வளர்ந்து வரும் நாடுகளின் முக்கிய கூட்டமைப்பாக கருதப்படும் பிரிக்ஸ் அமைப்பில் இணைய பாகிஸ்தான் தொடர்ந்து முயற்சி மேற்கொண்டு வருகிறது. ஆனால், இந்தியாவின் எதிர்ப்பு உள்ளிட்ட பல்வேறு காரணங்களால் பாகிஸ்தானின் உறுப்பினர் முயற்சி தொடர்ந்து சிக்கலை எதிர்கொண்டு வருவதாக தகவல்கள் வெளியாகியுள்ளன.
கடந்த 2006-ம் ஆண்டு இந்தியா, சீனா, ரஷ்யா, பிரேசில் ஆகிய நாடுகளை உள்ளடக்கிய கூட்டமைப்பாக பிரிக்ஸ் உருவானது. பின்னர் தென்னாப்பிரிக்காவும் இணைந்ததையடுத்து, இந்த அமைப்பு மேலும் விரிவடைந்தது.
கடந்த 2024-ம் ஆண்டு எகிப்து, எத்தியோப்பியா, ஈரான், ஐக்கிய அரபு அமீரகம் உள்ளிட்ட நாடுகள் பிரிக்ஸ் அமைப்பில் இணைந்தன. இதன் மூலம் உலக பொருளாதாரத்தில் பிரிக்ஸ் அமைப்பின் முக்கியத்துவம் மேலும் அதிகரித்தது.
பிரிக்ஸ் அமைப்பால் கிடைக்கும் நிதி வாய்ப்புகள்
பிரிக்ஸ் நாடுகளின் ஒத்துழைப்பின் மூலம் உருவாக்கப்பட்ட புதிய மேம்பாட்டு வங்கி (NDB), உறுப்பு நாடுகளின் உள்கட்டமைப்பு மற்றும் நிலையான வளர்ச்சி திட்டங்களுக்கு நிதியுதவி வழங்கி வருகிறது.
இதனால், உலக வங்கி உள்ளிட்ட பாரம்பரிய சர்வதேச நிதி நிறுவனங்களுக்கு மாற்றாக பிரிக்ஸ் அமைப்பின் நிதி நிறுவனங்களை பயன்படுத்துவதற்கான வாய்ப்பு உறுப்பு நாடுகளுக்கு கிடைக்கிறது.
பாகிஸ்தானின் உறுப்பினர் முயற்சி
நீண்டகாலமாக பொருளாதார நெருக்கடிகளை எதிர்கொண்டு வரும் பாகிஸ்தான், பிரிக்ஸ் அமைப்பில் உறுப்பினராக வேண்டும் என்ற நோக்கில் கடந்த 2023-ம் ஆண்டு விண்ணப்பித்ததாக கூறப்படுகிறது.
பாகிஸ்தானின் முயற்சிக்கு சீனா மற்றும் ரஷ்யா உள்ளிட்ட சில நாடுகள் ஆதரவு தெரிவித்துள்ளதாக தகவல்கள் வெளியாகின. இருப்பினும், இதுவரை அந்த நாட்டிற்கு பிரிக்ஸ் முழு உறுப்பினர் அந்தஸ்து கிடைக்கவில்லை.
தனது உறுப்பினர் முயற்சியை வலுப்படுத்தும் நோக்கில் பிரிக்ஸ் ஆதரவு பெற்ற புதிய மேம்பாட்டு வங்கியுடன் பாகிஸ்தான் நிதி ரீதியாகவும் இணைந்து செயல்பட முயற்சித்து வருவதாக கூறப்படுகிறது.
இந்தியாவின் எதிர்ப்பு முக்கிய காரணமா?
பாகிஸ்தானின் பிரிக்ஸ் உறுப்பினர் முயற்சியில் இந்தியாவின் நிலைப்பாடு முக்கியத்துவம் பெற்றுள்ளது. குறிப்பாக எல்லை தாண்டிய பயங்கரவாதம் உள்ளிட்ட பாதுகாப்பு தொடர்பான பிரச்சினைகளை இந்தியா தொடர்ந்து முன்வைத்து வருகிறது.
புதிய உறுப்பினர்களை சேர்ப்பது தொடர்பான முடிவுகள் உறுப்பு நாடுகளுக்கு இடையேயான ஒருமித்த கருத்தின் அடிப்படையில் எடுக்கப்படுவதால், முக்கிய உறுப்பு நாடுகளில் ஒன்றான இந்தியாவின் எதிர்ப்பு பாகிஸ்தானின் முயற்சிக்கு மிகப்பெரிய சவாலாக பார்க்கப்படுகிறது.
இதனால், பிரிக்ஸ் அமைப்பில் இணைவதற்கான பாகிஸ்தானின் முயற்சி எப்போது வெற்றி பெறும் என்பது தொடர்ந்து கேள்விக்குறியாகவே உள்ளது.
சீன அதிபர் மோடியின் இரவு விருந்தில் பங்கேற்காதது ஏன்? BRICS மாநாட்டில் புதிய அரசியல் பரபரப்பு