வளர்ந்து வரும் தொழில்நுட்பத் துறைகளில் உலகத் தலைமைத்துவத்தை நோக்கி இந்தியா வேகமாக முன்னேறி வருவதாக பிரதமர் நரேந்திர மோடி தெரிவித்துள்ளார். சிப்கள் முதல் கப்பல்கள் வரையிலும், செயற்கை நுண்ணறிவு (AI) மற்றும் தரவு மையங்கள் முதல் குவாண்டம் கம்ப்யூட்டிங் வரையிலும் இந்தியா தனது திறன்களை விரிவுபடுத்தி வருவதாக அவர் பெருமிதம் தெரிவித்தார்.
கர்நாடக மாநிலத்தில் ரூ.15,600 கோடி மதிப்பிலான உள்கட்டமைப்புத் திட்டங்களைத் தொடங்கி வைத்து, சில திட்டங்களை நாட்டுக்கு அர்ப்பணித்தும், புதிய திட்டங்களுக்கு அடிக்கல் நாட்டியும் பிரதமர் மோடி உரையாற்றினார். பெங்களூருவில் உள்ள இந்திய மேலாண்மைக் கழகத்தில் (IIM) நடைபெற்ற நிகழ்ச்சியில் அவர் இந்தக் கருத்துகளைத் தெரிவித்தார்.
எரிசக்தி பாதுகாப்பை வலுப்படுத்துவது அவசியம்!
ஈரான் மற்றும் வளைகுடா பிராந்தியத்தைச் சுற்றியுள்ள பகுதிகளில் மோதல்கள் தொடர்ந்து நடைபெற்று வரும் சூழலில், நாட்டின் எரிசக்தி பாதுகாப்பை வலுப்படுத்துவது மிகவும் அவசியம் என்று பிரதமர் மோடி குறிப்பிட்டார்.
கடந்த பத்தாண்டுகளில் எரிபொருள் உற்பத்தி மற்றும் சேமிப்புத் திறனை விரிவுபடுத்தியதுடன், சூரியசக்தி, நீர்மின்சாரம் மற்றும் காற்றாலை மின்சார உற்பத்தி ஆகியவற்றிலும் இந்தியா அதிக முதலீடுகளைச் செய்துள்ளதாக அவர் தெரிவித்தார்.
300 ஜிகாவாட்டைத் தாண்டிய புதுப்பிக்கத்தக்க எரிசக்தி திறன்!
இந்தியாவின் புதுப்பிக்கத்தக்க எரிசக்தி உற்பத்தித் திறன் 300 ஜிகாவாட்டைத் தாண்டியுள்ளதாக பிரதமர் கூறினார். நாட்டின் எரிசக்தித் தேவைகளைப் பூர்த்தி செய்வதற்கும், வெளிநாட்டு எரிபொருள் சார்பைக் குறைப்பதற்கும் புதுப்பிக்கத்தக்க எரிசக்தித் திட்டங்கள் முக்கியப் பங்காற்றி வருவதாக அவர் சுட்டிக்காட்டினார்.
60 லட்சத்துக்கும் அதிகமான வீடுகளில் சூரியசக்தி அமைப்புகள்!
பிரதமரின் சூரியசக்தி இலவச மின்சாரத் திட்டத்தின் கீழ், நாடு முழுவதும் 60 லட்சத்துக்கும் அதிகமான வீடுகளில் மேற்கூரை சூரியசக்தி மின் உற்பத்தி அமைப்புகள் நிறுவப்பட்டுள்ளதாகவும் மோடி தெரிவித்தார்.
தொழில்நுட்ப வளர்ச்சி, உள்கட்டமைப்பு மேம்பாடு மற்றும் தூய்மையான எரிசக்தி உற்பத்தி ஆகிய துறைகளில் இந்தியா தொடர்ந்து முன்னேறி வருவதாகக் குறிப்பிட்ட பிரதமர், எதிர்காலத் தொழில்நுட்பங்களில் உலக அளவில் முன்னணி நாடாக உருவெடுப்பதே இந்தியாவின் இலக்கு என்றார்.
இந்தியாவின் முயற்சிகளால் உலகம் முழுவதும் பிரபலமான யோகா! – பிரதமர் மோடி பெருமிதம்