அதிர்ச்சிப் புகார்: திண்டுக்கல் மாவட்டம் ஒட்டன்சத்திரத்தைச் சேர்ந்த 85 வயது மூதாட்டி சரோஜா, தனது பெயரிலிருந்த ரூ.1.20 கோடி மதிப்பிலான வீடு, 200 பவுன் தங்க நகைகள் மற்றும் ரூ.90 லட்சம் பணத்தைப் பறித்துக்கொண்டு தன்னைத் துரத்தியடித்த இளைய மகன் மீது மாவட்ட காவல் கண்காணிப்பாளரிடம் புகார் அளித்துள்ளார்.
சொத்து ஏமாற்று வேலை: கணவர் இறந்த பிறகு தனக்குச் சொந்தமான பணத்தை வைத்துக் கொண்டிருந்த தாயிடம், இளைய மகன் சண்முகம் மற்றும் அவரது மனைவி பத்மபிரியா ஆகியோர் சொத்துக்களை ஏமாற்றி எழுதி வாங்கியதுடன், திண்டுக்கல் வீட்டையும் ரகசியமாக விற்றுள்ளனர்.
கொடூரச் செயல்: உடல் நலக்குறைவால் பாதிக்கப்பட்ட தாயாரை ஒருவேளை சாப்பாடு கூடக் கொடுக்காமல் அறையில் அடைத்து வைத்துத் துன்புறுத்திவிட்டு வீட்டை விட்டு வெளியேற்றியுள்ளனர்.
எஸ்பியிடம் மனு: மூத்த மகன் சுப்பிரமணியால் மீட்கப்பட்டு சிகிச்சைப் பெற்ற மூதாட்டி சரோஜா, இன்று திண்டுக்கல் மாவட்ட காவல் கண்காணிப்பாளர் ஜெயக்குமாரிடம் நேரில் புகார் மனு அளித்து உரிய நடவடிக்கை எடுக்கக் கோரியுள்ளார்.
விரிவானச் செய்தி:
திண்டுக்கல் மாவட்டம் ஒட்டன்சத்திரத்தைச் சேர்ந்தவர் காலியப்பன். இவர் அப்பகுதியில் வெண்ணெய் தொழில் மற்றும் பைனான்ஸ் தொழில் செய்து வந்தவர். இவருக்கு சுப்பிரமணி, சண்முகம் (56) மற்றும் மகள் ஜெயலட்சுமி என மூன்று பிள்ளைகள் உள்ளனர்.
கடந்த 12 ஆண்டுகளுக்கு முன்பு காலியப்பன் உடல்நலக்குறைவால் உயிரிழந்த நிலையில், அவரது இளைய மகனான சண்முகம் தனது தாயார் சரோஜாவைத் (85) தான் பார்த்துக் கொள்வதாகக் கூறி அவருடனேயே வசித்து வந்துள்ளார்.
நகைகள் மற்றும் பணத்தைப் பறித்த மகன்:
காலியப்பன் மறைவுக்குப் பிறகு, வெண்ணெய் மற்றும் பைனான்ஸ் தொழிலில் முதலீடு செய்யப்பட்டிருந்த பணத்தை சரோஜா வசூல் செய்து ரூ.90 லட்சத்தைத் தனியாக வைத்திருந்தார்.
இந்நிலையில், சண்முகம் மற்றும் அவரது மனைவி பத்மபிரியா (50) ஆகியோர் சரோஜாவிடமிருந்து சிறுகச் சிறுக 200 பவுன் தங்க நகைகள் மற்றும் அந்த ரூ.90 லட்சம் பணத்தை மிரட்டிப் பறித்துக் கொண்டதாகக் கூறப்படுகிறது.
ஏமாற்றி விற்கப்பட்ட வீடு:
இதற்கிடையில், சரோஜா தனது பெயரில் திண்டுக்கல்லில் இருந்த 1 கோடியே 20 லட்சம் ரூபாய் மதிப்புள்ள வீட்டை தனது மகளான ஜெயலட்சுமிக்குத் தான செட்டில்மெண்ட் செய்து கொடுத்துள்ளார்.
ஆனால், அதனை ஜெயலட்சுமிக்குத் தெரியாமல் அந்த தான செட்டில்மெண்டை ரத்து செய்த சண்முகம், அந்த சொத்தை தனது பெயருக்கு எழுதி வாங்கியதுடன், திண்டுக்கல்லைச் சேர்ந்த மற்றொரு நபருக்கும் விற்பனை செய்துள்ளார்.
அறையில் அடைத்து வைத்து சித்ரவதை:
சொத்து மற்றும் நகைகளைப் பறித்துக்கொண்டதோடு நின்றுவிடாமல், சரோஜா உடல்நிலை பாதிக்கப்பட்டு அவதிப்பட்ட காலத்தில் அவரை முறையாகக் கவனிக்காமல் ஒரு அறையில் அடைத்து வைத்துள்ளனர். ஒருவேளை சோறு கூடப் போடாமல் கொடுமைப்படுத்திய அவர்கள், ஒரு கட்டத்தில் முதியவரான தாயாரை வீட்டைவிட்டும் துரத்தி அடித்துள்ளனர்.
இதையறிந்த சரோஜாவின் மூத்த மகனான சுப்பிரமணி, உடனடியாகத் தாயாரை மீட்டு உரிய மருத்துவச் சிகிச்சை அளித்து தற்போது தனது பாதுகாப்பில் கவனித்து வருகிறார்.
எஸ்பியிடம் நேரில் புகார்:
தன்னிடம் இருந்த அனைத்துச் சொத்துக்களையும், நகைகளையும் ஏமாற்றிப் பறித்துக்கொண்டு தன்னைத் தவிக்கவிட்ட இளைய மகன் சண்முகம் மற்றும் அவரது மனைவி பத்மபிரியா மீது சட்டப்படி நடவடிக்கை எடுக்கக் கோரி, பாதிக்கப்பட்ட மூதாட்டி சரோஜா இன்று (செப். 16) திண்டுக்கல் மாவட்ட காவல் கண்காணிப்பாளர் அலுவலகத்திற்கு வருகை தந்தார்.
பின்னர் அவர் மாவட்ட காவல் கண்காணிப்பாளர் ஜெயக்குமாரிடம் நேரில் புகார் மனு அளித்தார்.
இச்சம்பவம் ஒட்டன்சத்திரம் பகுதியில் பெரும் பரபரப்பையும் சோகத்தையும் ஏற்படுத்தியுள்ளது.