தலைமைத் தேர்தல் ஆணையர் ஞானேஷ் குமார் பதவி விலக வேண்டும் உள்ளிட்ட 3 கோரிக்கைகளை முன்வைத்து, காக்ரோச் ஜனதா கட்சி (Cockroach Janta Party – CJP) மீண்டும் போராட்டத்தை அறிவித்துள்ளது. ஞானேஷ் குமார் பதவி விலகுவதற்கு 48 மணி நேரம் அவகாசம் வழங்கியுள்ள அந்த அமைப்பு, கோரிக்கைகள் நிறைவேற்றப்படாவிட்டால் நாடு முழுவதும் போராட்டம் நடத்தப்படும் என தெரிவித்துள்ளது.
ஞானேஷ் குமார் பதவி விலக வேண்டும்
டெல்லியில் நடைபெற்ற செய்தியாளர் சந்திப்பில் காக்ரோச் ஜனதா கட்சியின் நிறுவனர் அபிஜீத் திப்கே உள்ளிட்டோர் தங்களது கோரிக்கைகளை முன்வைத்தனர். தலைமைத் தேர்தல் ஆணையர் ஞானேஷ் குமார் 48 மணி நேரத்திற்குள் பதவி விலக வேண்டும் என்றும், அவ்வாறு நடைபெறாவிட்டால் நாடு முழுவதும் போராட்டம் தொடங்கப்படும் என்றும் அபிஜீத் திப்கே தெரிவித்தார்.
3 முக்கிய கோரிக்கைகள்
காக்ரோச் ஜனதா கட்சி முன்வைத்துள்ள கோரிக்கைகளில் முதலாவதாக, தலைமைத் தேர்தல் ஆணையர் ஞானேஷ் குமார் பதவி விலக வேண்டும் என்பதாகும்.
இரண்டாவது கோரிக்கையாக, வாக்காளர் பட்டியல் தொடர்பான சிறப்புத் தீவிர திருத்தம் (SIR) நடவடிக்கையை நிறுத்தி வைக்க வேண்டும் என்றும், நடைபெற உள்ள தேர்தல்களை தற்காலிகமாக நிறுத்த வேண்டும் என்றும் அந்த அமைப்பு வலியுறுத்தியுள்ளது.
மூன்றாவது கோரிக்கையாக, தேர்தல் ஆணையத்தின் செயல்பாடுகள் மற்றும் SIR தொடர்பான விவகாரங்களை விசாரிக்க சுயாதீன விசாரணை ஆணையம் அமைக்க வேண்டும் என்றும், தேர்தல் ஆணையத்தின் அமைப்பு தொடர்பாக புதிய சட்டம் கொண்டுவர வேண்டும் என்றும் CJP தெரிவித்துள்ளது.
தேர்தல் ஆணையத்தில் கருத்து வேறுபாடு தொடர்பான சர்ச்சை
இந்த கோரிக்கைகளுக்கு பின்னணியாக, தேர்தல் ஆணையத்தில் SIR தொடர்பான முடிவுகள் குறித்து ஏற்பட்டதாக வெளியான கருத்து வேறுபாடு முக்கிய காரணமாக உள்ளது.
தேர்தல் ஆணையர்களான சுக்பீர் சிங் சந்து மற்றும் விவேக் ஜோஷி ஆகியோர் கடந்த 10 மாதங்களில் தேர்தல் பட்டியல் தொடர்பான சில முடிவுகள் மற்றும் உத்தரவுகள் குறித்து குறைந்தது 14 முறை ஆட்சேபனை தெரிவித்ததாக இந்தியன் எக்ஸ்பிரஸ் வெளியிட்ட விசாரணை அறிக்கையை மேற்கோள்காட்டி செய்திகள் வெளியாகியுள்ளன.
இதில் வாக்காளர் பெயர் சேர்ப்பு, நீக்கம், மீண்டும் சேர்த்தல், படிவம் 6-ல் மாற்றங்கள் மற்றும் வாக்காளர் பட்டியல் தரவுத்தளத்திற்கான அணுகல் உள்ளிட்ட விவகாரங்கள் தொடர்பாக கேள்விகள் எழுப்பப்பட்டதாக தெரிவிக்கப்பட்டுள்ளது.
தேர்தல் ஆணையத்தின் விளக்கம்
இதனிடையே, SIR தொடர்பான அனைத்து முடிவுகளும் மூன்று தேர்தல் ஆணையர்களின் ஒப்புதலுடனும் ஒருமித்த கருத்துடனும் எடுக்கப்பட்டதாக இந்தியத் தேர்தல் ஆணையம் ஏற்கனவே விளக்கம் அளித்துள்ளது. அமைப்புகளுக்குள் முடிவெடுக்கும் நடைமுறையில் கருத்து வேறுபாடுகள் ஏற்படுவது இயல்பானது என்றும் தேர்தல் ஆணையம் தெரிவித்துள்ளது.
மீண்டும் போராட்டம் நடத்த எச்சரிக்கை
ஞானேஷ் குமார் 48 மணி நேரத்திற்குள் பதவி விலகாவிட்டால் நாடு முழுவதும் போராட்டம் நடத்தப்படும் என்று CJP அறிவித்துள்ளது. டெல்லியில் மீண்டும் ஜந்தர் மந்தரில் போராட்டம் நடத்தப்படும் என்றும் அந்த அமைப்பு தெரிவித்துள்ளது.
தற்போது தேர்தல் ஆணையத்தின் செயல்பாடுகள், SIR நடவடிக்கை மற்றும் வாக்காளர் பட்டியல் தொடர்பான விவகாரங்கள் குறித்து பல்வேறு அரசியல் கட்சிகளும் அமைப்புகளும் கருத்துகளை வெளியிட்டு வரும் நிலையில், காக்ரோச் ஜனதா கட்சியின் இந்த புதிய அறிவிப்பு விவாதத்தை மேலும் அதிகரித்துள்ளது.