டெல்லி போராட்டத்தின்போது பெண் செய்தியாளர்கள் பாலியல் ரீதியாகத் துன்புறுத்தப்பட்டதாகத் தொடரப்பட்ட வழக்கில், மத்திய அரசு மற்றும் டெல்லி காவல்துறை பதிலளிக்க உச்சநீதிமன்றம் நோட்டீஸ் பிறப்பித்துள்ளது.
உச்சநீதிமன்றத்தில் விசாரணை
தலைமை நீதிபதி சூர்யகாந்த் தலைமையிலான அமர்வில் இந்த வழக்கு விசாரணைக்கு வந்தது. அப்போது, மூத்த வழக்கறிஞர் இந்திரா ஜெயசிங் ஆஜராகி, போராட்டக் களத்தில் பெண் செய்தியாளர்கள் தங்களது பணிகளை மேற்கொள்ள முடியாத சூழலைக் காவல்துறை ஏற்படுத்தியுள்ளதாக வாதிட்டார்.
மேலும், பாலியல் துன்புறுத்தலால் பாதிக்கப்பட்டதாகக் கூறப்படும் பெண் செய்தியாளர் மீதே வழக்குப் பதிவு செய்யப்பட்டுள்ளதாகவும் அவர் நீதிமன்றத்தில் தெரிவித்தார்.
பெண் செய்தியாளருக்கு பாதுகாப்பு
இந்த விவகாரத்தில் உடனடியாக இடைக்கால உத்தரவு பிறப்பிக்க வேண்டும் என்றும், சம்பவம் குறித்து விசாரிக்கக் குழு அமைக்க வேண்டும் என்றும் இந்திரா ஜெயசிங் கோரிக்கை விடுத்தார்.
இதையடுத்து, இந்த விவகாரம் மிகவும் முக்கியமான பிரச்சினை எனக் குறிப்பிட்ட தலைமை நீதிபதி தலைமையிலான அமர்வு, புகார் அளித்த பெண் செய்தியாளர் மீது எந்த நடவடிக்கையும் எடுக்கக் கூடாது என உத்தரவிட்டது.
மத்திய அரசு, டெல்லி காவல்துறைக்கு நோட்டீஸ்
பெண் செய்தியாளர்கள் மீதான பாலியல் துன்புறுத்தல் புகார் தொடர்பாக மத்திய அரசு மற்றும் டெல்லி காவல்துறை பதிலளிக்க உச்சநீதிமன்றம் நோட்டீஸ் பிறப்பித்துள்ளது.
இந்த வழக்கில் நீதிமன்றத்தின் அடுத்தகட்ட விசாரணை மற்றும் பிறப்பிக்கப்படும் உத்தரவுகள் முக்கியத்துவம் வாய்ந்ததாகக் கருதப்படுகின்றன.