சிதம்பரம் அருகே கரிக்குப்பம் மற்றும் அரியலூர் மாவட்டம் ஜெயங்கொண்டம் அருகே காரைக்குறிச்சி பகுதிகளில் தலித் மக்களுக்கு எதிராக நடைபெற்றதாகக் கூறப்படும் சாதிய வன்கொடுமை சம்பவங்களில் தொடர்புடையவர்கள் மீது விரைந்து நடவடிக்கை எடுக்க வேண்டும் என தமிழ்நாடு அரசுக்கு விடுதலைச் சிறுத்தைகள் கட்சி கோரிக்கை விடுத்துள்ளது.
இதுதொடர்பாக விசிக தலைவர் தொல். திருமாவளவன் வெளியிட்டுள்ள அறிக்கையில், இரு பகுதிகளிலும் தலித் மக்களுக்கு எதிராக நடைபெற்றதாகக் கூறப்படும் சம்பவங்கள் குறித்து காவல்துறையின் நடவடிக்கையை விமர்சித்துள்ளார்.
கரிக்குப்பம் சம்பவம் குறித்து புகார்
சிதம்பரம், பரங்கிப்பேட்டை அருகே உள்ள கரிக்குப்பம் கிராமத்தில் விநாயகர் சதுர்த்தியையொட்டி தலித் மக்கள் கடலூரிலிருந்து பிள்ளையார் சிலையை டிராக்டரில் கொண்டு சென்றபோது, குறிப்பிட்ட ஒரு தெரு வழியாக வரக்கூடாது என சிலர் எதிர்ப்பு தெரிவித்ததாக அறிக்கையில் கூறப்பட்டுள்ளது.
அப்போது தலித் மக்களை தாக்க முயன்றதாகவும், காவல்துறையினர் சம்பந்தப்பட்டவர்கள் மீது நடவடிக்கை எடுக்காமல் மாற்றுப்பாதையில் செல்லுமாறு அறிவுறுத்தியதாகவும் திருமாவளவன் குற்றம்சாட்டியுள்ளார்.
மேலும், காவல்துறையினர் முன்னிலையிலேயே தலித் மக்களை இழிவாகப் பேசியதாகவும், இதுதொடர்பாக புகார் அளிக்கப்பட்டும் ஆரம்பத்தில் வழக்குப்பதிவு செய்யப்படவில்லை என்றும் அவர் தெரிவித்துள்ளார்.
அடுத்த நாள் அதே பகுதியில் பள்ளிக்குச் சென்ற தலித் மாணவர்களை செருப்பை தலையில் வைத்துக்கொண்டு செல்லுமாறு அச்சுறுத்தியதாகவும், சாதியை குறிப்பிட்டு இழிவுபடுத்தியதாகவும் புகார் அளிக்கப்பட்டதாக அறிக்கையில் கூறப்பட்டுள்ளது. இந்த புகாரின் அடிப்படையில் வழக்குப்பதிவு செய்யப்பட்டுள்ளதாகவும், ஆனால் இதுவரை யாரும் கைது செய்யப்படவில்லை என்றும் திருமாவளவன் தெரிவித்துள்ளார்.
மேலும், தலித் மக்கள் மீதும் எதிர்வழக்கு பதிவு செய்யப்பட்டுள்ளதாக அவர் குற்றம்சாட்டியுள்ளார்.
காரைக்குறிச்சியிலும் நடவடிக்கை கோரிக்கை
அரியலூர் மாவட்டம் ஜெயங்கொண்டம் அருகே காரைக்குறிச்சியில் விசிக விளம்பர பதாகை சேதப்படுத்தப்பட்டதாகவும், அதில் தொடர்புடையவர்கள் மீது நடவடிக்கை எடுக்காமல், அதே பகுதியில் முளைப்பாரி எடுத்துச் சென்ற தலித் இளைஞர்கள் மீது வழக்குப்பதிவு செய்யப்பட்டுள்ளதாகவும் திருமாவளவன் தெரிவித்துள்ளார்.
பதாகை சேதப்படுத்தப்பட்ட இடத்தில் தலித் இளைஞர்கள் முழக்கமிட்டதாகவும், அதன் அடிப்படையில் தலித் சிறுவர்கள் மீது புகார் அளிக்கப்பட்டு வழக்குப்பதிவு செய்யப்பட்டதுடன் கைது நடவடிக்கையும் மேற்கொள்ளப்பட்டதாகவும் அவர் குற்றம்சாட்டியுள்ளார்.
விசிக கண்டனம்
கரிக்குப்பம் மற்றும் காரைக்குறிச்சி ஆகிய இரு பகுதிகளிலும் காவல்துறையினர் நடந்து கொண்டதாகக் கூறப்படும் விதத்தையும், சம்பவங்களில் தொடர்புடையதாகக் கூறப்படும் சாதியவாதக் குழுக்களின் செயல்பாடுகளையும் விடுதலைச் சிறுத்தைகள் கட்சி வன்மையாகக் கண்டிப்பதாக திருமாவளவன் தெரிவித்துள்ளார்.
மேலும், சாதிய வன்கொடுமைகளில் ஈடுபட்டதாகக் கூறப்படும் அனைவரையும் உடனடியாக கைது செய்து சட்டப்படி நடவடிக்கை எடுக்க வேண்டும் என தமிழ்நாடு அரசுக்கு விசிக சார்பில் அவர் கோரிக்கை விடுத்துள்ளார்.