தீபாவளி பண்டிகையை முன்னிட்டு மதுரை மாவட்டம் திருமங்கலம் ஆட்டுச் சந்தையில் ஆடுகள் விற்பனை களைகட்டியது. பல்வேறு மாவட்டங்களில் இருந்து வந்த வியாபாரிகளும், பொதுமக்களும் போட்டி போட்டுக்கொண்டு ஆடுகளை வாங்கிச் சென்றனர். ஒரே நாளில் ரூ.7 கோடிக்கு மேல் ஆடுகள் விற்பனையானதாக சந்தை குத்தகைதாரர்கள் தெரிவித்துள்ளனர்.
திருமங்கலம் ஆட்டுச் சந்தை வாரந்தோறும் வெள்ளிக்கிழமைகளில் நடைபெறுவது வழக்கம். இந்த நிலையில், வரும் 8-ம் தேதி தீபாவளி பண்டிகை கொண்டாடப்பட உள்ளதால், அசைவ உணவு பிரியர்கள் இறைச்சி வாங்குவது அதிகரிக்கும் என எதிர்பார்க்கப்படுகிறது.
இதையொட்டி தென் மாவட்டங்களின் முக்கிய ஆட்டுச் சந்தைகளில் ஒன்றான திருமங்கலம் சந்தையில் செம்மறி ஆடுகள் மற்றும் வெள்ளாடுகள் என 30 ஆயிரத்துக்கும் மேற்பட்ட ஆடுகள் விற்பனைக்காக கொண்டுவரப்பட்டன.
திருமங்கலம் சந்தையில் விற்பனை செய்யப்படும் ஆடுகளின் இறைச்சி சுவை மிகுந்ததாக இருப்பதால், மதுரை, திண்டுக்கல், தேனி, விருதுநகர், நெல்லை, தூத்துக்குடி, தென்காசி உள்ளிட்ட பல்வேறு மாவட்டங்களில் இருந்து ஏராளமான வியாபாரிகள் ஆடுகளை வாங்குவதற்காக வந்திருந்தனர்.
ரூ.10 ஆயிரம் முதல் ரூ.25 ஆயிரம் வரை விற்பனை
தீபாவளி பண்டிகையை முன்னிட்டு ஆடுகளின் விலை வழக்கத்தை விட அதிகரித்திருந்தது. ஒரு ஆடு ரூ.10 ஆயிரம் முதல் ரூ.25 ஆயிரம் வரை விற்பனை செய்யப்பட்டது.
கடந்த ஆண்டை விட விலை உயர்வு
இதுகுறித்து ஆட்டு வியாபாரிகள் கூறுகையில், கடந்த ஆண்டை விட இந்த ஆண்டு ஆடுகளின் விலை ரூ.1,000 முதல் ரூ.3,000 வரை உயர்ந்துள்ளதாக தெரிவித்தனர்.
கடந்த ஆண்டு கிலோ ரூ.750-க்கு விற்பனை செய்யப்பட்ட ஆடுகள், இந்த ஆண்டு ரூ.950 முதல் ரூ.1,000 வரை விற்பனை செய்யப்படுகின்றன. தீபாவளி பண்டிகை என்பதால் விலை உயர்ந்திருந்தாலும் வேறு வழியின்றி ஆடுகளை வாங்கிச் செல்வதாகவும், இதனால் வாடிக்கையாளர்களுக்கு இறைச்சி விலையை கூடுதலாக நிர்ணயிக்க வேண்டிய சூழல் ஏற்பட்டுள்ளதாகவும் வியாபாரிகள் தெரிவித்தனர்.
ஆடுகளை வளர்ப்பதற்கான செலவுகள் அதிகரித்துள்ளதே விலை உயர்வுக்கு முக்கிய காரணம் என ஆட்டு உரிமையாளர்கள் தெரிவித்தனர்.
அதிகாலை முதலே குவிந்த வியாபாரிகள் – ரூ.7 கோடிக்கு மேல் விற்பனை
அதிகாலை 2 மணி முதலே திருமங்கலம் ஆட்டுச் சந்தையில் விற்பனை தொடங்கி விறுவிறுப்பாக நடைபெற்றது. ஒரே நாளில் மட்டும் ரூ.7 கோடிக்கு மேல் ஆடுகள் விற்பனையாகியுள்ளதாக சந்தை குத்தகைதாரர்கள் தெரிவித்தனர்.
ஆட்டுச் சந்தையை வேறு இடத்திற்கு மாற்ற வியாபாரிகள் கோரிக்கை
திருமங்கலம் ஆட்டுச் சந்தைக்கு வாரந்தோறும் ஆயிரக்கணக்கான வியாபாரிகள் வருகை தரும் நிலையில், தற்போதைய சந்தையில் போதுமான இடவசதி இல்லை என வியாபாரிகள் வேதனை தெரிவித்துள்ளனர்.
கடும் நெரிசல் காரணமாக ஆடுகளை விற்பனை செய்வதில் சிரமம் ஏற்படுவதாகவும், எனவே ஆட்டுச் சந்தையை வேறு இடத்திற்கு மாற்றி, தேவையான அடிப்படை வசதிகளை நகராட்சி நிர்வாகம் ஏற்படுத்தித் தர வேண்டும் என்றும் வியாபாரிகள் கோரிக்கை விடுத்துள்ளனர்.
ஓசூரில் தொழிற்சாலை கட்டுமானப் பணியின்போது கட்டிடம் இடிந்து விபத்து – 3 பேர் உயிரிழப்பு!