வங்கக்கடலில் உருவாகி வரும் ‘அக்வான்’ புயல் காரணமாக சென்னை, திருவள்ளூர், செங்கல்பட்டு உள்ளிட்ட மாவட்டங்களுக்கு மிக கனமழை எச்சரிக்கை விடுக்கப்பட்டுள்ளது. இந்தப் புயல் ஆந்திரப் பிரதேச கடற்கரையை மிகத் தீவிரப் புயலாகக் கடக்க வாய்ப்புள்ளதாக வானிலை ஆய்வு மையம் தெரிவித்துள்ளது.

புயலாக வலுப்பெறும் அக்வான்
தென்கிழக்கு மற்றும் அதனை ஒட்டிய தென்மேற்கு வங்கக்கடலில் நிலவிய காற்றழுத்தத் தாழ்வு மண்டலம், நவம்பர் 15-ம் தேதி இரவு ஆழ்ந்த காற்றழுத்தத் தாழ்வு மண்டலமாக வலுப்பெற்றது. இது தொடர்ந்து வடக்கு-வடமேற்கு திசையில் நகர்ந்து, நவம்பர் 16-ம் தேதி மாலை புயலாக வலுப்பெறக்கூடும் என கணிக்கப்பட்டுள்ளது.
தொடர்ந்து நவம்பர் 17-ம் தேதி மாலை தீவிரப் புயலாக வலுப்பெற்று, நவம்பர் 20-ம் தேதி நண்பகல் நெல்லூர் – துனி இடையே ஆந்திரப் பிரதேச கடற்கரையைக் கடக்க வாய்ப்புள்ளதாக வானிலை ஆய்வு மையம் தெரிவித்துள்ளது. அப்போது மணிக்கு 120 முதல் 130 கி.மீ. வேகத்திலும், இடையிடையே 145 கி.மீ. வேகத்திலும் பலத்த காற்று வீசக்கூடும்.
சென்னை உள்ளிட்ட 3 மாவட்டங்களுக்கு மிக கனமழை
நவம்பர் 18 மற்றும் 19-ம் தேதிகளில் சென்னை, திருவள்ளூர், செங்கல்பட்டு மாவட்டங்களில் ஓரிரு இடங்களில் இடி, மின்னல் மற்றும் மணிக்கு 40 முதல் 50 கி.மீ. வேகத்தில் பலத்த காற்றுடன் கன முதல் மிக கனமழை பெய்யக்கூடும்.
காஞ்சிபுரம், ராணிப்பேட்டை மாவட்டங்களில் ஓரிரு இடங்களில் கனமழை பெய்ய வாய்ப்புள்ளது. மேற்கு தொடர்ச்சி மலை மாவட்டங்கள் மற்றும் வட கடலோர தமிழகத்தின் சில பகுதிகளிலும் மழை பெய்யக்கூடும் என தெரிவிக்கப்பட்டுள்ளது.
மீனவர்களுக்கு எச்சரிக்கை
தமிழக வடக்கு கடலோரப் பகுதிகளில் நவம்பர் 16 முதல் 18-ம் தேதி வரை மணிக்கு 40 முதல் 50 கி.மீ. வேகத்திலும், இடையிடையே 60 கி.மீ. வேகத்திலும் சூறாவளிக் காற்று வீசக்கூடும். நவம்பர் 19-ம் தேதி காற்றின் வேகம் மேலும் அதிகரிக்க வாய்ப்புள்ளது.
வங்கக்கடல் மற்றும் ஆந்திர கடலோரப் பகுதிகளில் பலத்த காற்று வீசக்கூடும் என்பதால், குறிப்பிட்ட நாட்களில் மீனவர்கள் கடலுக்குச் செல்ல வேண்டாம் என வானிலை ஆய்வு மையம் அறிவுறுத்தியுள்ளது.
புயலின் நகர்வு மற்றும் மழை நிலவரம் தொடர்ந்து கண்காணிக்கப்பட்டு வரும் நிலையில், சென்னை உள்ளிட்ட வட கடலோர மாவட்ட மக்கள் வானிலை ஆய்வு மையத்தின் அறிவிப்புகளைப் பின்பற்றுமாறு அறிவுறுத்தப்படுகிறார்கள்.
வங்கக் கடலில் உருவாகும் புதிய புயல்: இன்று வலுப்பெறுகிறது; நாளை தீவிரப் புயலாக மாற வாய்ப்பு!
