திருநெல்வேலி மாவட்டம் கல்லூர் அருகே இயங்கி வரும் பிரபலத் தனியார் பேப்பர் மில்லில் (காகித ஆலை) இன்று பிற்பகலில் எதிர்பாராதவிதமாக ஏற்பட்ட பயங்கர தீ விபத்து காரணமாக அப்பகுதி முழுவதும் கரும்புகை சூழ்ந்து பெரும் பரபரப்பை ஏற்படுத்தியுள்ளது.
மளமளவெனப் பரவிய தீ:
கல்லூர் அருகே உள்ள காகித ஆலையின் சேமிப்புக் கிடங்குப் பகுதியில் வைக்கப்பட்டிருந்த காகிதத் துகள்கள் மற்றும் பண்டல்களில் எதிர்பாராதவிதமாகத் தீ பற்றியது. உலர் காகிதங்கள் என்பதால் தீ கணநேரத்தில் மளமளவெனப் பரவி, ஆலை முழுவதும் கொழுந்துவிட்டு எரியத் தொடங்கியது. இதனால் ஆலையிலிருந்து வெளியேறிய அடர்ந்த கரும்புகை விண்ணை முட்டும் அளவுக்குப் பரவியது.
தீயணைப்பு வீரர்கள் தீவிரப் போராட்டம்:
விபத்து குறித்து உடனடியாகத் தீயணைப்புத் துறைக்குத் தகவல் தெரிவிக்கப்பட்டது. சம்பவ இடத்திற்கு நெல்லை மற்றும் அதன் சுற்றுவட்டாரத்தைச் சேர்ந்த 3 தீயணைப்பு நிலையங்களில் இருந்து தீயணைப்பு வாகனங்களுடன் வீரர்கள் விரைந்து வந்தனர்.
இருப்பினும், தீயின் வீரியம் அதிகமாக இருந்ததால், அதை உடனடியாகக் கட்டுப்படுத்த முடியாமல் வீரர்கள் சிரமப்பட்டனர். இதையடுத்த கூடுதல் தீயணைப்பு வாகனங்களும், நூற்றுக்கும் மேற்பட்ட பணியாளர்களும் வரவழைக்கப்பட்டுத் தீயை அணைக்கும் பணி முடுக்கி விடப்பட்டுள்ளது.
ஜேசிபி எந்திரங்கள் மூலம் மீட்பு நடவடிக்கை:
தீ மேலும் பரவாமல் தடுப்பதற்காக, ஆலையில் எரியாமல் உள்ள மற்ற காகிதப் பண்டல்களைப் பிரித்து அகற்றும் பணியில் பல ஜேசிபி எந்திரங்கள் ஈடுபடுத்தப்பட்டுள்ளன. அசம்பாவிதங்களைத் தவிர்க்கும் வகையில் ஆலையில் உள்ள அனைத்து இயந்திரங்களின் செயல்பாடுகளும் உடனடியாக நிறுத்தப்பட்டு மின் இணைப்புகளும் துண்டிக்கப்பட்டன.
கிராம மக்களுக்கு மூச்சுத் திணறல் அச்சம்:
பேப்பர் மில்லில் இருந்து தொடர்ந்து வெளியேறி வரும் கரும்புகை கல்லூர் மற்றும் அதன் சுற்றுவட்டாரக் கிராமங்களை முழுமையாக ஆக்கிரமித்துள்ளது. இதனால் கண் எரிச்சல் மற்றும் மூச்சுத் திணறல் ஏற்படும் அபாயம் நிலவுவதால் பொதுமக்கள் பெரும் அவதிக்குள்ளாகியுள்ளனர்.
சம்பவ இடத்தில் காவல் துறையினரும், வருவாய்த் துறையினரும் முகாமிட்டு மீட்புப் பணிகளை நேரில் பார்வையிட்டு விரைவுபடுத்தி வருகின்றனர். தீயைக் கட்டுக்குள் கொண்டுவரும் பணிகள் தொடர்ந்து தீவிரமாக நடைபெற்று வருகின்றன.
கோவையில் நீதிமன்ற உத்தரவுடன் பாஜகவின் 160 அடி தேசியக்கொடி பேரணி: திரளானோர் பங்கேற்பு!