புதிய இயக்குநர்களுடன் 17 படங்கள்… ஜி.வி. பிரகாஷ் நெகிழ்ச்சி..

தனது நடிப்பில் வெளியான திரைப்படங்களில் 17 திரைப்படங்கள் மட்டும் புதுமுக இயக்குநர்களுடன் பணியாற்றி இருப்பதாக நடிகர் ஜிவி பிரகாஷ் தெரிவித்துள்ளார்.

வெயில் திரைப்படத்தின் மூலம் இசையமைப்பாளராக அறிமுகம் ஆனவர் ஜி.வி.பிரகாஷ். கிட்டத்தட்ட 100 திரைப்படங்களுக்கு இவர் இசை அமைப்பாளராக பணியாற்றி இருக்கிறார். தமிழ், தெலுங்கு உள்பட பல மொழிகளில் இவர் பாடல்களும் பாடி இருக்கிறார். மேலும், தேசிய விருது உள்பட பல விருதுகளை அவர் வென்றுள்ளார். இசை, பாடல் மட்டுமன்றி நடிப்பிலும் ஆர்வம் செலுத்தும் ஜி.வி.பிரகாஷ், டார்லிங் திரைப்படத்தின் மூலம் நடிகராக அறிமுகமானார். இதுவரை 24 திரைப்படங்களில் ஜி.வி.பிரகாஷ் நடித்துள்ளார்.

அவரது நடிப்பில் இறுதியாக அடியே என்ற படம் வெளியானது. அடுத்து கள்வன், ரிபெல் ஆகிய படங்கள் வௌியீட்டுக்கு தயாராகி வருகின்றன. அவரது நடிப்பில் தற்போது உருவாகி இருக்கும் திரைப்படம் இடி முழக்கம். சீனு ராமசாமி படத்தை இயக்கி உள்ளார். அவருக்கு ஜோடியாக காயத்ரி ஷங்கர் நடித்துள்ளார். இத்திரைப்படத்தின் படப்பிடிப்பு முடிவடைந்து பின்னணி வேலைகள் நடைபெற்று வெளியீட்டுக்கு தயாராகி வருகிறது.

இந்நிலையில், சினிமாவில் வாய்ப்பு தேடி வரும் இயக்குநர்கள் மற்றும் நடிகர்களுக்காக ஸ்டார் டா என்ற செயலி உருவாக்கப்பட்டுள்ளது. இச்செயலியின் அறிமுக விழாவில் பங்கேற்று பேசிய இசையமைப்பாளர் ஜி.வி.பிரகாஷ், தான் நடித்த 23 படங்களில் 17 படங்கள் புதிதாக முதல் முறையாக இயக்குநராக அறிமுகமானவர்கள் என்றார். புதிய நடிகைகள், பாடர்கள், இயக்குநர்கள் என பலருடன் இதுவரை பணியாற்றி உள்ளேன். வெற்றிமாறன், ஏ.எல்.விஜய், அட்லீ உள்பட பல முன்னணி நடிகர்களுடன் பணியாற்றி இருக்கிறேன். மேலும், புது முக இயக்குநர்களுடன் பணியாற்றவும் பிடிக்கும் என அவர் தெரிவித்துள்ளார்.