ஜோஸ்வா இமை போல் காக்க… அதிரடி காதல் கதையாக டிரைலர் ரிலீஸ்…

கௌதம் மேனன் இயக்கத்தில் வருண் நடிப்பில் உருவாகி இருக்கும் ஜோஸ்வா இமை போல் காக்க படத்தின் டிரைலர் வெளியாகி உள்ளது.

காபி, காதல் என்ற இரண்டையும் திரையில் காட்டி ரசிகர்களை தன் பக்கம் திருப்பிய கல்ட் இயக்குநர் கௌதம் மேனன். காதலை மாறுபட்ட கோணத்தில் திரைக்கு கொண்டு வந்து, ரசிகர்களின் மனதை வெல்லும் திறமை கொண்டவர் கௌதம். மின்னலே படத்தில் தொடங்கிய கௌதமின் திரைப்பயணம் என்றுமே ஏறுமுகம் தான். கௌதம் மேனனின் படங்களுக்கு மட்டுமன்றி, அவரது வசனத்திற்கும், அவரது குரலுக்கும் தனி ரசிகர் பட்டாளமே உள்ளது. தற்போது இயக்கம் மட்டுமன்றி நடிப்பிலும் கவனம் செலுத்தி, அடுத்தடுத்து பல படங்களில் கமிட்டாகி நடித்து வருகிறார்.

கௌதம் மேனன் இயக்கத்தில் இறுதியாக வெந்து தணிந்தது காடு திரைப்படம் வெளியானது. இதில் சிம்பு நாயகனாக நடித்திருந்தார். கௌதம் இயக்கத்தில் உருவான புதிய திரைப்படம் ஜோஷ்வா இமை போல் காக்க. பல ஆண்டுகளாக இத்திரைப்படம் வெளியாகாமல் இருந்தது. வேல்ஸ் பிலிம்ஸ் நிறுவனம் தயாரித்த இப்படத்தில், வருண் நாயகனாக நடித்திருந்தார். மேலும், கிருஷ்ணா, ராஹி, யோகி பாபு, மன்சூர் அலிகான், விசித்திரா உள்பட பலர் முக்கிய கதாபாத்திரங்களில் நடித்திருந்தனர்.

இந்த படத்தின் படப்பிடிப்பு கடந்த 2019-ம் ஆண்டே முடிந்தது. ஆனால், தவிர்க்க முடியாத பல காரணங்களால் இப்படத்தின் வௌியீடு தொடர்ந்து தள்ளிப்போனது. இந்நிலையில், அண்மையில் இப்படத்தின் பாடல்கள் தொடர்ந்து அடுத்தடுத்து வெளியாகின. அந்த வகையில், தற்போது படத்தின் டிரைலரை நடிகர் விஜய் சேதுபதி வெளியிட்டு உள்ளார். வரும் மார்ச் 1-ம் தேதி படம் திரைக்கு வருகிறது.