திருவள்ளூர் மாவட்டம், ஆவடி அடுத்த பட்டாபிராம் அருகே உள்ள கரலப்பாக்கத்தில் தூய்மைப் பணியாளர் பெண்ணைப் பீதியில் ஆழ்த்தும் வகையில் சுத்தியலால் அடித்துக் கொலை செய்து, சடலத்தை மூட்டை கட்டி மறைத்து வைத்திருந்த கொடூர சம்பவம் அப்பகுதியில் பெரும் அதிர்ச்சியை ஏற்படுத்தியுள்ளது.
கரலப்பாக்கம் ஊராட்சியில் தூய்மைப் பணியாளராகப் பணியாற்றி வந்த லதா என்பவர், கடந்த சில நாட்களாகப் பணிக்குச் செல்லவில்லை. அவரது செல்போன் எண்ணும் அணைக்கப்பட்டிருந்ததால், உடல்நலக் குறைவு காரணமாக அவர் ஓய்வில் இருப்பதாக சக ஊழியர்கள் கருதியுள்ளனர்.
இதனிடையே, லதா வசித்து வந்த வீட்டின் அருகே கடந்த மூன்று நாட்களாகக் கடுமையான துர்நாற்றம் வீசியுள்ளது. இதனால் சந்தேகமடைந்த அப்பகுதி மக்கள், வீட்டின் ஜன்னல் வழியாக எட்டிப்பார்த்தபோது, ரத்தக்கறையுடன் ஒரு மூட்டை கிடப்பதைக் கண்டு அதிர்ச்சியடைந்து உடனடியாக முத்தாபுதுப்பேட்டை காவல் நிலையத்திற்குத் தகவல் அளித்தனர்.
சம்பவ இடத்திற்கு விரைந்து வந்த போலீசார், பூட்டப்பட்டிருந்த வீட்டைத் திறந்து உள்ளே சோதனையிட்டபோது, அழுகிய நிலையில் இருந்த லதாவின் சடலத்தைக் கைப்பற்றினர்.
துப்பு துலக்கிய செல்போன் எண்:
கிராமப்புறப் பகுதி என்பதால் அப்பகுதியில் சிசிடிவி கேமராக்கள் எதுவும் இல்லாதது போலீசாருக்கு ஆரம்பத்தில் சவாலாக இருந்தது. இருப்பினும், தீவிர விசாரணையின் ஒரு பகுதியாகக் கொல்லப்பட்ட லதாவின் செல்போன் கால் விபரங்களை போலீசார் ஆய்வு செய்தனர்.
அப்போது, அவரது எண்ணுடன் அடிக்கடி தொடர்பில் இருந்த மற்றொரு செல்போன் எண், அதே பகுதிக்குள் இயங்கி வந்தது கண்டுபிடிக்கப்பட்டது. மேலும், அந்த எண்ணைப் பயன்படுத்தி வந்த முனிவேல் என்பவர் மீது சந்தேகம் வலுக்கவே, போலீசார் அவரை மடக்கிப் பிடித்து விசாரித்தனர்.
போலீஸ் விசாரணையில் அம்பலமான திடுக்கிடும் உண்மைகள்:
காவல்துறையினரின் தீவிர விசாரணையில், முனிவேலுக்கும் லதாவிற்கும் இடையே பழக்கம் இருந்ததும், பணம் கொடுக்கல் வாங்கல் தொடர்பாக ஏற்பட்ட தகராறில் லதாவை அவர் சுத்தியலால் தாக்கி கொலை செய்ததும் ஒப்புக்கொள்ளப்பட்டது. மேலும், சடலத்திலிருந்து துர்நாற்றம் வெளியேறாமல் இருக்க அதனைத் துணியால் மூட்டை கட்டி அதே வீட்டில் மறைத்து வைத்துள்ளதும் தெரியவந்துள்ளது.
குறிப்பாக, கொலை செய்துவிட்டு ஒன்றும் தெரியாதது போல் கொலையாளி முனிவேல் வீட்டின் அருகிலேயே சர்வசாதாரணமாகச் சுற்றித் திரிந்தது விசாரணையில் தெரியவந்து பலரையும் பதைபதைக்க வைத்துள்ளது.
முனிவேலின் வாக்குமூலத்தின் அடிப்படையில் கொலை வழக்குப்பதிவு செய்த முத்தாபுதுப்பேட்டை போலீசார், அவரை உடனடியாகக் கைது செய்து நீதிமன்றக் காவலுக்கு உட்படுத்தினர். சிசிடிவி ஆதாரங்கள் இல்லாத சவாலான வழக்கில், துரிதமாகச் செயல்பட்டு செல்போன் எண் மூலம் கொலையாளியைக் கைது செய்த காவல்துறையினரின் நடவடிக்கைக்கு அப்பகுதி பொதுமக்கள் பாராட்டு தெரிவித்துள்ளனர்.
போலி ஆவணங்கள் மூலம் ஆதி திராவிடர் சான்றிதழ்: ஒருவர் கைது – ஆவடி ஆணையரகம் எச்சரிக்கை