மார்வெலின் ‘அவெஞ்சர்ஸ்: டூம்ஸ்டே’ படத்தில் நடிக்கவில்லை: வதந்திகளுக்கு முற்றுப்புள்ளி வைத்தார் ஆண்ட்ரூ கார்ஃபீல்ட்!

பிரபல ஹாலிவுட் நடிகர் ஆண்ட்ரூ கார்ஃபீல்ட், மார்வெல் சினிமாட்டிக் யூனிவெர்ஸின் (MCU) வரவிருக்கும் ‘அவெஞ்சர்ஸ்: டூம்ஸ்டே’ (Avengers: Doomsday) திரைப்படத்தில் தான் நடிக்கவில்லை என்பதை மீண்டும் ஒருமுறை திட்டவட்டமாக மறுத்துள்ளார். அதேவேளையில், டாம் ஹாலண்டின் ‘ஸ்பைடர்மேன்: பிராண்ட் நியூ டே’ (Spider-Man: Brand New Day) திரைப்படத்தை இன்னும் தான் பார்க்கவில்லை என்றும் அவர் தெரிவித்துள்ளார்.

வெஸ்ட் ஹாலிவுட்டில் உள்ள இயக்குநர்கள் கில்ட் அரங்கில் நடைபெற்ற தனது புதிய வரலாற்றுத் திரைப்படமான ‘தி அப்ரைசிங்’ (The Uprising) படத்தின் பிரீமியர் நிகழ்ச்சியில் கலந்துகொண்ட போது அவர் ஊடகங்களிடம் இதனைக் கூறினார்.

டாம் ஹாலண்டின் ‘ஸ்பைடர்மேன்’ திரைப்படங்களின் மிகப்பெரிய வணிக வெற்றி குறித்தும், வசூல் சாதனை குறித்தும் அவரிடம் கேள்வி எழுப்பப்பட்டபோது, ஆண்ட்ரூ கார்ஃபீல்ட் கூறியதாவது:

“ஒரு திரைப்படம் வசூல் குவித்து, மக்கள் திரையரங்குகளுக்குச் சென்று அதனைப் பார்ப்பது என்பது நம்ப முடியாத அளவுக்கு அற்புதமான விஷயம். டாம் ஹாலண்டின் ‘ஸ்பைடர்மேன்’ மற்றும் அவரது மற்றொரு படமான ‘தி ஒடிசி’ (The Odyssey) ஆகியவற்றை இன்னும் நான் பார்க்கவில்லை; விரைவில் பார்க்க மிகவும் ஆவலாக இருக்கிறேன். நான் அந்தப் படங்களைப் பார்த்த பிறகு அவரைத் தொடர்புகொண்டு பாராட்டுத் தெரிவிப்பேன்” என்றார்.

மேலும், ஸ்பைடர்மேன் கதாபாத்திரம் குறித்துப் பேசுகையில், “அந்தக் கதாபாத்திரம் அனைவருக்குமானது; அது சாதாரணமானது மற்றும் நம்மில் ஒருவர்போன்றது. அந்தப் பாத்திரத்தில் எவரும் தங்களை எளிதில் அடையாளப்படுத்திக் கொள்ள முடியும்” என்று சிலாகித்தார்.

‘அவெஞ்சர்ஸ்: டூம்ஸ்டே’ திரைப்படத்தில் மீண்டும் ஸ்பைடர்மேன் கதாபாத்திரத்தில் ஆண்ட்ரூ கார்ஃபீல்ட் களம் இறங்குவதாக சமூக வலைதளங்களில் தொடர்ச்சியாகத் தகவல்கள் பரவி வந்தன. இதுகுறித்துக் கேள்வியெழுப்பியபோது, “நான் அதில் நடிக்கவில்லை” என்று அவர் நேரடியாகவும் தெளிவாகவும் பதிலளித்தார்.

முன்பு ‘ஸ்பைடர்மேன்: நோ வே ஹோம்’ (Spider-Man: No Way Home) திரைப்படத்தில் நடிப்பதை அவர் பலமுறை ரகசியமாகக் காப்பாற்றிவிட்டு, பின்னர் திரையில் தோன்றியதை நினைவுபடுத்திய செய்தியாளர்கள், தற்போதைய மறுப்பையும் நம்பலாமா என்று கேட்டனர். அதற்குச் சிரித்துக்கொண்டே அவர், “அது காலப்போக்கில் என்னவென்று உங்களுக்குத் தெரியவரும்” என்று மழுப்பலான பதிலைக் கூறினார்.

இயக்குநர் பால் கிரீன்கிராஸ் (Paul Greengrass) இயக்கத்தில் உருவாகியுள்ள ‘தி அப்ரைசிங்’ திரைப்படத்தில், ஆண்ட்ரூ கார்ஃபீல்ட் 1831-ஆம் ஆண்டு காலகட்டத்தில் மன்னர் இரண்டாம் ரிச்சர்டுக்கு எதிராகப் போராடும் கிளர்ச்சியாளர்களுக்குத் தலைமை தாங்கும் ஒரு கற்பனை பாத்திரத்தில் நடித்துள்ளார்.

இப்படத்தின் சண்டைக்காட்சிகளில் மாற்று நடிகர் (Body double) உதவியின்றி தாமே சொந்தமாக சாகசக் காட்சிகளில் நடித்ததாகக் குறிப்பிட்ட அவர், “எனக்கு இப்போது வயதாகிவிட்டது, இளையவனாக இல்லை. அதனால் படப்பிடிப்புக்குப் பிறகு முழங்கால்களில் ஐஸ் பேக்குகளை (Ice packs) வைத்துக் கொள்ள வேண்டியிருந்தது” என்று நகைச்சுவையுடன் கூறினார். பெரிய ஸ்டுடியோ படங்களையும், இது போன்ற வரலாற்று மற்றும் சுயாதீனப் படங்களையும் சமச்சீராகச் செய்து வருவதாக அவர் மேலும் தெரிவித்தார்.