இந்தியாவில் வாக்காளர் பட்டியல் சிறப்பு தீவிர திருத்தப் பணிகள் (Special Intensive Revision – SIR) என்ற பெயரில் மேற்கொள்ளப்படும் நடவடிக்கைகள், நாட்டின் ஜனநாயக அடித்தளத்தையே கேள்விக்குள்ளாக்குவதாக இடதுசாரி செயற்பாட்டாளர் தோழர் மருதையன் குற்றம் சாட்டியுள்ளார்.
‘நியூஸ் போக்கஸ் தமிழ்’ ஊடகத்திற்கு அளித்த சிறப்புப் பேட்டியில், வாக்காளர் பட்டியலில் இருந்து தினக்கூலித் தொழிலாளர்கள், புலம்பெயர்ந்த தொழிலாளர்கள் உள்ளிட்ட ஏராளமானோர் நீக்கப்பட்டுள்ளதாக அவர் தெரிவித்துள்ளார். இந்த நடவடிக்கைகளால் ஏழை எளிய மக்களின் வாக்குரிமை பாதிக்கப்படுவதாகவும் அவர் சுட்டிக்காட்டியுள்ளார்.
13.3 கோடி வாக்காளர்கள் நீக்கம் – பின்னணி என்ன?
வாக்காளர் பட்டியலைத் தூய்மைப்படுத்துவது மற்றும் சட்டவிரோதக் குடியேறிகளைக் கண்டறிவது என்ற நோக்கத்தில் SIR பணிகள் தீவிரப்படுத்தப்பட்டதாகக் கூறப்படுகிறது. ஆனால், நடைமுறையில் இதனால் பல்வேறு மாநிலங்களைச் சேர்ந்த சுமார் 13.3 கோடி வாக்காளர்கள் பட்டியலில் இருந்து நீக்கப்பட்டுள்ளதாக மருதையன் குற்றம் சாட்டியுள்ளார்.
இதுதொடர்பாக ஆங்கில நாளிதழ் ஒன்று நடத்திய ஆய்வில், பல மாநில தேர்தல் அதிகாரிகளிடம் சட்டவிரோதக் குடியேறிகள் குறித்த முறையான கணக்குகளோ, உரிய தரவுகளோ இல்லை என்பது தெரியவந்துள்ளதாக அவர் குறிப்பிட்டுள்ளார்.
மேலும், மாநிலங்களில் வெளிநாட்டினராகக் கண்டறியப்பட்டவர்களில் பெரும்பாலானோர் நேபாளம் உள்ளிட்ட அண்டை நாடுகளில் இருந்து பிழைப்புக்காக வந்த எளிய தொழிலாளர்கள் என அந்த ஆய்வு சுட்டிக்காட்டியுள்ளதாகவும் அவர் தெரிவித்துள்ளார்.
பாதிக்கப்படும் தினக்கூலிகள், புலம்பெயர்ந்த தொழிலாளர்கள்
முறையான ஆவணங்கள் இல்லாமை மற்றும் போதிய விழிப்புணர்வு இல்லாத காரணங்களால், மாநிலங்களுக்கு இடையே வேலை தேடிச் செல்லும் புலம்பெயர்ந்த தொழிலாளர்கள், ஏழை எளிய தினக்கூலிகள் மற்றும் சிறுபான்மை மக்கள் தங்களது வாக்குரிமையை இழக்கும் அபாயம் ஏற்பட்டுள்ளதாக மருதையன் தெரிவித்துள்ளார்.
வாக்காளர் பட்டியலில் தங்களது பெயர் நீக்கப்பட்டுவிடுமோ என்ற அச்சம், எதிர்காலம் குறித்த கவலை ஆகியவற்றால் எளிய மக்கள் மன உளைச்சலுக்கு ஆளாகியுள்ளதாகவும் அவர் கூறியுள்ளார். தேர்தல் காலங்களில் அவசரமாக மேற்கொள்ளப்படும் இத்தகைய திருத்தப் பணிகள், கோடிக்கணக்கான மக்களின் அடிப்படை உரிமைகளைப் பாதிக்கக்கூடும் என்றும் எச்சரித்துள்ளார்.
தேர்தல் ஆணையத்தின் நடைமுறைகள் மீது புகார்
SIR நடைமுறைகள் மற்றும் வாக்காளர் பெயர் நீக்கப் பணிகள் முறையாகவும் ஒருமித்த கருத்துடனும் மேற்கொள்ளப்படவில்லை என மருதையன் விமர்சித்துள்ளார். தேர்தல் ஆணையத்தின் உயர்மட்டக் கூட்டங்களில் உரிய ஆவணப் பதிவுகள் இல்லை என்றும் அவர் குற்றம் சாட்டியுள்ளார்.
மாநில தேர்தல் அதிகாரிகளின் கட்டுப்பாட்டில் இருந்த நடைமுறைகள் மாற்றப்பட்டு, டெல்லியில் உள்ள தகவல் தொழில்நுட்பக் குழுவின் கட்டுப்பாட்டிலுள்ள ‘ECI Net’ இணையதளம் மூலம் தன்னிச்சையாக பெயர் நீக்கங்கள் மேற்கொள்ளப்பட்டதாகப் புகார்கள் எழுந்துள்ளதாக அவர் தெரிவித்துள்ளார்.
கோவா மற்றும் மேற்கு வங்கம் உள்ளிட்ட மாநில அதிகாரிகளே தங்களது கணினிகள் மூலம் இந்த இணையதள அமைப்பை அணுக முடியாத நிலை இருந்ததாகவும் அவர் சுட்டிக்காட்டியுள்ளார்.
ஜனநாயக உரிமைகள் பறிக்கப்படுவதாக மருதையன் குற்றச்சாட்டு
சிறுபான்மை மக்கள், தலித்துகள், பழங்குடியினர் மற்றும் குறிப்பிட்ட அரசியல் கட்சிகளுக்கு வாக்களிக்காத ஏழை எளிய மக்களை இலக்காகக் கொண்டு SIR திருத்தப் பணிகள் மேற்கொள்ளப்படுவதாக மருதையன் கடுமையாகக் குற்றம் சாட்டியுள்ளார்.
140 கோடி மக்கள் வாழும் நாட்டில், நடைமுறைச் சிக்கல்களைப் பயன்படுத்தி கோடிக்கணக்கான மக்களின் வாக்குரிமையைப் பறிப்பது வெறும் நிர்வாகத் தவறு அல்ல; திட்டமிடப்பட்ட ஜனநாயகப் படுகொலை என்று அவர் விமர்சித்துள்ளார்.
மக்களின் அடிப்படை உரிமைகளைப் பாதிக்கும் இத்தகைய நடவடிக்கைகள் குறித்து பொதுமக்கள் விழிப்புணர்வுடன் இருக்க வேண்டும் என்றும், தேர்தல் நடைமுறைகளில் வெளிப்படைத்தன்மை மற்றும் பொறுப்புணர்வை உறுதி செய்யக் கேள்வி எழுப்ப வேண்டும் என்றும் அவர் வலியுறுத்தியுள்ளார்.
மின்சாரக் கொள்முதல் சர்ச்சை: நிர்வாகத் திறமையின்மையே காரணம் – பத்திரிகையாளர் அய்யநாதன் பகுப்பாய்வு!