‘கைதி’-ல இருக்குற மாதிரி ஒரு காட்சி ‘கூலி’ படத்துல இருக்கு….. லோகேஷ் கனகராஜ்!

தமிழ் சினிமாவில் லோகேஷ் கனகராஜ் மாநகரம் என்ற படத்தின் மூலம் இயக்குனராக அறிமுகமானார். ஆனால் அதைத் தொடர்ந்து இவரது இயக்கத்தில் வெளியான கைதி திரைப்படம் மிகப்பெரிய பிளாக்பஸ்டர் ஹிட் அடித்தது. இதைத்தொடர்ந்து மாஸ்டர், விக்ரம், லியோ என அடுத்தடுத்த வெற்றி படங்களை கொடுத்து ரசிகர்கள் மனதில் நீங்கா இடம் பிடித்துள்ளார். இவரது இயக்கத்தில் தற்போது கூலி திரைப்படம் உருவாகி இருக்கிறது. சூப்பர் ஸ்டார் ரஜினிகாந்தின் 171 வது படமான இந்த படத்தை சன் பிக்சர்ஸ் நிறுவனம் தயாரிக்க அனிருத் இதற்கு இசையமைக்கிறார். கிரிஷ் கங்காதரன் இதன் ஒளிப்பதிவு பணிகளை கவனிக்கிறார். இந்த படத்தில் நடிகர் ரஜினி நெகட்டிவ் ஷேடட் ரோலில் நடித்துள்ளதாக சொல்லப்படுகிறது. அதே சமயம் நாகார்ஜுனா இப்படத்தில் வில்லனாக நடித்திருக்கிறார் எனவும் ஏற்கனவே தகவல்கள் வெளியானது. அடுத்தது இந்த படத்தில் ஸ்ருதிஹாசன், சத்யராஜ், உபேந்திரா, சௌபின் சாஹிர் ஆகியோரும் முக்கிய கதாபாத்திரங்களில் நடித்திருக்கின்றனர். மிகுந்த எதிர்பார்ப்புடன் உருவாகும் இந்த படத்தின் படப்பிடிப்பு ஏற்கனவே நிறைவடைந்த நிலையில் படமானது 2025 ஆகஸ்ட் 14 அன்று திரைக்கு வரும் என படக்குழுவினர் சார்பில் அதிகாரப்பூர்வமாக அறிவிக்கப்பட்டுள்ளது. இந்நிலையில் சமீபத்தில் நடந்த நிகழ்ச்சி ஒன்றில் கலந்துகொண்ட லோகேஷ் கனகராஜ் கூலி படம் குறித்த சில தகவல்களை பகிர்ந்துள்ளார். அதன்படி அவர், “கைதி படத்தில் இருக்கும் உணவு காட்சியை போல் கூலி படத்திலும் ரஜினியுடனான காட்சி ஒன்று இருக்கிறது. நாங்கள் ரஜினியின் எந்த காட்சிகளையும் ரீ கிரியேட் செய்யவில்லை. ஆனால் இந்த படத்தில் பெரும்பாலான இடங்களில் விண்டேஜ் ரஜினியை பார்க்கலாம்” என்று கூறியுள்ளார்.