இந்தியாவின் தலைமையில் டெல்லியில் நடைபெற்ற 18-வது BRICS உச்சி மாநாடு இன்று நிறைவடையும் நிலையில், மாநாட்டின் முக்கிய முடிவுகள் சர்வதேச அளவில் கவனம் பெற்றுள்ளன. BRICS நாடுகள் இணைந்து ‘New Delhi Declaration’-ஐ ஏற்றுக்கொண்டுள்ள நிலையில், உலகளாவிய நிர்வாகத்தில் மாற்றம், பொருளாதார ஒத்துழைப்பு மற்றும் சர்வதேச அமைதிக்கு முக்கியத்துவம் அளிக்கப்பட்டுள்ளது.
New Delhi Declaration ஏற்றுக்கொள்ளப்பட்டது
BRICS நாடுகளின் தலைவர்கள் புதிய டெல்லி பிரகடனத்தை ஒருமனதாக ஏற்றுக்கொண்டனர். பல்வேறு உலகளாவிய பிரச்சினைகளில் BRICS நாடுகளின் ஒருங்கிணைந்த நிலைப்பாட்டை இந்தப் பிரகடனம் வெளிப்படுத்துகிறது.
உலகளாவிய முடிவெடுக்கும் அமைப்புகளில் வளர்ந்து வரும் நாடுகளுக்கு அதிக பிரதிநிதித்துவம் வழங்கப்பட வேண்டும் என்றும் BRICS வலியுறுத்தியுள்ளது.
ஐ.நா. சீர்திருத்தத்திற்கு முக்கியத்துவம்
ஐக்கிய நாடுகள் பாதுகாப்பு கவுன்சில் உள்ளிட்ட சர்வதேச அமைப்புகளில் சீர்திருத்தம் செய்ய வேண்டும் என்ற கோரிக்கைக்கு BRICS நாடுகள் மீண்டும் ஆதரவு தெரிவித்துள்ளன.
குறிப்பாக, இந்தியா உள்ளிட்ட வளர்ந்து வரும் நாடுகளுக்கு சர்வதேச முடிவெடுக்கும் அமைப்புகளில் அதிக பங்கு வழங்கப்பட வேண்டும் என்ற கருத்து பிரகடனத்தில் இடம்பெற்றுள்ளது.
உள்ளூர் நாணயங்களில் வர்த்தகம்?
BRICS நாடுகளுக்கு இடையிலான எல்லை தாண்டிய பணப் பரிவர்த்தனைகளை மேம்படுத்துவது குறித்தும் ஆலோசிக்கப்பட்டுள்ளது. உறுப்புநாடுகளின் உள்ளூர் நாணயங்களைப் பயன்படுத்தி வர்த்தகப் பரிவர்த்தனைகளை மேற்கொள்வது தொடர்பான பணிகள் தொடர்ந்து முன்னெடுக்கப்பட உள்ளன.
இதன் மூலம் சர்வதேச வர்த்தகத்தில் BRICS நாடுகளுக்கு இடையிலான பொருளாதார இணைப்பை மேலும் வலுப்படுத்தும் முயற்சி மேற்கொள்ளப்படுகிறது.
இந்தியா–சீனா உறவில் புதிய திருப்பம்
BRICS மாநாட்டின் ஒரு முக்கிய நிகழ்வாக பிரதமர் நரேந்திர மோடி மற்றும் சீன அதிபர் ஷி ஜின்பிங் இடையிலான சந்திப்பு அமைந்தது.
இரு நாடுகளுக்கும் இடையிலான எல்லைப் பிரச்சினை, வர்த்தகம், சந்தை அணுகல் மற்றும் இருதரப்பு உறவுகளை மேம்படுத்துவது குறித்து இரு தலைவர்களும் ஆலோசித்தனர். 2020-க்குப் பிறகு ஏற்பட்ட பதற்றங்களுக்கு பின்னர் இந்தியா–சீனா உறவில் புதிய அணுகுமுறை உருவாகிறதா என்ற எதிர்பார்ப்பு ஏற்பட்டுள்ளது.
உலக நாடுகளின் அடுத்த நடவடிக்கை என்ன?
BRICS அமைப்பு தற்போது விரிவடைந்த நிலையில், உலக அரசியலில் அதன் தாக்கமும் அதிகரித்து வருகிறது. வர்த்தகம், எரிசக்தி, தொழில்நுட்பம், சர்வதேச நிர்வாகம் மற்றும் வளர்ந்து வரும் நாடுகளின் நலன் போன்ற துறைகளில் BRICS நாடுகள் ஒருங்கிணைந்து செயல்படுவதற்கான அடித்தளம் இந்த மாநாட்டில் மேலும் வலுப்படுத்தப்பட்டுள்ளது.
இந்தியாவின் BRICS தலைமைப் பொறுப்பு முடிவடைந்த நிலையில், அடுத்த ஆண்டு BRICS தலைமைப் பொறுப்பை சீனா ஏற்கிறது. இதனால் இந்தியா உருவாக்கிய முயற்சிகள் அடுத்த கட்டத்தில் எவ்வாறு செயல்படுத்தப்படுகின்றன என்பதும் சர்வதேச கவனத்தை ஈர்க்கும் முக்கிய அம்சமாக இருக்கும்.
டெல்லி பிரிக்ஸ் மாநாடு: ரயில்வே மற்றும் விண்வெளித் துறையில் இந்தியாவின் உதவியை நாடும் பிலிப்பைன்ஸ்!