நீட் தேர்வு முறைகேடுகள் மற்றும் வினாத்தாள் கசிவைக் கண்டித்து டெல்லியில் ஜந்தர் மந்தரில் போராடி வரும் மாணவர்களுக்கு ஆதரவாகவும், மத்திய கல்வி அமைச்சர் தர்மேந்திர பிரதான் உடனடியாகப் பதவி விலக வலியுறுத்தியும் தமிழகம் மற்றும் புதுச்சேரியில் மாணவர்கள் வகுப்புகளைப் புறக்கணித்து மாபெரும் போராட்டங்களில் ஈடுபட்டு வருகின்றனர்.
புதுச்சேரியில் 200-க்கும் மேற்பட்ட மாணவர்கள் வீதியில் இறங்கி போராட்டம்
புதுச்சேரியில் இந்திய மாணவர் சங்கத்தின் (SFI) சார்பில் பள்ளி மற்றும் கல்லூரி மாணவர்கள் வகுப்புகளைப் புறக்கணித்து ஆர்ப்பாட்டத்தில் ஈடுபட்டனர். லாஸ்பேட்டை நாவலர் நெடுஞ்செழியன் அரசுப் பள்ளி அருகே சுமார் 200-க்கும் மேற்பட்ட அரசுப் பள்ளி, கல்லூரி மற்றும் பாலிடெக்னிக் மாணவர்கள் திரண்டு, மத்திய பாஜக அரசுக்கும் பிரதமர் மோடிக்கும் எதிராகக் கடுமையான கண்டனக் கோஷங்களை எழுப்பினர்.
நெல்லையில் சட்டக் கல்லூரி மாணவர்கள் திரண்டனர்
நெல்லை அரசு சட்டக் கல்லூரி மாணவர்கள் வகுப்புகளைப் புறக்கணித்து டெல்லி போராட்டக்காரர்களுக்கு ஆதரவாகக் களமிறங்கினர்.
இதுகுறித்து மாணவர் பிரதிநிதிகள் செல்வா, பாலா, சண்முகவேல் ஆகியோர் கூறுகையில், நீட் தேர்வில் தொடரும் வினாத்தாள் கசிவு லட்சக்கணக்கான மாணவர்களின் எதிர்காலத்தைக் கேள்விகுறியாக்கியுள்ளது என்றும், அதற்குப் பொறுப்பேற்று மத்திய கல்வி அமைச்சர் தர்மேந்திர பிரதான் உடனடியாகப் பதவி விலக வேண்டும் என்றும் வலியுறுத்தினர். மேலும் மாணவர் உரிமைகளுக்காகத் தமிழகம் முழுவதும் உள்ள மாணவர்களுடன் சேர்ந்து சட்டக் கல்லூரி மாணவர்கள் அணிதிரள்வோம் எனத் தெரிவித்தனர்.
திருப்பூரில் வகுப்புகளைப் புறக்கணித்த சிக்கண்ணா கல்லூரி மாணவர்கள்
இளைஞர் மற்றும் மாணவர் அமைப்புகள் விடுத்த போராட்ட அழைப்பை ஏற்று, திருப்பூர் கல்லூரிச் சாலையில் உள்ள சிக்கண்ணா அரசு கலைக்கல்லூரி மாணவர்கள் இன்று முழுமையாக வகுப்புகளைப் புறக்கணித்தனர்.
கல்லூரி வளாகத்திற்குள் திரண்ட மாணவர்கள், நீட் தேர்வு முறைகேடுகளுக்குத் தீர்வு காணக் கோரியும், மத்திய அரசைக் கண்டித்தும் தீவிர கோஷங்களை எழுப்பினர். திருப்பூரின் பல்வேறு பகுதிகளிலும் மாணவர் அமைப்புகள் சார்பில் ஆர்ப்பாட்டங்கள் நடைபெற்றன.
தருமபுரியில் ‘கல்வியை மாநிலப் பட்டியலுக்கு மாற்ற’ வலியுறுத்தல்
தருமபுரி மாவட்டம் போளையம்பள்ளி கிராமத்தில் இயங்கி வரும் சாஹிப் இலவச பயிற்சி மைய மாணவ-மாணவிகள் நீட் தேர்வை ரத்து செய்ய வலியுறுத்திப் போராட்டத்தில் ஈடுபட்டனர்.
மதிப்பெண் அடிப்படையிலான சேர்க்கை: நீட் தேர்வு ஏழை மற்றும் அரசுப் பள்ளி மாணவர்களின் மருத்துவக் கனவைச் சிதைப்பதால், +2 மதிப்பெண் அடிப்படையிலான பழைய சேர்க்கை முறையைக் கொண்டுவர வேண்டும்.
மாநிலப் பட்டியலுக்கு மாற்றம்: மருத்துவக் கல்வியின் மீதான முழு அதிகாரமும் மாநில அரசுகளுக்கே இருக்கும் வகையில் கல்வியைப் பொதுப் பட்டியலிலிருந்து மீண்டும் மாநிலப் பட்டியலுக்கு மாற்ற வேண்டும்.
காவல்துறை நடவடிக்கைக்குக் கண்டனம்: டெல்லியில் அமைதியாகப் போராடிய மாணவர்கள் மீது நடத்தப்பட்ட தடியடி மற்றும் கைது நடவடிக்கைகளுக்கு வன்மையான கண்டனத்தைப் பதிவு செய்வதாகப் பயிற்சி மைய மாணவர்கள் தெரிவித்தனர்.
தமிழகம் மற்றும் புதுச்சேரி முழுவதும் மாணவர்கள் போராட்டக் களம் புகுந்துள்ளதால், கல்வி நிலையங்கள் மற்றும் முக்கியப் பகுதிகளில் பாதுகாப்பு பலப்படுத்தப்பட்டு பரபரப்பான சூழல் நிலவி வருகிறது.
நீட் தேர்வுக்கு எதிராகக் களத்தில் இறங்கிய வழக்கறிஞர்கள்: பொன்னேரியில் கண்டன ஆர்ப்பாட்டம்!