அரண்மனை 4 படத்தின் ஓடிடி ரிலீஸ்… வெளியானது புது அப்டேட்…

அரண்மனை 4-ம் பாகத்தின் ஓடிடி ரிலீஸ் குறித்த தகவல் வெளியாகி உள்ளது

தமிழ் சினிமாவின் திகில் படங்கள் வரிசையில் 2014ம் ஆண்டு வெளியாகி, ரசிகர்களிடம் மிகுந்த வரவேற்பை பெற்றது சுந்தர்.சி-ன் அரண்மனை திரைப்படம். காமெடி கலந்த ஹாரர் திரைப்படமாக வெளியான இப்படத்திற்கு கிடைத்த வரவேற்பின் காரணமாக அடுத்தடுத்து இரண்டு மற்றும் மூன்றாம் பாகங்களை உருவாக்கினார் இயக்குனர் சுந்தர்.சி. முதல் இரண்டு பாகங்கள் ஹிட் அடித்த நிலையில் மூன்றாம் பாகம் எதிர்பார்த்த வெற்றியை கொடுக்கவில்லை இருப்பினும் அரண்மனை நான்காம் பாகத்திற்கான பணிகளை தொடங்கினார் இயக்குனர் சுந்தர் சி.

அரண்மனை 4-ம் பாகத்தில் கோவை சரளா, யோகி பாபு, தமன்னா, ராஷி கண்ணா, சந்தோஷ் பிரதாப், விடிவி கணேஷ் ஆகியோர் முக்கிய கதாபாத்திரங்களில் நடித்துள்ளனர். அவ்னி சினிமாக்ஸ் மற்றும் பென்ஸ் மீடியா ஆகிய நிறுவனங்கள் படத்தை தயாரித்து உள்ளன. மேலும், படத்திற்கு ஹிப்ஹாப் ஆதி இசை அமைத்துள்ளார்.

இத்திரைப்படம் கடந்த மே மாதம் 3-ம் தேதி திரையரங்குகளில் வௌியாகி 25 நாட்களை கடந்து ரசிகர்கள் மத்தியில் ஏகபோக வரவேற்பை பெற்று வருகிறது. அதுமட்டுமன்றி 100 கோடி ரூபாயை தாண்டி வசூல் ஈட்டியிருக்கிறது. இந்நிலையில், அரண்மனை 4-ம் பாகத்தின் ஓடிடி குறித்து தகவல் வெளியாகி உள்ளது. அதன்படி, டிஸ்னி பிளஸ் ஹாட்ஸ்டார் தளத்தில் தமிழ், தெலுங்கு, கன்னடம் மற்றும் மலையாள மொழிகளில் வெளியாகும் என்று அதிகாரப்பூர்வமாக அறிவிக்கப்பட்டுள்ளது. மேலும், ஜூன் 12-ம் தேதி வௌியாக இருப்பதாக கூறப்படுகிறது.