முதலமைச்சருக்கு மிரட்டல் விடுக்கும் வகையில் பேசியதாகக் கைது செய்யப்பட்டுள்ள விளாத்திகுளம் தொகுதி தி.மு.க. எம்.எல்.ஏ. ஜி.வி. மார்க்கண்டேயனின் ஜாமீன் மனு மீதான தீர்ப்பை சென்னை உயர்நீதிமன்றம் தேதி குறிப்பிடாமல் ஒத்திவைத்துள்ளது.
வழக்கில் பின்னணி!
தூத்துக்குடி மாவட்டம், கோவில்பட்டியில் நடைபெற்ற வாக்காளர்களுக்கு நன்றி தெரிவிக்கும் கூட்டத்தில் பேசிய விளாத்திகுளம் தொகுதி தி.மு.க. எம்.எல்.ஏ. ஜீ.வி. மார்க்கண்டேயன், முதலமைச்சருக்கு மிரட்டல் விடுக்கும் வகையிலும் அவதூறாகவும் பேசியதாகக் கூறப்பட்டது. இச்சம்பவம் தொடர்பாகத் தூத்துக்குடி மாவட்டக் குற்றப்பிரிவு போலீசார் அவரை அதிரடியாகக் கைது செய்தனர்.
இதனைத் தொடர்ந்து, அவர் தாக்கல் செய்த ஜாமீன் மனுவைத் தூத்துக்குடி நீதிமன்றம் தள்ளுபடி செய்திருந்தது. இதனால், தன்னைச் சிறையில் அடைத்த உத்தரவை ரத்து செய்யக் கோரியும், ஜாமீன் வழங்கக் கோரியும் மார்க்கண்டேயன் தரப்பில் சென்னை உயர்நீதிமன்றத்தில் மனுத் தாக்கல் செய்யப்பட்டது.
நீதிமன்றத்தில் வாதங்கள்!
இந்த மனு நீதிபதி ஜி.கே. இளந்திரையன் முன்பு விசாரணைக்கு வந்தது. மனுதாரர் தரப்பில் ஆஜரான மூத்த வழக்கறிஞர் பி.வில்சன் வாதாடுகையில்:
முறையான விசாரணைக்கு அழைக்காமல் நோட்டீஸ் அனுப்பாமல் நேரடியாகக் கைது செய்யப்பட்டுள்ளதாகவும், இது உச்ச நீதிமன்ற விதிமுறைகளின் மீறல் என்றும் வாதிட்டார்.
குற்றம் புரிந்ததற்கான முறையான காரணங்கள் ஏதுமின்றி மாஜிஸ்திரேட் இயந்திரத்தனமாகக் கைது உத்தரவு பிறப்பித்துள்ளதாகக் குறிப்பிட்ட அவர், பொது அமைதிக்குப் பங்கம் விளைவிக்கும் வகையிலோ அல்லது உள்நோக்கத்துடனேயோ அவர் பேசவில்லை என்றார்.
மேலும், மனுதாரர் இரண்டு முறை பேரூராட்சித் தலைவராகவும் (Chairman), மூன்று முறை சட்டமன்ற உறுப்பினராகப் பணியாற்றியவர் என்பதையும், வழக்கமான அரசியல் விமர்சனமாகவே அதைக் குறிப்பிட்டார் என்றும் வாதிட்டார்.
காவல்துறை மற்றும் அரசு தரப்பு வாதம்:
அரசு தலைமை குற்றவியல் வழக்கறிஞர் ஜான் சத்யன் மற்றும் காவல்துறை தரப்பில் ஆஜரான வழக்கறிஞர்கள் வாதிடுகையில்:
எம்.எல்.ஏ. மார்க்கண்டேயன் பேசிய பேச்சுக்கள் சமூக வலைதளங்களில் வைரலாகப் பரவி சலசலப்பை ஏற்படுத்தியதாகத் தெரிவித்தனர்.
கைது செய்வதற்கான காரணங்களில் உரிய திருப்தி அடைந்த பிறகே போலீசார் கைது நடவடிக்கையை மேற்கொண்டுள்ளதாகவும், கைது செய்வதற்கு முன்பாகவே இரண்டு முறை உரிய தகவல்கள் வழங்கப்பட்டு அவை வீடியோ பதிவு செய்யப்பட்டுள்ளதாகவும் வாதிட்டனர்.
இரு தரப்பு வாதங்களையும் முழுமையாகக் கேட்டறிந்த நீதிபதி ஜி.கே. இளந்திரையன், விளாத்திகுளம் எம்.எல்.ஏ. மார்க்கண்டேயனின் ஜாமீன் மனு மீதான தீர்ப்பை தேதி குறிப்பிடாமல் ஒத்திவைத்து உத்தரவிட்டுள்ளார்.