சென்னையில் சிகிச்சை பலனின்றி உயிரிழந்த ஒன்றரை வயதுக் குழந்தையின் உடல் உறுப்புகளைத் தானமாக அளிக்கப் பெற்றோர் முன்வந்த நெகிழ்ச்சியான சம்பவம் அரங்கேறியுள்ளது. இதன்மூலம் தமிழ்நாட்டின் மிகக் குறைந்த வயதில் உடல் உறுப்பு தானம் வழங்கப்பட்ட வரலாற்றுச் சாதனை பதிவாகியுள்ளது.
சிகிச்சை பலனின்றி மரணம்
சென்னை ராஜீவ்காந்தி அரசு பொது மருத்துவமனையில் தீவிர சிகிச்சைப் பிரிவில் அனுமதிக்கப்பட்டிருந்த ஒன்றரை வயதுக் குழந்தை, மருத்துவர்களின் தீவிர சிகிச்சைக்குப் பிறகும் பலனின்றி மூளைச் சாவு அடைந்தது. தனது செல்லக் குழந்தையின் பிரிவைத் தாங்க முடியாமல் பெற்றோர் கதறித் துடித்தபோதிலும், அந்த சோகமான சூழலிலும் பிற உயிர்களைக் காக்கும் உயரிய நோக்கில் குழந்தையின் உடல் உறுப்புகளைத் தானமாக வழங்க முன்வந்தனர்.
தமிழ்நாட்டின் புதிய மைல்கல்
தமிழ்நாட்டின் மருத்துவ வரலாற்றிலேயே மிகக் குறைந்த வயதில் உடல் உறுப்புகள் தானமாகப் பெறப்பட்டது இதுவே முதல்முறையாகும். பெற்றோரின் இந்தச் சம்மதத்தைத் தொடர்ந்து, மருத்துவக் குழுவினர் விரைந்து செயல்பட்டு அறுவை சிகிச்சை மூலம் உறுப்புகளைப் பெற்று, தேவைப்படும் பிற நோயாளிகளுக்குப் பொருத்த நடவடிக்கை எடுத்தனர்.
கண்ணீருடன் வழியனுப்பிய மருத்துவர்கள்
உறுப்பு தான நடைமுறைகள் நிறைவடைந்த பிறகு, குழந்தையின் உடலுக்கு ராஜீவ்காந்தி அரசு மருத்துவமனை டாக்டர்கள், செவிலியர்கள் மற்றும் ஊழியர்கள் அனைவரும் திரண்டு மரியாதை செலுத்தினர். மருத்துவமனை வளாகத்தில் வரிசையாக நின்று, தங்களின் சொந்தக் குழந்தையைப் போல் கண்ணீர் மல்க அந்தப் பிஞ்சு உடலை உறவினர்களிடம் வழியனுப்பி வைத்த காட்சி அங்கிருந்த அனைவரையும் உருக வைத்தது. தங்களின் ஆறாத் துயரத்திலும் பிற குழந்தைகளின் வாழ்வுக்கு ஒளியேற்றிய அப்பெற்றோரின் மாபெரும் தியாகத்தையும் மனிதநேயத்தையும் பல்வேறு தரப்பினரும் மனமாரப் பாராட்டி வருகின்றனர்.
அரசு வேலை வாங்கி தருவதாக கூறி ரூ. 20 லட்சம் மோசடி: தாய், தந்தை, மகள் கைது – புழல் சிறையில் அடைப்பு!