தாம்பரம்: முதல் நாள் கல்லூரிக்குச் சென்ற மாணவி விரைவு ரயில் மோதி பலி!

சென்னை குரோம்பேட்டை பகுதியில், முதல் நாள் கல்லூரிக்குச் சென்ற கணிப்பொறிப் பொறியியல் முதலாம் ஆண்டு மாணவி ரயில் மோதி பரிதாபமாக உயிரிழந்த சம்பவம் அப்பகுதியில் பெரும் சோகத்தை ஏற்படுத்தியுள்ளது.

சென்னை குரோம்பேட்டை நாயுடு ஹால் தெருவைச் சேர்ந்தவர் சினிவான். இவருடைய மகள் ராஜஸ்ரீ (18). இவர் பொத்தேரியில் உள்ள பிரபல எஸ்.ஆர்.எம். கல்லூரியில் கணிப்பொறிப் பொறியியல் (Computer Science Engineering) பிரிவில் முதலாம் ஆண்டு சேர்ந்துள்ளார்.

இந்நிலையில், இன்று காலை தனது முதல் நாள் கல்லூரி வகுப்பிற்குச் செல்வதற்காக ராஜஸ்ரீ வீட்டிலிருந்து புறப்பட்டுள்ளார். அப்போது குரோம்பேட்டை வைஷ்ணவா கல்லூரி ரயில்வே கேட்டைக் கடந்துசெல்ல முயன்றபோது, எதிர்பாராதவிதமாக சென்னையை நோக்கி விரைந்து வந்த விரைவு ரயில் அவர் மீது மோதியது. இதில் தூக்கி வீசப்பட்ட மாணவி ராஜஸ்ரீ சம்பவ இடத்திலேயே பரிதாபமாக உயிரிழந்தார்.

தகவலறிந்து விரைந்து வந்த தாம்பரம் இருப்புப் பாதை (Railway) போலீசார், மாணவியின் உடலைக் கைப்பற்றி பிரேதப் பரிசோதனைக்காகத் தாம்பரம் அரசு மருத்துவமனைக்கு அனுப்பி வைத்தனர். மேலும், இச்சம்பவம் குறித்து வழக்குப்பதிவு செய்து தீவிர விசாரணை நடத்தி வருகின்றனர்.

கல்லூரி வாழ்க்கையின் முதல் நாளே விபத்தில் சிக்கி மாணவி உயிரிழந்த இச்சம்பவம், அவரது குடும்பத்தினரையும், உறவினர்களையும், நண்பர்களையும் மீளாத் துயரத்தில் ஆழ்த்தியுள்ளது.