ஆடி மாதத்தின் முதல் ஞாயிற்றுக்கிழமையான இன்று, சென்னை காசிமேடு மீன்பிடி துறைமுகத்தில் வழக்கத்தை விடப் பொதுமக்களின் கூட்டம் அலைமோதியது. ஆடி மாதப் படையலை முன்னிட்டு மீன்களின் தேவை அதிகரித்துள்ளதால், அவற்றின் விலையும் கடுமையாக உயர்ந்துள்ளது.
பொதுவாகவே வார இறுதி நாட்களிலும், விடுமுறை தினங்களிலும் காசிமேடு சந்தைக்குப் புதிய மற்றும் பெரிய வகை மீன்களை வாங்குவதற்காக நகரின் பல்வேறு பகுதிகளில் இருந்தும் ஏராளமான மக்கள் வருவது வழக்கம். இந்நிலையில், ஆடி மாதத்தின் முதல் ஞாயிற்றுக்கிழமையான இன்று, வழக்கத்தை விடப் பல மடங்கு கூட்டம் அதிகமாகக் காணப்பட்டது.
ஆடி படையலால் அதிகரித்த மவுசு
ஆடி மாதத்தில் வீடுகளிலும், அம்மன் கோவில்களிலும் கூழ் வார்த்து, சாமிக்குப் படையலிட்டு வழிபடுவது தமிழர்களின் மரபாகும். இந்த ஆடிப் படையலில் அசைவ உணவுகள், குறிப்பாக மீன் வகைகள் முக்கிய இடம்பிடிப்பதால், பொதுமக்கள் அதிகாலை முதலே காசிமேட்டில் குவியத் தொடங்கினர். வஞ்சிரம், வவ்வால், பாறை, நாக்கு உள்ளிட்ட மீன்களை வாங்குவதில் மக்கள் அதிக ஆர்வம் காட்டினர்.
வஞ்சிரம் ரூ.1500-க்கு விற்பனை
மக்களின் வருகை அதிகரித்ததைத் தொடர்ந்து, மீன்களின் விலையும் கடந்த வாரத்தை விடக் கணிசமாக உயர்ந்துள்ளது. குறிப்பாக, மீன் பிரியர்களின் ஃபேவரிட் மீனாக இருக்கும் வஞ்சிரம் கடந்த வாரம் 900 ரூபாய்க்கு விற்கப்பட்ட நிலையில், இன்று 1,500 ரூபாய்க்கு விற்பனை செய்யப்பட்டது. விலை அதிகமாக இருந்தபோதிலும், பொதுமக்கள் வியாபாரிகளிடம் பேரம் பேசி தங்களுக்குத் தேவையான மீன்களை வாங்கிச் சென்றனர்.
இன்றைய காசிமேடு மீன் விலை நிலவரம் (ஒப்பீடு)
ஆடி மாதத் தொடக்கத்தால் மற்ற மீன்களின் விலையும் கணிசமாக உயர்ந்துள்ளது. அதன் விவரம் வருமாறு, ஞாயிற்றுக்கிழமையான இன்று மீன் சந்தைகளில் மீன்களின் விலை கடந்த வாரத்தை விடக் கணிசமாக உயர்ந்து, அசைவப் பிரியர்களின் பட்ஜெட்டைப் பதம் பார்த்துள்ளது. குறிப்பாக, எப்போதும் அதிக தேவையுள்ள வஞ்சிரம் மீனின் விலை கடந்த வாரம் ரூ.900-க்கு விற்கப்பட்ட நிலையில், இன்று ரூ.1500 ஆக அதிரடியாக உயர்ந்துள்ளது. அதேபோல், பெரிய பாறை மீன் ரூ.1400-லிருந்து ரூ.1700 ஆகவும், சாதாரண பாறை மீன் ரூ.500-லிருந்து ரூ.700 ஆகவும் அதிகரித்துள்ளது. கொடுவா மீன் ரூ.700-லிருந்து ரூ.1000 ஆகவும் உயர்ந்துள்ளது.
இதர கடல் உணவுகளான இறால் (ரூ.450-லிருந்து ரூ.650), கிழங்கா (ரூ.500-லிருந்து ரூ.650), சங்கரா (ரூ.450-லிருந்து ரூ.600), கடம்பா (ரூ.450-லிருந்து ரூ.600) மற்றும் நண்டு (ரூ.400-லிருந்து ரூ.600) ஆகியவற்றின் விலையும் கிலோவுக்கு ரூ.150 முதல் ரூ.200 வரை அதிகரித்துள்ளது. ஏழை எளிய மக்களின் விருப்பமான நெத்திலி மீன் கூடக் கடந்த வார விலையான ரூ.300-லிருந்து உயர்ந்து இன்று ரூ.500-க்கு விற்பனை செய்யப்படுகிறது.
புதிய வரத்து மீன்களின் இன்றைய விலை நிலவரம்
கடந்த வாரம் விலைப்பட்டியலில் இல்லாத சில முக்கிய மீன் வகைகள் இன்று சந்தைக்கு வந்துள்ளன. அதன்படி, வவ்வால் மீன் கிலோ ரூ.1500-க்கும், கருப்பு வவ்வால் ரூ.1200-க்கும், நாக்குமீன் ரூ.1000-க்கும் விற்பனையாகின்றன. மேலும், களவான் / கடல் விரால் கிலோ ரூ.700-க்கும், சுறா / சீலா மீன்கள் கிலோ ரூ.600-க்கும் இன்று சந்தையில் விற்பனை செய்யப்பட்டு வருகின்றன. வரத்துக் குறைவு காரணமாகவே இந்தத் திடீர் விலை உயர்வு ஏற்பட்டுள்ளதாக வியாபாரிகள் தெரிவித்துள்ளனர். மேலும், ஆடி மாதத்தின் முதல் வாரத்திலேயே மீன்களின் விலை இந்த அளவிற்கு உச்சத்தைத் தொட்டிருப்பது மீன் பிரியர்களிடையே அதிர்ச்சியை ஏற்படுத்தியிருந்தாலும், பண்டிகைக் காலம் என்பதால் காசிமேடு சந்தை மக்கள் கூட்டத்தால் திருவிழா போலக் களைகட்டியிருந்தது.