காவல்துறை, வருவாய்த்துறை அதிகாரிகள் மீது விசாரணை நடத்த அரசுக்குப் பரிந்துரை
கடந்த 2024-ஆம் ஆண்டு ஜூன் மாதம் கள்ளக்குறிச்சி மாவட்டம் கருணாபுரம் பகுதியில் விஷச்சாராயம் அருந்தி சுமார் 67 பேர் பரிதாபமாக உயிரிழந்த சம்பவம் ஒட்டுமொத்த தமிழகத்தையே உலுக்கியது. இச்சம்பவம் குறித்து விசாரணை நடத்த அமைக்கப்பட்ட ஓய்வுபெற்ற நீதிபதி கோகுல்தாஸ் தலைமையிலான ஒருநபர் ஆணையம், தனது இறுதி அறிக்கையை அரசிடம் தாக்கல் செய்துள்ளது. அந்த அறிக்கையில், மதுவிலக்கு அமலாக்கப் பிரிவு, காவல்துறை மற்றும் வருவாய்த்துறை அதிகாரிகளின் அலட்சியமும் கடமை தவறிய போக்குமே இந்தப் பெருஞ்சோகத்திற்கு முதன்மையான காரணம் எனத் தெரிவிக்கப்பட்டுள்ளது.
மெத்தனால் கலப்பால் நேர்ந்த கொடூரம்
இக்கொடூரச் சம்பவம் தொடர்பாக வழக்குப்பதிவு செய்த காவல்துறையினர், விஷச்சாராய விற்பனை மற்றும் கடத்தலில் ஈடுபட்ட முக்கியக் குற்றவாளியான கோவிந்தராஜ் (என்கிற கண்ணுக்குட்டி), அவரது மனைவி விஜயா, சகோதரர் தாமோதரன் மற்றும் பரமசிவம் உட்பட மொத்தம் 21 பேரைக் கைது செய்து சிறையில் அடைத்தனர். இச்சம்பவம் தொடர்பான வழக்கு தற்போது சி.பி.ஐ. விசாரணையில் இருந்து வருகிறது.
நீதிபதி கோகுல்தாஸ் ஆணையம் சமர்ப்பித்துள்ள அறிக்கையில்:
“சென்னையிலிருந்து கொண்டுவரப்பட்ட உயிர்கொல்லி வேதியியல் பொருளான மெத்தனாலுடன், மேலும் சில திரவங்களைக் கலந்து அருந்தியதே 67 பேரின் உயிரிழப்பிற்கு முக்கியக் காரணமாக அமைந்துள்ளது” என்று சுட்டிக்காட்டப்பட்டுள்ளது.
அதிகாரிகளின் அலட்சியமும் கடமை தவறலும்
ஆணையத்தின் அறிக்கையில் துறை சார்ந்த அதிகாரிகளின் செயல்பாடுகள் குறித்து மிகக் கடுமையான விமர்சனங்கள் முன்வைக்கப்பட்டுள்ளன,
முன்னெச்சரிக்கை இன்மை: பாதிப்புச் சம்பவம் வெளிச்சத்திற்கு வந்தவுடனேயே, கள்ளச்சாராயம் புழங்கும் பகுதிகளில் அதிகாரிகளால் உடனடி எச்சரிக்கை எதுவும் வழங்கப்படவில்லை. இந்த முன்னெச்சரிக்கை நடவடிக்கையை எடுக்கத் தவறியதே பலி எண்ணிக்கை அதிகரிக்க மிக முக்கியக் காரணம்.
கடுமையான நடவடிக்கை இன்மை: காவல் மற்றும் வருவாய்த்துறை அதிகாரிகள் கள்ளச்சாராய புழக்கத்திற்கு எதிராக ஆரம்பத்திலேயே கடுமையான நடவடிக்கைகளை எடுக்காததன் விளைவே இந்தப் பேரழிவிற்கு வழிவகுத்தது.
பொறுப்பான அதிகாரிகள்: கள்ளக்குறிச்சி மாவட்டம் சங்கராபுரம், கச்சிராப்பாளையம் காவல் நிலையங்களில் பணிபுரிந்த காவல்துறையினர், திருக்கோவிலூர் மதுவிலக்கு அமலாக்கப் பிரிவில் பணிபுரிந்த காவல் உதவி ஆய்வாளர்கள், காவல் கண்காணிப்பாளர்கள் மற்றும் அப்பகுதிகளின் கிராம உதவியாளர்கள், கிராம நிர்வாக அலுவலர்கள் (VAO), வருவாய் ஆய்வாளர்கள், வட்டாட்சியர்கள் ஆகியோர் இந்தச் சம்பவத்திற்கு நேரடியாகப் பொறுப்பானவர்கள்.
துறை சார்ந்த அதிகாரிகள் மீது விசாரணை நடத்தப் பரிந்துரை
அதிகாரிகளின் அலட்சியப் போக்கைக் சுட்டிக்காட்டியுள்ள நீதிபதி கோகுல்தாஸ் ஆணையம், கடந்த 2023 முதல் 2024 வரை விழுப்புரம் மற்றும் கள்ளக்குறிச்சி மாவட்டங்களில் பணியாற்றிய தொடர்புடைய காவல்துறை, வருவாய்த்துறை மற்றும் மதுவிலக்கு அமலாக்கத்துறை சார்ந்த அதிகாரிகள் மீது முறையான விசாரணை தொடங்கப்பட வேண்டும் என அரசுக்குப் பரிந்துரை செய்துள்ளது. இந்த ஆணையத்தின் அறிக்கை தாக்கல் செய்யப்பட்டுள்ளதைத் தொடர்ந்து, சம்பந்தப்பட்ட அதிகாரிகள் மீது அரசு எடுக்கப்போகும் அடுத்தகட்ட நடவடிக்கை என்ன என்ற எதிர்பார்ப்பு பரவலாக எழுந்துள்ளது.
கோவையில் பயங்கரம்: பாரில் வெடித்த மோதல் – நாற்காலிகளால் தாக்கி கொண்ட மதுப்பிரியர்கள்!