சென்னை அண்ணா அறிவாலயம் கலைஞர் அரங்கில் தமிழக முதலமைச்சரும் திமுகவின் தலைவருமான மு.க.ஸ்டாலின் தலைமையில் அனைத்து அணி நிர்வாகிகளுடன் இன்று (டிசம்பர் 28) காலை 10 மணி அளவில் ஆலோசனை கூட்டம் நடைபெற்றது.
திமுக தலைவர் மு.க ஸ்டாலின் தலைமையில் நடைபெற்ற அனைத்து அணிகள் ஆலோசனைக் கூட்டத்தில் முதலமைச்சர் மு.க.ஸ்டாலின் பேசியதாவது.
திமுகவில் நிர்வாக ரீதியில் உள்ள 23 அணிகளின் செயல்பாட்டை கண்காணிக்கும் விதமாக பொறுப்பாளர்கள் நியமனம் செய்யப்பட்டுள்ளது. அணிகளை கண்காணிப்பதற்கான பொறுப்பாளர்களாக துணைப் பொதுச் செயலாளர்களை நியமனம் செய்தார்.
ஐ.பெரியசாமி, கனிமொழி , பொன்முடி, ஆ.ராசா உள்ளிட்ட துணைப் பொதுச் செயலாளர்கள் பொறுப்பாளர்களாக நியமனம் செய்யப்பட்டிருக்கிறார்கள்.
இளைஞர் அணி, தகவல் தொழில் நுட்ப அணி உள்ளிட்ட ஐந்து அணிகளுக்கு ஐ.பெரியசாமி பொறுப்பாளராகவும், மகளிர் அணி, தொண்டர் அணி உள்ளிட்ட ஐந்து அணிகளுக்கு பொறுப்பாளராக கனிமொழியும் நியமனம் செய்யப்பட்டிருக்கிறார்.
நாடாளுமன்ற தேர்தலுக்கான பணிகளை இப்போது இருந்தே துவக்குங்கள் என்றும் நாடாளுமன்ற தேர்தலில் வெற்றி கொள்ள பாஜகவினர் எதையும் செய்ய தயங்கமாட்டார்கள். அதனை எதிர்கொள்ள தயாராக இருங்கள் என்றார் முதலமைச்சர் மு.க.ஸ்டாலின்.
அணிகளில் வழங்கப்பட்ட பொறுப்பை பெருமையாக கருதிக்கொண்டு இருக்காமல் களத்தில் பணியாற்ற வேண்டும். அனைத்து அணிகளும் ஒருங்கிணைந்து செயல்படுங்கள். அணிகளுக்கென்று சரியான நிர்வாகிகளை அந்தந்த மாவட்ட நிர்வாகிகளை நியமிக்க உத்தரவிட்டார் முதல்வர்.
அதில் பேசிய அமைச்சர் உதயநிதி ஸ்டாலின், அணிகளுக்கு என்று தன்னிச்சையான சுதந்திரம் தேவை. எங்கள் அணிகளின் நிர்வாகிகளை நியமிப்பதில் எங்களுக்கு உரிமை தேவை. அணிகளின் மாவட்ட ஒன்றிய பொறுப்பாளர்களை நியமிப்பதில் மாவட்ட செயலாளர்கள் சொல்வதை தான் பெரும்பாலான நேரங்களில் கேட்க வேண்டிய சூழல் உள்ளது என்று உதயநிதி கூறினார்.
இந்தக் கூட்டத்தில் திமுக பொதுச்செயலாளர் துறை முருகன்,
பொருளாளர் டி.ஆர்.பாலு, முதன்மை செயலாளர் கே.என்.நேரு, துணை பொது செயலாளர் மற்றும் தலைமை கழக நிர்வாகிகள் மற்றும் அணிகளின் நிர்வாகிகள் என்று 200க்கும் மேற்பட்டோர் கலந்து கொண்டனர்.