ஓடிடி தளத்தில் வௌியாகியும் திரையரங்கில் 75 நாட்களை கடந்த இறுகப்பற்று

இறுகப்பற்று திரைப்படம் திரையரங்குகளில் 75 நாட்களை கடந்து ஓடி வருகிறது.

தெனாலிராமன், எலி ஆகிய படங்களை இயக்கியவர் யுவராஜ் தயாளன். இவரது இயக்கத்தில் உருவான அடுத்த திரைப்படம் இறுகப்பற்று. இப்படத்தில் விக்ரம் பிரபு, அவருக்கு ஜோடியாக ஷ்ரதா ஸ்ரீநாத் நடித்துள்ளார். மேலும் இதில் விதார்த் முக்கிய கதாபாத்திரத்தில் நடித்துள்ளார். விதாரத்துக்கு ஜோடியாக அபர்னதி நடித்துள்ளார். மேலும் ஶ்ரீ, சானியா ஐயப்பன் உள்ளிட்டோர் நடித்திருந்தனர். பொட்டன்ஷியல் ஸ்டுடியோஸ் நிறுவனத்தின் தயாரிப்பிலும் ஜஸ்டின் பிரபாகரன் இசையிலும் இப்படம் உருவாகியுள்ளது. கோகுல் பினாய் இதற்கு ஒளிப்பதிவு செய்திருந்தார்.

திருமண வாழ்வில் தம்பதியினர் இடையே ஏற்படும் உறவுச் சிக்கல்களை பேசும் இப்படம், ரசிகர்களிடையே நல்ல வரவேற்பை பெற்றது. 2015-ம் ஆண்டு வெளியான எலி படத்தை தொடர்ந்து கிட்டத்தட்ட 7 ஆண்டுகளுக்கு பிறகு இந்த வெற்றிப்படத்தை இயக்கி உள்ளார் யுவராஜ். வரவேற்பு மட்டுமன்றி வசூல் ரீதியாகவும் இத்திரைப்படம் வெற்றி பெற்றது. சூர்யா, கார்த்தி, பிரபுதேவா உள்பட திரை நட்சத்திரங்கள் பலரும் இறுகப்பற்று படத்தை வெகுவாக பாராட்டினர். அண்மையில் இத்திரைப்படம் ஓடிடி தளத்திலும் வெளியானது.

படம் ஓடிடி தளத்திற்கு வந்த பிறகும் கூட, திரையரங்குகளில் 75 நாட்களை கடந்து வெற்றிகரமாக ஓடி வருகிறது. இதனால், ரசிகர்கள் பலரும் படக்குழுவுக்கு வாழ்த்து தெரிவித்து வருகின்றனர்.