
தமிழ்நாட்டில் உள்ள அரசு கலை மற்றும் அறிவியல் கல்லூரிகளில் சுமார் 20 சதவீத கல்லூரிகளில் ஒரு நிரந்தர ஆசிரியர் கூட இல்லை என்ற அதிர்ச்சித் தகவல் வெளியாகியுள்ள நிலையில், காலியாக உள்ள 7,198 உதவிப் பேராசிரியர் பணியிடங்களை உடனடியாக நிரப்ப வேண்டும் எனப் பாட்டாளி மக்கள் கட்சித் தலைவர் மருத்துவர் அன்புமணி இராமதாஸ் வலியுறுத்தியுள்ளார்.
RTI தரவுகள் அம்பலப்படுத்திய அதிர்ச்சி உண்மைகள்:
விகடன் குழுமம் தகவல் அறியும் உரிமைச் சட்டத்தின் (RTI) கீழ் திரட்டிய தரவுகளைச் சுட்டிக்காட்டி அன்புமணி இராமதாஸ் வெளியிட்டுள்ள அறிக்கையில்:
61% பணியிடங்கள் காலி: தமிழகத்தில் உள்ள 181 அரசு கலைக் கல்லூரிகளில் (புதிய கல்லூரிகள் தவிர) மொத்தமுள்ள 11,909 ஆசிரியர் பணியிடங்களில், 7,198 பணியிடங்கள் (61%) காலியாக உள்ளன. புதிய கல்லூரிகள் மற்றும் பாடப்பிரிவுகளுக்குத் தேவைப்படும் 2,000 பணியிடங்களையும் சேர்த்தால், மொத்த காலியிடங்களின் எண்ணிக்கை 9,198 (66%) ஆக உயர்கிறது.
நிரந்தர ஆசிரியர்கள் இல்லாத கல்லூரிகள்: முழுமையான தரவுகள் கிடைத்த 31 கல்லூரிகளில், வேடச்சந்தூர், அருப்புக்கோட்டை, தரகம்பட்டி, திருமயம், மணப்பாறை, கொளக்காநத்தம் ஆகிய 6 கல்லூரிகளில் ஒரு நிரந்தர உதவிப் பேராசிரியர் கூட இல்லை.
ஒற்றை ஆசிரியர் கல்லூரிகள்: இராமேஸ்வரம், பரமக்குடி, குத்தாலம், சேந்தமங்கலம், ரெட்டியார்சத்திரம், முத்துப்பேட்டை ஆகிய 6 கல்லூரிகளில் தலா ஒரு நிரந்தர ஆசிரியர் மட்டுமே பணியாற்றுகிறார். திருவாடானை உள்ளிட்ட 5 கல்லூரிகளில் தலா 2 நிரந்தர ஆசிரியர்கள் மட்டுமே உள்ளனர்.
முன்னணி கல்லூரிகளின் நிலை: கும்பகோணம் அரசு கல்லூரியில் 190 இடங்களில் 105 இடங்களும், நாமக்கல் மற்றும் திண்டுக்கல் கல்லூரிகளில் 100-க்கும் மேற்பட்ட இடங்களும் காலியாக உள்ளன.

மாணவர் சேர்க்கை சரிவு & 12 ஆண்டுகால முடக்கம்:
ஆசிரியர்கள் பற்றாக்குறையால் அரசுக் கல்லூரிகளின் கல்வித்தரம் சீரழிந்துள்ளதால் மாணவர் சேர்க்கையும் கடுமையாகப் பாதிக்கப்பட்டுள்ளது:
நடப்பாண்டில் இளநிலை படிப்புகளில் (UG) 1,30,348 இடங்களில் 97,287 இடங்கள் மட்டுமே நிரம்பியுள்ளன (25% காலி). முதுநிலை படிப்புகளில் (PG) 24,859 இடங்களில் 14,252 இடங்கள் மட்டுமே நிரம்பியுள்ளன (43% காலி).
கடைசியாக 2014-ஆம் ஆண்டு 957 விரிவுரையாளர்கள் நியமிக்கப்பட்ட நிலையில், கடந்த 12 ஆண்டுகளில் அதிமுக மற்றும் திமுக அரசுகள் ஒரு நிரந்தர ஆசிரியரைக் கூட நியமிக்கவில்லை. கடந்த திமுக ஆட்சியில் தொடங்கப்பட்ட 2,708 உதவிப் பேராசிரியர் நியமன நடவடிக்கையும், தேர்வு முறைகேடு வழக்குகளால் வெறும் 5 பேருக்கு மட்டும் ஆணை வழங்கப்பட்டதோடு முடங்கிக் கிடக்கிறது.
தவெக அரசுக்கு அன்புமணி இராமதாஸ் கோரிக்கை:
தவெக ஆட்சிக்கு வந்தவுடன் அனைத்துப் பணியிடங்களும் நிரப்பப்படும் என அறிவிக்கப்பட்ட நிலையில், தற்போது உயர்கல்வித்துறை அமைச்சர் விஸ்வநாதன் 3 கட்டங்களாக 6,000 உதவிப் பேராசிரியர்கள் நியமிக்கப்படுவார்கள் எனத் தெரிவித்துள்ளார்.
ஆனால், ஏற்கனவே நடத்தப்பட்ட 2,708 பணியிடங்களுக்கான போட்டித் தேர்வு வழக்கிற்குத் தீர்வு காணாமல் புதிய ஆள்தேர்வு அறிவிக்கை வெளியிட முடியாது. எனவே, தமிழக அரசு உயர்நீதிமன்றத்தில் உள்ள வழக்கை இழுத்தடிக்காமல், கட்டுரை வடிவிலான விடைத்தாள்களை மட்டும் முறையாக மறுமதிப்பீடு செய்து 2,708 பணியிடங்களுக்கான சிக்கலை உடனடியாகத் தீர்க்க வேண்டும். அதோடு, மீதமுள்ள அனைத்துக் காலியிடங்களையும் நிரப்ப ஆசிரியர் தேர்வு வாரியம் (TRB) மூலம் உடனடியாக அறிவிக்கை வெளியிட வேண்டும் என அவர் வலியுறுத்தியுள்ளார்.
