புதுடெல்லியில் 50 ஆண்டுகள் பழமையான மாணவர் விடுதி கட்டிடம் இடிந்து விழுந்த விபத்தில் உயிரிழந்தவர்களின் எண்ணிக்கை 7 ஆக உயர்ந்துள்ளது. இச்சம்பவம் தொடர்பாக மாநகராட்சி அதிகாரிகள் 5 பேர் சஸ்பெண்ட் செய்யப்பட்டுள்ளனர்.
விபத்தின் பின்னணி மற்றும் மீட்புப் பணிகள் ஆரம்பத்தில் இந்த விபத்தில் 3 பேர் உயிரிழந்ததாகத் தகவல் வெளியான நிலையில், சிகிச்சைப் பலனின்றி மேலும் 4 பேர் உயிரிழந்தனர். இதனால் பலி எண்ணிக்கை 7 ஆக அதிகரித்துள்ளது. மேலும் 5 பேர் மருத்துவமனையில் தீவிர சிகிச்சை பெற்று வருகின்றனர். அவர்களில் சிலரின் நிலைமை கவலைக்கிடமாக இருப்பதால், பலி எண்ணிக்கை இன்னும் உயரக்கூடும் என அஞ்சப்படுகிறது.
இடிபாடுகளுக்குள் இன்னும் சிலர் சிக்கியிருக்கலாம் என்ற சந்தேகத்தின் அடிப்படையில் 2-வது நாளாக மீட்புப் பணிகள் தீவிரமாக நடைபெற்று வருகின்றன.
காரணம் என்ன? சம்பவ இடத்தை நேரில் ஆய்வு செய்த முதல்வர் ரேகா குப்தா, கட்டிடத்தின் அடித்தளத்தில் தண்ணீர் தேங்கியதும், பழமையான அந்த கட்டிடத்தில் சரியான திட்டமிடல் இன்றி மேற்கொள்ளப்பட்ட மறுசீரமைப்புப் பணிகளுமே இந்த விபத்திற்குக் காரணம் எனத் தெரிவித்தார்.
அரசு எடுத்த அதிரடி நடவடிக்கைகள்:
நீதி விசாரணை: விபத்து குறித்து விரிவான நீதி விசாரணை நடத்த உத்தரவிடப்பட்டுள்ளது.
அதிகாரிகள் சஸ்பெண்ட்: அலட்சியமாகச் செயல்பட்ட மாநகராட்சி துணை ஆணையர், செயல் பொறியாளர், கண்காணிப்புப் பொறியாளர், உதவிப் பொறியாளர் மற்றும் இளநிலைப் பொறியாளர் ஆகிய 5 பேர் உடனடியாகப் பணி இடைநீக்கம் செய்யப்பட்டுள்ளனர்.
உரிமையாளர் கைது: கட்டிட உரிமையாளரான 81 வயது ஹரிராம் குப்தா ராஜஸ்தானின் பிவாடி நகரில் கைது செய்யப்பட்டார். மேலும், அவரது மனைவி மற்றும் மகனையும் காவல்துறையினர் கைது செய்து விசாரணை நடத்தி வருகின்றனர்.