முன்னணி நட்சத்திரங்களை களம் இறக்கும் லோகேஷ்…. சூடுபிடிக்கும் தலைவர் 171 அப்டேட்…

ரஜினிகாந்த் நடிக்கும் 171-வது திரைப்படத்தில் முன்னணி நட்சத்திரங்களை களமிறக்க படக்குழு முடிவு செய்துள்ளது.

ரஜினிகாந்த் நடிப்பில் அண்மையில் வெளியான படம் ஜெயிலர். நெல்சன் திலீப்குமார் இயக்கத்தில் வெளியான இந்த படம் 600 கோடிக்கும் அதிகமாக வசூல் செய்து வெற்றி பெற்றது. ஜெயிலர் படத்திற்கு பின் நடிகர் ரஜினி தலைவர் 170 படத்தில் நடித்து வருகிறார். ஜெய் பீம் படத்தின் இயக்குனரான டிஜே ஞானவேல் இயக்கத்தில் உருவாகி வரும் இந்த படத்தின் படப்பிடிப்புகள் தற்போது விறுவிறுப்பாக நடைபெற்று வருகிறது. இதில் அமிதாப்பச்சன், ராணா டகுபதி, பகத் பாசில், ரித்திகா சிங், மஞ்சு வாரியர், துஷாரா விஜயன் உள்ளிட்டோர் முக்கிய கதாபாத்திரங்களில் நடிக்கின்றனர்.

இதற்கிடையில் ரஜினி நடிக்கும் 171-வது படத்தின் அறிவிப்பும் வௌியானது. அதன்படி, சன் பிக்சர்ஸ் நிறுவனம் தயாரிக்கும் இப்படத்தை லோகேஷ் கனகராஜ் இயக்குகிறார். லியோ வெற்றிக்கு பிறகு இடைவெளி எடுத்துள்ள லோகேஷ், ரஜினி படத்திற்கான திரைக்கதையை எழுத ஆர்வம் காட்டி வருகிறார். இந்நிலையில், அடுத்தடுத்து தலைவர் 171 படம் தொடர்பான அப்டேட்டுகள் வெளியாகி வருகின்றன.

அதன்படி, தலைவர் 171 படத்தில் மூன்று முன்னணி நட்சத்திரங்கள் நடிக்க உள்ளனர். சிவகார்த்திகேயன் மற்றும் ராகவா லாரன்ஸ் முக்கிய கதாபாத்திரத்தில் நடிப்பதாக தகவல் வெளியாகி உள்ளது. மேலும், மலையாள சூப்பர் ஸ்டாராக கொண்டாடப்படும் மம்மூட்டியும் இதில் நடிப்பதாக தெரிகிறது. ஜெயிலர் படத்தை போன்றே முன்னணி நட்சத்திரங்களை முக்கிய கதாபாத்திரங்களில் லோகேஷ் களம் இறக்குவதாக கூறப்படுகிறது. விரைவில் அதிகாரப்பூர்வ தகவல்கள் வெளியாகும் என்று எதிர்பார்க்கப்படுகிறது.