அட்லீ – அல்லு அர்ஜுன் படத்தின் ரிலீஸ் தேதி குறித்த அப்டேட் வெளியாகி உள்ளது.
தமிழ் சினிமாவில் ‘ராஜா ராணி’ படத்தின் மூலம் இயக்குனராக அறிமுகமான அட்லீ, விஜயை வைத்து ‘தெறி’, ‘மெர்சல்’, ‘பிகில்’ ஆகிய படங்களை இயக்கி ரசிகர்கள் மனதில் நீங்கா இடம் பிடித்தார். அடுத்தது பாலிவுட்டிலும் கால் பதித்து ‘ஜவான்’ என்ற மாபெரும் வெற்றி படத்தை இயக்கி புகழின் உச்சிக்கு சென்றார். தற்போது இவர், அல்லு அர்ஜுன் நடிப்பில் புதிய படம் ஒன்றை இயக்கி வருகிறார். இந்த படத்தின் படப்பிடிப்பு ஏற்கனவே மும்பையில் தொடங்கப்பட்டு விறுவிறுப்பாக நடைபெற்று வருகின்றன. இப்படமானது பிரம்மாண்ட பட்ஜெட்டில் ஹாலிவுட் தரத்தில் உருவாகிறது. 
சன் பிக்சர்ஸ் நிறுவனம் தயாரிக்கும் இந்த படத்தில் ராஷ்மிகா, ஜான்வி கபூர், மிர்ணாள் தாகூர் ஆகியோர் கதாநாயகிகளாக நடிப்பதாகவும், விஜய் சேதுபதி சிறப்பு தோற்றத்தில் நடிப்பதாகவும் சொல்லப்படுகிறது. ஆனால் அதிகாரப்பூர்வ அறிவிப்பு இதுவரை வெளியாகவில்லை. இதற்கிடையில் இந்த படத்திற்கு ICON என்று தலைப்பு வைக்கப்பட்டிருப்பதாகவும் தகவல் வெளியாகி வருகின்றன. அதே சமயம் இந்த படம் 2027 பொங்கல் தினத்தை முன்னிட்டு திரைக்கு வரும் என ஏற்கனவே தகவல் கசிந்தது. 
ஆனால் தற்போது கிடைத்த தகவல் என்னவென்றால், 2027 மார்ச் மாதம் 25ஆம் தேதியில் இந்த படத்தை திரைக்கு கொண்டு வர படக்குழு திட்டமிட்டு வருவதாக தெரிய வந்திருக்கிறது. மற்ற தகவல்கள் அடுத்தடுத்து வெளியாகும் என எதிர்பார்க்கப்படுகிறது.