இவானா நடித்துள்ள மதிமாறன்… ட்ரைலருக்கு அமோக வரவேற்பு…

இவானா, வெங்கட் செங்குட்டுவன் நடித்துள்ள மதிமாறன் படத்தின் ட்ரைலர் வெளியாகி வரவேற்பை பெற்று வருகிறது.

தமிழ் திரையுலகில் வளர்ந்து வரும் நடிகைகளில் குறிப்பிடத்தக்க ஒருவர் இவானா. தமிழில் பாலா இயக்கிய நாச்சியார் படத்தின் மூலம் இவர் நாயகியாக அறிமுகமானார். அதற்கு முன்னதாக மலையாளத்தில் ஒரு சில திரைப்படங்களில் முக்கிய கதாபாத்திரத்தில் நடித்திருக்கிறார். இதைத் தொடர்ந்து சிவகார்த்திகேயன் நடித்த ஹீரோ படத்திலும் முக்கிய வேடத்தில் நடித்திருப்பார். தமிழிலும் ஒரு சில படங்களில் குணச்சித்திர வேடத்தில் நடித்துள்ளார்.

இந்த நிலையில், கடந்த ஆண்டு பிரதீப் ரங்கநாதன் இயக்கி நடித்த லவ் டுடே திரைப்படத்தில் இவானா நாயகியாக நடித்திருப்பார். இத்திரைப்பம் மாபெரும் வெற்றி பெற்றதோடு, தெலுங்கு உள்ளிட்ட மொழிகளிலும் டப் செய்யப்பட்டு வெளியிடப்பட்டது. படத்திற்கு அமோக வரவேற்பு கிடைத்ததோடு, படத்தின் நடிகர் நடிகைகளுக்கும் நல்ல புகழ் கிடைத்தது. இதைத் தொடர்ந்து பல திரைப்படங்களில் இவானா நடித்து வருகிறார். கிரிக்கெட் நட்சத்திரம் தோனி தமிழில் முதன் முதலாக தயாரித்த எல்ஜிஎம் படத்தில் ஹரிஸ் கல்யாணுக்கு ஜோடியாக நடித்திருப்பார்.

இதையடுத்து, அவர் தற்போது நடித்துள்ள திரைப்படம் மதிமாறன். மந்த்ரா வீரபாண்டியன் இப்படத்தை இயக்குகிறார். இதில் இவானா உடன் வெங்கட் செங்குட்டுவன் முக்கிய கதாபாத்திரத்தில் நடித்துள்ளார். சமீபத்தில் படத்தின் பர்ஸ்ட் லுக் போஸ்டரை பட குழுவினர் வெளியிட்டிருந்தனர். அதைத்தொடர்ந்து தற்போது இந்த படத்தின் முன்னோட்டம் வெளியாகி உள்ளது.