டெல்லி ராம்லீலா மைதானத்தில் நவம்பர் 1-ம் தேதி நடைபெறும் இந்தியா கூட்டணியின் பேரணிக்கு ஆதரவு தெரிவித்துள்ள காக்ரோச் ஜனதா கட்சி (CJP), அந்தப் பேரணியில் நேரடியாகப் பங்கேற்காது என்று அதன் நிறுவனர் அபிஜீத் டிப்கே தெரிவித்துள்ளார்.
தேர்தல் வாக்காளர் பட்டியல் சிறப்பு தீவிர திருத்தம் (SIR) மற்றும் தலைமைத் தேர்தல் ஆணையர் ஞானேஷ் குமார் தொடர்பான விவகாரங்களை முன்வைத்து, இந்தியா கூட்டணி கட்சிகள் இந்தப் பேரணியை நடத்துகின்றன.
மம்தா பானர்ஜியைச் சந்தித்த அபிஜீத் டிப்கே
இந்தப் பேரணிக்கு முன்னதாக, டெல்லியில் திரிணமூல் காங்கிரஸ் தலைவரும் மேற்கு வங்க முன்னாள் முதல்வருமான மம்தா பானர்ஜியை அபிஜீத் டிப்கே சந்தித்தார். அப்போது, தங்களது இளைஞர் இயக்கப் போராட்டங்களுக்கு ஆதரவு அளித்ததற்காக அவருக்கு நன்றி தெரிவித்தார்.
நீட் வினாத்தாள் கசிவு விவகாரம் தொடர்பாக டெல்லி ஜந்தர் மந்தரில் நடைபெற்ற தங்களது முதல் போராட்டத்தின்போது மம்தா பானர்ஜி ஆதரவளித்ததாகவும், சிஜேபி நிர்வாகிகளான சவுரவ் தாஸ் மற்றும் அசுதோஷ் ரங்கா ஆகியோர் டெல்லி காவல்துறையால் கைது செய்யப்பட்டபோதும் அவர் தங்களுக்கு ஆதரவாக இருந்ததாகவும் டிப்கே தெரிவித்தார்.
பேரணிக்கு ஆதரவு; பங்கேற்பதில் விலகல் ஏன்?
இந்தியா கூட்டணியின் பேரணிக்கு ஆதரவு அளிப்பதாகத் தெரிவித்த டிப்கே, அதில் தங்களது அமைப்பு நேரடியாகப் பங்கேற்காது என்றும் விளக்கினார்.
காக்ரோச் ஜனதா கட்சி ஒரு சுயாதீன அமைப்பு என்றும், அரசியல் சார்பற்ற நடுநிலைத் தளமாகத் தொடர்ந்து செயல்பட விரும்புவதாகவும் அவர் கூறினார். எனவே, குறிப்பிட்ட அரசியல் கூட்டணியின் பேரணியில் நேரடியாகக் கலந்துகொள்வதைத் தவிர்ப்பதாகத் தெரிவித்தார்.
மேலும், வாக்குத் திருட்டு எனக் கூறப்படும் தேர்தல் முறைகேடுகளுக்கு எதிராகப் போராடும் எந்த அமைப்புக்கும் தங்களது ஆதரவு இருக்கும் என்றும் அவர் குறிப்பிட்டார்.
சிஜேபி இளைஞர்களைப் பாராட்டிய மம்தா
இந்தச் சந்திப்புக்குப் பிறகு பேசிய மம்தா பானர்ஜி, சிஜேபி இளைஞர்களின் போராட்டங்களைப் பாராட்டினார். அவர்கள் இந்த இயக்கத்தின் முன்னோடிகள் என்றும், தொடர்ந்து போராடி வருவது மகிழ்ச்சியளிப்பதாகவும் தெரிவித்தார்.
மேலும், அபிஜீத் டிப்கே உள்ளிட்ட சிஜேபி நிர்வாகிகள் மேற்கு வங்கத்துக்கு வருகை தந்து நிகழ்ச்சிகளை நடத்துமாறும் அவர் அழைப்பு விடுத்தார்.
இந்தியா கூட்டணியின் பேரணிக்கு ஆதரவு தெரிவித்தபோதிலும், அமைப்பின் சுயாதீன மற்றும் நடுநிலை அடையாளத்தைப் பாதுகாக்கும் நோக்கில் அதில் நேரடியாகப் பங்கேற்கப்போவதில்லை என்ற சிஜேபியின் நிலைப்பாடு அரசியல் வட்டாரத்தில் கவனம் பெற்றுள்ளது.
மம்தா பானர்ஜியை நேரில் சந்தித்த அபிஜித் தீப்கே: இந்தியா கூட்டணி பேரணிக்கு ஆதரவு!