இன்றைய ஓடிடி கார்னர்… மார்கழி திங்கள், கிடா வெளியீடு…

இன்றைய ஓடிடி கார்னர் பக்கத்தில் இரு நட்சத்திரங்களின் இரு வேறு திரைப்படங்கள் வெளியாகியின்றன.

மனோஜ் பாரதிராஜா இயக்கத்தில் உருவாகியுள்ள திரைப்படம் மார்கழி திங்கள். மனோஜ் பாரதிராஜா இயக்குனராக அறிமுகமாகியுள்ள இந்த படத்தில் பாரதிராஜா முன்னணி கதாபாத்திரத்தில் நடித்துள்ளார். மேலும் அறிமுக நடிகர்களான சாம் செல்வன் மற்றும் ரக்ஷனா இருவரும் பாரதிராஜா உடன் இணைந்து முக்கிய கதாபாத்திரத்தில் நடித்துள்ளனர். இயக்குனர் சுசீந்திரன் இதில் வில்லனாக நடித்துள்ளார். அது மட்டும் இல்லாமல் இயக்குனர் சுசீந்திரன் தான் இப்படத்தை வெண்ணிலா ப்ரொடக்ஷன்ஸ் நிறுவனத்தின் சார்பில் தயாரித்துள்ளார். படத்திற்கு இளையராஜா இசை அமைத்திருக்கிறார். இத்திரைப்படம் கடந்த அக்டோபர் மாதம் திரையரங்குகளில் வெளியாகி ரசிகர்களிடையே வரவேற்பை பெற்றது. இந்நிலையில், இத்திரைப்படம் டென்ட்கொட்டா ஓடிடி தளத்தில் வெளியாகி இருக்கிறது.

இதேபோல, அறிமுக இயக்குநர் ரா.வெங்கட் இயக்கி இருக்கும் திரைப்படம் கிடா. படத்தில் பூ ராமு, மற்றும் காளி வெங்கட் ஆகியோர் முதன்மை கதாபாத்திரங்களில் நடித்துள்ளனர். மாஸ்டர் தீபன், பாண்டியம்மா, லோகி, கமலி ஆகியோர் முக்கி வேடங்களில் நடித்து இருக்கின்றனர். தமிழ் சினிமாவை உயர்த்தி பிடிக்கும் படைப்பாக கிடா திரைப்படம் உருவாகி இருக்கிறது.மதுரை அருகே உள்ள ஒரு கிராமத்தில் வாழும் ஒரு சிறுவனுக்கும், அவனது தாத்தாவிற்கும் உள்ள உறவை சொல்லும் கதை கிடா திரைப்படம். இந்த திரைப்படம் முழுவதுமாக முடிந்தவடைந்த நிலையில், திரைக்கு வருவதற்கு முன்னதாகவே கோவா திரைப்பட விழாவில் தேர்வாகி அசத்தியுள்ளது. கோவா திரைப்படவிழாவில் இந்தியன் பனோரமா பிரிவில் தேர்வாகியுள்ள மூன்று தமிழ்ப் படங்களில், ஒரு படமாக கிடா படம் தேர்வாகியது. அமேசான் பிரைம் தளத்தில் கிடா திரைப்படம் இன்று வௌியாகி உள்ளது.