பிரேம்ஜிக்கு கல்யாணம்… புதிய அறிக்கை பகிர்ந்த வெங்கட் பிரபு…

கங்கை அமரனின் மகனும், வெங்கட் பிரபுவின் தம்பியுமான பிரேம்ஜி ஏராளமான திரைப்படங்களில் நகைச்சுவை வேடங்களில் நடித்துள்ளார். வெங்கட் பிரபு இயக்கிய பெரும்பாலான திரைப்படங்களில் இவர் நிச்சயம் இடம்பெற்றிருப்பார். தற்போது வெங்கட் பிரபு இயக்கத்தில் விஜய் நடித்து வரும் கோட் திரைப்படத்திலும், பிரேம்ஜி முக்கிய கதாபாத்திரத்தில் நடித்திருக்கிறார். தமிழ் சினிமாவில் முரட்டு சிங்கிள் நட்சத்திரமாக வருகிறார் பிரேம்ஜி.

இவருக்கு எப்போது திருமணம் என தொடர்ந்து பல கேள்விகள் எழுந்தபோதிலும், மௌனம் காத்து வந்தார். ஆனால், திடீரென பிரேம்ஜியின் திருமண அழைப்பிதழ் சமூக வலைதளங்களில் வெளியாகி டிரெண்டானது. இந்து என்பவரை திருமணம் செய்து கொள்ள இருப்பதாகவும், வரும் ஜூன் மாதம் 9-ம் தேதி திருத்தணி முருகன் கோயிலில் திருமணம் நடைபெற இருப்பதாகவும் அந்த அழைப்பிதழில் குறிப்பிடப்பட்டுள்ளது.

இந்த தகவல் உண்மையா இல்லையா என்ற சந்தேகம் ரசிகர்கள் மத்தியில் இருந்த நிலையில், தற்போது அது தொடர்பாக இயக்குநர் வெங்கட் பிரபு புதிய அறிக்கை ஒன்றை வௌியிட்டிருக்கிறார். அதில் பிரேம்ஜிக்கு ஜூன் 9-ம் தேதி திருமணம் என்றும், நெருங்கிய நண்பர்கள் மற்றும் உறவினர்கள் முன்னிலையில், தான் விரும்பிய பெண்ணை பிரேம்ஜி திருமணம் செய்துகொள்ள இருப்பதாகவும் குறிப்பிட்டுள்ளார். உறவினர் ஒருவர் திருமணப் பத்திரிகையை சமூக வலைதளத்தில் பதிவிட்டு விட்டதாகவும் அவர் குறிப்பிட்டிருந்தார். மேலும், மணப்பெண்ணின் புகைப்படம், திருமணத்திற்கு பிறகு வௌியிடப்படும் என்றும் அவர் தெரிவித்துள்ளார்.