பாடகி சித்ராவுக்கு ஆதரவாக குரல் கொடுத்த நடிகை குஷ்பு
ராம நாமம் பாடுங்கள் என வீடியோ வெளியிட்டதற்கு பாடகி சித்ராவுக்கு எதிராக கண்டனங்கள் வலுத்து வரும் நிலையில், நடிகை குஷ்பு அவருக்கு ஆதரவு தெரிவித்து பேசியிருக்கிறார்.
உத்தரப் பிரதேசத்தில் பிரம்மாண்டமாக கட்டப்பட்டுள்ள ராமர் கோயிலின் குடமுழுக்கு நிகழ்ச்சி கோலாகலமாக நடைபெற உள்ளது. வரும் ஜனவரி 22-ம் தேதி குமுழுக்கு நடைபெற உள்ளது. இதற்கான ஏற்பாடுகளை ஸ்ரீராமஜென்மபூமி அறக்கட்டளை செய்து வருகிறது. இந்த கோயிலுக்கு கடந்த 2020-ம் ஆண்டு ஆகஸ்ட் மாதம் பிரதமர் நரேந்திர மோடி அடிக்கல் நாட்டி கட்டுமானத்தை தொடங்கி வைத்தார். இந்த விழாவை முன்னிட்டு அயோத்தியில் பாதுகாப்பு ஏற்பாடுகள் பலப்படுத்தப்பட்டு உள்ளன. விழாவில் பங்கேற்பதற்காக இந்தியா முழுவதும் உள்ள மாபெரும் தொழில் அதிபர்கள், அரசியல் பிரபலங்கள், சினிமா மற்றும் கிரிக்கெட் நட்சத்திரங்களுக்கு அழைப்பு விடுக்கப்பட்டுள்ளது.
இது தொடர்பாக சித்ரா பகிர்ந்த வீடியோ ஒன்று இணையத்தில் சர்ச்சையை ஏற்படுத்தி உள்ளது. அதில், அயோத்தியில் ராமர் பிரதிஷ்டை செய்யும் அன்று, வீடு முழுவதும் திருக்கார்த்திகை போல தீபம் ஏற்ற வேண்டும். ராம மந்திரத்தை ஜெபிக்க வேண்டும் எனவும் அவர் பதிவிட்டிருந்தார். இதற்கு பலரும் கண்டனங்கள் தெரிவித்து வருகின்றனர்.
இந்நிலையில், சித்ராவுக்கு ஆதரவாக நடிகை குஷ்பு பேசியிருக்கிறார். அவர் பதிவிட்டுள்ளதில், கம்யூனிஸ்ட் மற்றும் காங்கிரஸ் ஆளும் தேசங்களில் சகிப்புத் தன்மை குறைந்துவிட்டது. ஒருவரின் நம்பிக்கைக்கு மதிப்பளித்து அதை ஏற்றுக்கொள்ளும் தன்மை அனைவரிடமும் போய்விட்டது. சித்ரா பேசியது அவரது உரிமை என கூறியிருக்கிறார்.
