மக்கள் மனதை வென்றதா போர்?… ரசிகர்கள் விமர்சனம் இதோ…

தமிழ் சினிமாவில் வளர்ந்து வரும் இரண்டு இளம் நடிகர்கள் அர்ஜூன் தாஸ் மற்றும் காளிதாஸ் ஜெயராம். தமிழில் அர்ஜூன் தாஸின் குரலுக்கென தனி ரசிகர் கூட்டமே உள்ளது. லோகேஷ் கனகராஜ் இயக்கிய கைதி படத்தின் மூலம் தமிழ் சினிமாவிக்கு அறிமுகமானவர் அர்ஜூன் தாஸ். வில்லனாக நடித்த அவர், தொடர்ந்து மாஸ்டர், விக்ரம் ஆகிய படங்களிலும் வில்லனாக நடித்திருந்தார். . தற்போது அர்ஜூன் தாஸ் மற்றும் காளிதாஸ் ஜெயராம் இருவரும் இணைந்து நடித்துள்ள திரைப்படம் தான் போர்.

இப்படத்தை டேவிட் பட இயக்குநர் பிஜோய் நம்பியார் இயக்கி இருக்கிறார். டி சீரிஸ் நிறுவனம் படத்தை தயாரித்து உள்ளது. தமிழில் அர்ஜூன் தாஸ் மற்றும் காளிதாஸ் ஜெயராமை வைத்தும் இந்தியில் ஹர்ஸ்வர்தன் ரனே, ஈஹான் பட்டை வைத்தும் ஒரே நேரத்தில் படமாக்கப்பட்டு உள்ளது. இப்படத்திற்கு இந்தியில் டங்கே என்று பெயர் வைக்கப்பட்டுள்ளது. இத்திரைப்படத்தின் முன்னோட்டம் மற்றும் பாடல்கள் ஏற்கனவே வெளியாகி வரவேற்பை பெற்ற நிலையில், போர் திரைப்படம் இன்று உலகம் முழுவதும் வெளியாகியுள்ளது.

போர் திரைப்படம் ரசிகர்கள் மத்தியில் நல்ல வரவேற்பை பெற்று வருகிறது. கல்லூரியில் ஜூனியர் மற்றும் சீனியர் என இரு வேறு கூட்டத்திற்கு இடையே ஏற்படும் பிரச்சனைகளை மையப்படுத்தி இத்திரைப்படம் உருவாகி உள்ளது. விறுவிறுப்பான திரைக்கதை படத்தின் பலமாக அமைந்துள்ளதாக ரசிகர்கள் தெரிவித்துள்ளனர். அர்ஜூன் தாஸ் மற்றும் காளிதாஸ் ஜெயராம் ஆகியோர் மட்டுமன்றி படத்தில் நடித்துள்ள நாயகிகளும் தங்களின் சிறந்த நடிப்பை வெளிப்படுத்தி இருப்பதாக தெரிவித்துள்ளனர். படத்திற்கு தூணாக பாடல்களும், பின்னணி இசையும் இருப்பதாகவும், அனைத்து பிஜிஎம் களும் ரசிக்கும் வகையில் உள்ளதாகவும் கூறியிருக்கின்றனர். இருப்பினும், படத்தில் வன்முறை காட்சிகள் அதிகமாக இருப்பதாகவும், தேவையில்லாத இடத்தில் சண்டைக் காட்சிகளை தவிர்த்திருக்கலாம் எனவும் ரசிகர்கள் விமர்சனம் தெரிவித்துள்ளனர்.