தமிழகத்தின் உயிர்நாடியான காவிரி நீரைப் பெற்றுத் தரத் திராணியில்லாமல் கோட்டை விட்டுவிட்டு, மக்களின் உரிமைகளுக்காகக் குரல் கொடுப்பவர்கள் மீது காவல்துறையை ஏவி கொடூரமான அடக்குமுறைகளைக் கட்டவிழ்த்துவிடும் புதிய அரசின் சர்வாதிகாரப் போக்கை மார்க்சிஸ்ட் கம்யூனிஸ்ட் கட்சியின் மூத்த தலைவர் கனகராஜ் மிகக் கடுமையாகச் சாடியுள்ளார். ஈ தமிழ் நியூஸ் ஊடகத்திற்கு வழங்கிய அதிரடிப் பேட்டியில் அவர், தற்போதைய ஆட்சியாளர்களின் நிர்வாகத் திறமையின்மையையும் முதிர்ச்சியற்ற அரசியல் போக்குகளையும் புட்டுப் புட்டு வைத்துள்ளார்.
காவிரி விவகாரத்தில் படுதோல்வி:
கர்நாடக அரசு தண்ணீரைத் திறக்க மறுத்து முரண்டுபிடிக்கும் இந்த இக்கட்டான சூழலில், தமிழகத்தின் அனைத்துக் கட்சிகளையும் ஒன்றிணைத்து ஒருமித்த கருத்தை உருவாக்கத் தவறிய ஆளுங்கட்சி, பிரச்சினைகளைச் சமாளிக்கத் தெரியாமல் தவித்து வருகிறது. டெல்டா மாவட்டங்கள் வறண்டு கிடக்கும்போது, ஆக்கப்பூர்வமான நடவடிக்கைகளை எடுக்காமல் வெற்று அரசியலில் ஈடுபடும் அரசின் போக்கால் தமிழர்களின் உரிமைகள் காவு கொடுக்கப்படுகின்றன.
கல்வி வளாகங்களைச் சீரழிக்கும் வெட்கக்கேடான அரசியல்:
பள்ளிகள் மற்றும் கல்லூரிகள் போன்ற புனிதமான கல்வி வளாகங்களுக்குள் அமைச்சர்களே நேரில் சென்று அரசியல் கட்சிக் கோஷங்களை எழுப்புவதும், இளம் மாணவர்களைத் தேர்தல் அரசியலுக்குப் பலிகடாாக்குவதும் மன்னிக்க முடியாத மாபெரும் குற்றமாகும். குழந்தைகளின் எதிர்காலத்தைச் சூறையாடும் இந்த வக்கிரமான அரசியலை இனியாவது முதலமைச்சர் தடுத்து நிறுத்த வேண்டும்; இல்லையேல் பெற்றோர்களின் கொந்தளிப்பைச் சந்திக்க நேரிடும்.
காவல்துறையின் ஏவல் வேலை – அடக்குமுறைக்கு முற்றுப்புள்ளி வைக்க வேண்டும்:
மக்களின் ஜனநாயகரீதியான போராட்டங்களை ஒடுக்குவதற்காகக் காவல்துறையைக் கொத்தடிமைகளைப் போலப் பயன்படுத்தி தடியடி நடத்துவதும், கைது செய்து சித்ரவதை செய்வதும் ஒட்டுமொத்த ஜனநாயகத்தின் மீதான நேரடித் தாக்குதலாகும். மக்களின் ஓட்டுகளைப் பெற்று அரியணை ஏறியவர்கள், சர்வாதிகாரிகளைப் போல நடந்துகொண்டால் மக்கள் உரிய காலத்தில் தக்க பாடம் புகட்டுவார்கள் என்று கனகராஜ் தனது நேர்காணலில் ஆவேசமாக எச்சரித்துள்ளார்.
நாளை சட்டமன்றக் கூட்டத்தொடர்: பனையூரில் தவெக எம்.எல்.ஏ.க்கள் கூட்டம் தொடக்கம்!