வணங்கான் படத்தின் டப்பிங் பணிகள் தொடக்கம்

அருண் விஜய் நடிக்கும் வணங்கான் படத்தின் டப்பிங் பணிகள் பூஜையுடன் தொடங்கியுள்ளன.

பாலா தற்போது இயக்கி வரும் திரைப்படம் வணங்கான். இதில் முன்பு சூர்யா, ஒப்பந்தமாகி நடித்து வந்த நிலையில் சில காரணங்களால் அவர் படத்திலிருந்து விலகி விட்டார். மேலும், கதாநாயகியாக க்ரித்தி ஷெட்டியும் ஒப்பந்தமாகியிருந்த நிலையில் அவரும் விலகினார். இதையடுத்து, சூர்யாவுக்கு மாற்றாக அருண் விஜய்யும், க்ரித்தி ஷெட்டிக்கு மாற்றாக ரோஷினி பிரகாஷூம் நடிக்கின்றனர். இத்திரைப்படத்தின் படப்பிடிப்பு குமரியில் தொடங்கி, பல்வேறு கட்டங்களாக பல இடங்களில் நடத்து திருவண்ணாமலையில் இறுதிக்கட்ட படப்பிடிப்பு விறுவிறுப்பாக நடைபெற்றது.

இப்படத்தை சுரேஷ் காமாட்சி மற்றும் பாலா இணைந்து தயாரிக்கின்றனர். சமுத்திரக்கனி, மிஷ்கின் உள்ளிட்டோரும் முக்கிய கதாபாத்திரங்களில் நடித்துள்ளனர். ஜி.வி பிரகாஷ் குமார் படத்திற்கு இசை அமைத்துள்ளார். படத்தில் அனைத்து பாடல்களுக்கும் வைரமுத்து வரிகள் எழுதியுள்ளார். இப்படத்தின் முதல் தோற்றம் கடந்த செப்டம்பர் மாதம் வெளியானது. அதில், அருண் விஜய் சேரும் சகதியுமாக ஒரு கையில் பெரியார் சிலையையும், மற்றொரு கையில் பிள்ளையார் சிலையுடனும் இருப்பது போல வடிவமைக்கப்பட்டிருந்தது. இந்த போஸ்டர் பலரது கவனத்தை ஈர்த்தது.

இந்நிலையில் வணங்கான் படத்தின் டப்பிங் பணிகள் பூஜையுடன் தொடங்கி உள்ளன. இதுதொடர்பான புகைப்படங்கள் சமூக வலைதளங்களில் வெளியாகி வரவேற்பை பெற்று வருகின்றன.