திருவேற்காடு: சென்னையை அடுத்த திருவேற்காடு பகுதியில், சாலைகளில் பரவிக்கிடக்கும் குப்பைக் கழிவுகளால் கடுமையான துர்நாற்றம் வீசுவதுடன், அப்பகுதி மக்கள் மற்றும் கால்நடைகளுக்கு நோய் பரவும் அபாயம் ஏற்பட்டுள்ளது.
திருவேற்காடு நகராட்சிக்குட்பட்ட சின்ன கோலடி பிரதான சாலையில் குப்பைக் குவியல்கள் கொட்டப்பட்டு, முறையாக அப்புறப்படுத்தப்படாமல் உள்ளன. அண்மையில் பெய்த மழை மற்றும் காற்றின் காரணமாக இந்தக் குப்பைகள் சாலை முழுவதும் பரவிக்கிடக்கின்றன.
மூக்கை மூடிக்கொண்டு செல்லும் அவலம்
சாலை முழுவதும் பரவிக்கிடக்கும் குப்பைக் கழிவுகளால் அப்பகுதி முழுவதும் கடுமையான துர்நாற்றம் வீசுகிறது. இதனால் அவ்வழியாக நடந்து செல்லும் பொதுமக்களும், இருசக்கர வாகன ஓட்டிகளும் மூக்கை மூடிக்கொண்டு கடந்து செல்ல வேண்டிய அவல நிலை ஏற்பட்டுள்ளது. இந்த சுகாதாரச் சீர்கேட்டால் இப்பகுதி மக்களுக்கு நோய் தொற்று பரவும் அபாயம் உள்ளதாகவும் அச்சம் தெரிவிக்கப்பட்டுள்ளது.
கால்நடைகளுக்கு விடுக்கப்படும் அச்சுறுத்தல்
இந்தக் குப்பைக் மேட்டில் பத்துக்கும் மேற்பட்ட பசுமாடுகள் மற்றும் எருமை மாடுகள் உணவுக்காகத் திரிகின்றன. இந்தக் கால்நடைகள் குப்பையில் உள்ள உணவுக்கழிவுகள் மட்டுமின்றி, பிளாஸ்டிக் மற்றும் மைக்கா போன்ற தீங்கு விளைவிக்கும் பொருட்களையும் உண்கின்றன. இதனால் கால்நடைகளுக்கு நோய் பரவுவதுடன், அவற்றின் மூலம் பொதுமக்களுக்கும் நோய்த்தொற்று பரவும் அபாயம் உருவாகியுள்ளது.
நகராட்சிக்குக் கோரிக்கை
சின்ன கோலடி பகுதியில் நிலவும் இந்த சுகாதாரமற்ற சூழல் குறித்து திருவேற்காடு நகராட்சி நிர்வாகம் உடனடியாக கவனம் செலுத்த வேண்டும் என்று பொதுமக்கள் கோரிக்கை விடுத்துள்ளனர். பரவிக்கிடக்கும் குப்பைக் கழிவுகளை உடனடியாக அப்புறப்படுத்தி, நோய் பரவும் அபாயத்தைத் தடுக்க உரிய நடவடிக்கை எடுக்க வேண்டும் என்பதே அப்பகுதி மக்களின் முக்கிய எதிர்பார்ப்பாக உள்ளது.