சென்னையில் தெருநாய்கள் மூலம் பொதுமக்களுக்கு ஏற்படும் ரேபிஸ் நோய் பாதிப்பை தடுக்கும் வகையில் மாநகராட்சி சார்பில் சிறப்பு தடுப்பூசி முகாம்கள் நடைபெற்று வருகின்றன. இதுவரை 86,489 தெருநாய்களுக்கு ரேபிஸ் தடுப்பூசி செலுத்தப்பட்டுள்ளதாக சென்னை மாநகராட்சி தெரிவித்துள்ளது.
ஆகஸ்ட் 11-ல் தொடங்கிய சிறப்பு முகாம்
சென்னை மாநகராட்சியின் சார்பில் அனைத்து தெருநாய்களுக்கும் ரேபிஸ் தடுப்பூசி மற்றும் அக, புற ஒட்டுண்ணிகளை நீக்கும் மருந்துகள் செலுத்தும் மாபெரும் சிறப்பு முகாம் கடந்த ஆகஸ்ட் 11-ம் தேதி தொடங்கியது.
முதற்கட்டமாக திருவொற்றியூர், மணலி, தண்டையார்பேட்டை, மாதவரம் மற்றும் ராயபுரம் ஆகிய 5 மண்டலங்களில் உள்ள தெருநாய்களுக்கு தடுப்பூசி மற்றும் ஒட்டுண்ணி நீக்கும் மருந்துகள் செலுத்தப்பட்டன.
86,489 நாய்களுக்கு தடுப்பூசி
சென்னை மாநகராட்சி வெளியிட்டுள்ள தகவலின்படி, இதுவரை 8 மண்டலங்களில் மொத்தம் 86,489 தெருநாய்களுக்கு ரேபிஸ் தடுப்பூசி செலுத்தப்பட்டுள்ளது.
மண்டலம் வாரியாக தடுப்பூசி செலுத்தப்பட்ட நாய்களின் எண்ணிக்கை:
திருவொற்றியூர் – 12,313
மணலி – 7,200
தண்டையார்பேட்டை – 12,477
ராயபுரம் – 8,598
அம்பத்தூர் – 18,627
மாதவரம் – 16,956
அண்ணாநகர் – 9,653
ஆலந்தூர் – 665
இதில் அம்பத்தூர் மண்டலத்தில் மட்டும் 18,627 தெருநாய்களுக்கு தடுப்பூசி செலுத்தப்பட்டுள்ளது.
அம்பத்தூர் உள்ளிட்ட 3 மண்டலங்களில் முகாம்
தற்போது அம்பத்தூர், அண்ணாநகர் மற்றும் ஆலந்தூர் மண்டலங்களில் சிறப்பு தடுப்பூசி முகாம் தொடர்ந்து நடைபெற்று வருகிறது. ஒவ்வொரு மண்டலத்திலும் தலா 10 குழுக்கள் இந்தப் பணியில் ஈடுபடுத்தப்பட்டுள்ளன.
இந்த மண்டலங்களில் உள்ள தெருக்கள் மட்டுமின்றி கல்வி நிறுவனங்கள், மருத்துவமனைகள் உள்ளிட்ட பகுதிகளில் உள்ள தெருநாய்களுக்கும் தடுப்பூசி செலுத்தப்பட்டு வருகிறது.
சுமார் 2 லட்சம் நாய்களுக்கு தடுப்பூசி இலக்கு
அம்பத்தூர், அண்ணாநகர் மற்றும் ஆலந்தூர் மண்டலங்களில் முகாம் நிறைவடைந்த பிறகு, திரு.வி.க.நகர், தேனாம்பேட்டை, கோடம்பாக்கம், வளசரவாக்கம், அடையாறு, பெருங்குடி மற்றும் சோழிங்கநல்லூர் ஆகிய மண்டலங்களிலும் சிறப்பு முகாம் நடத்தப்பட உள்ளது.
அனைத்து மண்டலங்களிலும் 39 வேலை நாட்களுக்குள் சுமார் 2 லட்சம் தெருநாய்களுக்கு ரேபிஸ் தடுப்பூசியும், அக மற்றும் புற ஒட்டுண்ணி நீக்கும் மருந்துகளும் செலுத்த திட்டமிடப்பட்டுள்ளதாக மாநகராட்சி தெரிவித்துள்ளது.
ரேபிஸ் தடுப்பு நடவடிக்கைகள் தீவிரம்
சென்னை மாநகராட்சி ஏற்கனவே தெருநாய்களுக்கான Animal Birth Control மற்றும் Anti-Rabies Vaccination திட்டங்களை செயல்படுத்தி வருகிறது. பிடிக்கப்படும் நாய்களுக்கு கருத்தடை சிகிச்சை மற்றும் ரேபிஸ் தடுப்பூசி செலுத்தப்பட்டு, அவை பிடிக்கப்பட்ட அதே பகுதியில் மீண்டும் விடப்படுகின்றன.
தெருநாய்களுக்கு தடுப்பூசி செலுத்துவதன் மூலம் ரேபிஸ் பரவலைக் கட்டுப்படுத்துவதுடன், பொதுமக்களின் பாதுகாப்பையும் மேம்படுத்த மாநகராட்சி நடவடிக்கை மேற்கொண்டு வருகிறது.
அண்ணா பல்கலைக்கழகத்தில் தீவிர டெங்கு பரிசோதனை: 20 மாணவர்களின் ரத்த தட்டு அணுக்கள் குறைவால் பரபரப்பு!