நீட் தேர்வு வினாத்தாள் கசிவு மற்றும் முறைகேடுகளைக் கண்டித்து டெல்லியிலும் தமிழகத்திலும் நடைபெற்று வரும் மாணவர் போராட்டங்கள் குறித்து மேஜை இயக்க ஒருங்கிணைப்பாளர் திருமுருகன் காந்தி சென்னையில் செய்தியாளர்களைச் சந்தித்துப் பேட்டியளித்தார். அப்போது மத்திய பாஜக அரசு மற்றும் மாநில அரசின் செயல்பாடுகள் குறித்துப் பல்வேறு காரசாரமான விமர்சனங்களை முன்வைத்தார்.
“சுதந்திரத்திற்குப் பின் இத்தகைய தீவிரப் போராட்டத்தை இந்தியா பார்த்ததில்லை”
டெல்லியில் நடைபெற்று வரும் மாணவர் போராட்டங்களின் தீவிரத்தைக் குறிப்பிட்டுப் பேசிய திருமுருகன் காந்தி, சுதந்திர இந்திய வரலாற்றிலேயே இதுவரை பார்த்திராத அளவிற்கு மிகக் கடுமையான போராட்டங்களை மாணவர்கள் டெல்லியில் முன்னெடுத்து வருவதாகக் குறிப்பிட்டார்.
ஆனால், அவர்கள் மீது டெல்லி காவல்துறை கொடூரமான ஒடுக்குமுறையை ஏவி வருகிறது என்றும், சர்ச்சைகளுக்கு நடுவே மத்திய கல்வி அமைச்சர் தர்மேந்திர பிரதானுக்குப் பிரதமர் மோடி பிறந்தநாள் வாழ்த்துத் தெரிவித்ததன் மூலம், இந்த அரசாங்கம் ஒட்டுமொத்தமாக மாணவர் சமூகத்தை வஞ்சிப்பது அப்பட்டமாக அம்பலமாகிப்போனது என்றும் குற்றம் சாட்டினார்.
நீட் தேர்வு ரத்தும் தமிழ்நாட்டின் நிதியும்
ரூ. 1.5 லட்சம் கோடி கோச்சிங் தொழில்: நீட் தேர்வு என்பது ஒரு மிகப்பெரிய ஊழல். நீட் தேர்வை எழுதினாலே சிறந்த மருத்துவர் ஆகிவிட முடியுமா? இதன் பின்னணியில் ஒன்றரை லட்சம் கோடி ரூபாய் மதிப்புள்ள பயிற்சி மைய (Coaching Centre) மாஃபியா இயங்கி வருகிறது.
3 ஆண்டுகளாக தடுத்து வைக்கப்பட்டுள்ள நிதி: கடந்த 3 ஆண்டுகளுக்கு மேலாகத் தமிழ்நாட்டிற்கான பள்ளிக் கல்வி நிதியை மத்திய அரசு தடுத்து வைத்துப் பழிவாங்கி வருகிறது.
மாநில உரிமை: தமிழ்நாட்டிலிருந்து உலகப் புகழ்பெற்ற மருத்துவர்கள் உருவாகியுள்ளனர். கல்விப் பொதுப் பட்டியலில் உள்ளதால், நீட் வேண்டாம் எனச் சட்டம் இயற்ற மாநில அரசுக்கு முழு உரிமை உள்ளது. அதிமுக ஆட்சியிலும் தீர்மானம் நிறைவேற்றப்பட்டது; திமுக ஆட்சியிலும் சட்ட வரைவு கொண்டுவரப்பட்டது.
முழுமையான ரத்தே தீர்வு: மத்திய கல்வி அமைச்சரின் ராஜினாமா மட்டும் போதாது; நீட் தேர்வை ஒட்டுமொத்தமாக ரத்து செய்வதே நிரந்தரத் தீர்வாகும் எனக் கூறினார்.
தமிழக அரசிடமும் காவல்துறைக்குமான கேள்விகள்
தமிழகத்தில் மாணவர்கள் மீது மேற்கொள்ளப்படும் நடவடிக்கைகளையும், அமைச்சர்களின் செயல்பாடுகளையும் திருமுருகன் காந்தி கடுமையாக விமர்சித்தார்:
மெரினாவில் போராட்டத்திற்கு ஏன் அனுமதி இல்லை?: மெரினா கடற்கரையில் கால்பந்து போட்டி நடத்த முடிகிறது, கட்சித் தலைவரின் திரைப்படக் கொண்டாட்டங்களை நடத்த முடிகிறது. ஆனால், நாட்டின் எதிர்காலத்திற்காகப் போராடும் மாணவர்கள் அமைதியாக உட்கார்ந்து போராட ஏன் மெரினாவில் அனுமதி மறுக்கப்படுகிறது?
அமைச்சர்கள் சினிமா கொண்டாட்டத்தில் மூழ்கியுள்ளனர்: தங்களது கட்சித் தலைவரின் திரைப்படக் கொண்டாட்டத்தை அமைச்சர்கள் தனியாக வைத்துக்கொள்ள வேண்டும். அன்று ரசிகர்களாக இருந்தவர்கள் இன்று அமைச்சர்களாகி விட்டார்கள். ஆனால், அவர்கள் தங்களை அந்தப் பொறுப்பிற்குத் தகவமைத்துக் கொள்ளவில்லை என்றால் மக்களிடமிருந்து முற்றிலும் அந்நியப்பட்டு விடுவார்கள் என எச்சரித்தார்.
ஜெனரேஷன்-ஜி (Gen-Z) தலைமுறை மாணவர்கள் புரட்சிக்குத் தயாராகிவிட்டதாகவும், மாணவர்கள் மற்றும் அவர்களின் குடும்பங்கள் நீட் தேர்வுக்கு எதிராகத் திரண்டுள்ளதைக் கண்டு ஆளும்கட்சியினர் அரண்டுபோயுள்ளனர் என்றும் அவர் தெரிவித்தார்.
சினிமா மேடை அல்ல… இது மாணவர்களின் உரிமை மேடை! நீட் தேர்வை எதிர்த்து வெற்றிமாறன் சொன்ன நச் வார்த்தை!