சத்யராஜ், வசந்த ரவி கூட்டணியின் வெப்பன் திரைப்படம் நாளை ஓடிடியில் வெளியாக இருக்கிறது.
கடந்த ஆண்டு ஆகஸ்ட் மாதம் ரஜினி நடிப்பில் வெளியான ஜெயிலர் திரைப்படத்தில் ரஜினிக்கு மகனாக நடித்து ரசிகர்கள் மத்தியில் பிரபலமானவர் வசந்த் ரவி. அதற்கு முன்னதாக இவர் சில படங்களில் நடித்திருந்தாலும் ஜெயிலர் திரைப்படத்தில் இவருடைய கதாபாத்திரம் மிகப்பெரிய அளவில் பேசப்பட்டது. இந்நிலையில் வசந்த் ரவி, தமிழ் சினிமாவில் முக்கிய நடிகர்களில் ஒருவராக வலம் வரும் சத்யராஜுடன் இணைந்து வெப்பன் எனும் திரைப்படத்தில் நடித்திருந்தார். மேலும் இவர்களுடன் இணைந்து தான்யா ஹோப், ராஜீவ் மேனன், ராஜீவ் பிள்ளை ஆகியோர் நடித்திருந்தனர். இந்த படத்தை மில்லியன் ஸ்டுடியோ நிறுவனம் தயாரிக்க குகன் சென்னியப்பன் படத்தை இயக்கியிருந்தார். 
இந்த படத்திற்கு ஜிப்ரான் இசையமைத்திருந்தார். பிரபு ராகவ் இந்த படத்தின் ஒளிப்பதிவு பணிகளை கவனித்திருந்தார். இந்த படம் கடந்த ஜூன் மாதம் 7ம் தேதி வெளியாகி ரசிகர்கள் மத்தியில் கலவையான விமர்சனங்களை பெற்றது. இந்நிலையில் படம் நாளை (ஜூலை 26) ஆஹா தமிழ் ஓடிடி தளத்தில் வெளியாக இருப்பதாக அறிவிக்கப்பட்டுள்ளது.