உத்தரப் பிரதேசத்தில் எதிர்வரும் 2027 சட்டமன்றத் தேர்தலுக்கான தொகுதிப் பங்கீட்டில் காங்கிரஸ் கட்சி 181 இடங்களைக் கோருவதாக வெளியாகியுள்ள தகவல், எதிர்க்கட்சிகளின் கூட்டணி ஒற்றுமை குறித்த விவாதத்தை ஏற்படுத்தியுள்ளது. சமாஜ்வாதி கட்சியுடன் தொகுதிப் பங்கீட்டில் காங்கிரஸ் காட்டும் அணுகுமுறை குறித்து ‘தி இந்து’ ஆங்கில நாளிதழின் தலையங்கம் பல்வேறு கேள்விகளை எழுப்பியுள்ளது.

சோனியா காந்தியின் புத்தக வெளியீட்டு நிகழ்ச்சி தொடர்பாக ராகுல் காந்தி விடுத்த அழைப்பை தமிழக முதலமைச்சர் மு.க.ஸ்டாலின் நிராகரித்ததாக வெளியான செய்திகள் அரசியல் வட்டாரத்தில் பேசப்பட்டு வரும் நிலையில், எதிர்க்கட்சிகளின் ஒற்றுமை மற்றும் தொகுதிப் பங்கீட்டில் காங்கிரஸின் அணுகுமுறை மீண்டும் விவாதப் பொருளாகியுள்ளது.
2022 தேர்தலில் காங்கிரஸுக்கு கிடைத்தது 2 இடங்கள் மட்டுமே!
உத்தரப் பிரதேசத்தில் கடந்த 2022-ம் ஆண்டு நடைபெற்ற சட்டமன்றத் தேர்தலில் மொத்தமுள்ள 403 தொகுதிகளில் 399 இடங்களில் காங்கிரஸ் தனித்துப் போட்டியிட்டது. ஆனால், வெறும் 2 தொகுதிகளில் மட்டுமே வெற்றி பெற்றது.
மறுபுறம், 347 தொகுதிகளில் போட்டியிட்ட சமாஜ்வாதி கட்சி 111 இடங்களைக் கைப்பற்றி பிரதான எதிர்க்கட்சியாக உருவெடுத்தது.
2024 நாடாளுமன்றத் தேர்தலில் இந்தியா கூட்டணி அமைந்த பிறகு, உத்தரப் பிரதேசத்தில் மொத்தமுள்ள 80 தொகுதிகளில் 43 இடங்களை சமாஜ்வாதி மற்றும் காங்கிரஸ் கூட்டணி கைப்பற்றியது.
இந்தச் சூழலில், 2027 சட்டமன்றத் தேர்தலுக்கான தொகுதிப் பங்கீட்டில் காங்கிரஸ் 181 தொகுதிகளைக் கேட்பதாக வெளியாகியுள்ள தகவல் அரசியல் விவாதத்தை ஏற்படுத்தியுள்ளது. கடந்த தேர்தல் செயல்பாடுகளுடன் ஒப்பிடும்போது இந்தக் கோரிக்கை அதிகமானது என தலையங்கம் விமர்சிக்கிறது.
பீகார், தமிழகத்திலும் கூட்டணிப் பிரச்சினைகள்!
காங்கிரஸ் கட்சியின் தொகுதிப் பங்கீட்டு அணுகுமுறை உத்தரப் பிரதேசத்தில் மட்டுமின்றி, பிற மாநிலங்களிலும் கூட்டணிக் கட்சிகளுடன் சிக்கல்களை ஏற்படுத்தியுள்ளதாக விமர்சனங்கள் முன்வைக்கப்படுகின்றன.
பீகாரில் ராஷ்ட்ரிய ஜனதா தளம் கட்சியுடன் தொகுதிப் பங்கீடு தொடர்பாக ஏற்பட்ட நீண்ட இழுபறி மற்றும் கருத்து வேறுபாடுகள் கூட்டணியின் தேர்தல் செயல்பாட்டைப் பாதித்ததாக அரசியல் விமர்சனங்கள் தெரிவிக்கின்றன.
தமிழகத்தில் திமுக கூட்டணியில் ஆட்சியிலும் அதிகாரத்திலும் பங்கு வேண்டும் என்ற கோரிக்கையை காங்கிரஸ் முன்வைத்தது. தொடர்ந்து நடைபெற்ற பேச்சுவார்த்தைகளுக்குப் பிறகு 28 சட்டமன்றத் தொகுதிகளும் ஒரு மாநிலங்களவை இடமும் காங்கிரஸுக்கு ஒதுக்கப்பட்டன.
தேர்தலுக்குப் பிறகு கூட்டணியின் அரசியல் நிலைப்பாடுகள் தொடர்பாக எழுந்த கருத்து வேறுபாடுகளும் விவாதங்களை ஏற்படுத்தின.
களத்தில் உழைப்பு இல்லாமல் தொகுதிப் பேரமா?
மாநிலக் கட்சிகள் தங்களது செல்வாக்கை நிலைநிறுத்துவதற்காக அடிமட்டத்தில் தொடர்ந்து பணியாற்றி வரும் நிலையில், காங்கிரஸ் கட்சி தொகுதிப் பங்கீட்டில் அதிக இடங்களைக் கோருவதில் கவனம் செலுத்துவதாக ‘தி இந்து’ தலையங்கம் விமர்சிக்கிறது.
மக்களின் பிரச்சினைகளுக்காக வீதியில் இறங்கிப் போராடி, கட்சியின் அடித்தளத்தை வலுப்படுத்துவதற்குப் பதிலாக மாநிலக் கட்சிகளின் ஆதரவை நம்பி தேர்தலில் போட்டியிடும் அணுகுமுறை குறித்தும் கேள்வி எழுப்பப்பட்டுள்ளது.
ராகுல் காந்தி தேசிய அளவில் முன்னெடுக்கும் யாத்திரைகள் மற்றும் அரசியல் பிரசாரங்கள் மாநில அளவிலான காங்கிரஸ் அமைப்புகளில் அதே அளவிலான செயல்பாடுகளாக மாறுகிறதா என்பதையும் தலையங்கம் சுட்டிக்காட்டுகிறது.
