றும் தொண்டர்கள் பெருமளவில் பங்கேற்பதால், பேரணி நடைபெறும் வழித்தடங்கள் மற்றும் ராம்லீலா மைதானத்தைச் சுற்றியுள்ள பகுதிகளில் பலத்த போலீஸ் பாதுகாப்பு ஏற்பாடுகள் செய்யப்பட்டுள்ளன. போக்குவரத்து நெரிசலைக் கட்டுப்படுத்தும் வகையில் பல்வேறு சாலைகளில் மாற்றங்களும் மேற்கொள்ளப்பட்டுள்ளன.
வாக்காளர் பட்டியல் திருத்தம் மற்றும் தேர்தல் ஆணையத்தின் செயல்பாடுகள் தொடர்பான விவகாரத்தை முன்வைத்து நடைபெறும் இந்தப் பேரணி, டெல்லியின் அரசியல் களத்தில் கவனத்தை ஈர்த்துள்ளது.
“இது ஜனநாயகத்தின் கொடூரமான படுகொலை!” – டெல்லி பேரணியில் அம்ரா ராம் ஆவேசப் பேச்சு!