தமிழக அரசியல் களத்தில் ஆட்சி மாற்றம் நிகழும்போதெல்லாம் முந்தைய அரசின் திட்டங்களின் பெயர்கள் மாற்றப்படுவது புதிதல்ல என்றாலும், தவெக தலைவர் விஜய் தலைமையிலான அரசு பொறுப்பேற்றது முதல் மேற்கொண்டு வரும் பெயர் மாற்ற நடவடிக்கைகள் மாநில அரசியலில் பெரும் புயலைக் கிளப்பியுள்ளன.
முன்னாள் முதல்வர் மு.க.ஸ்டாலின் தலைமையிலான திமுக ஆட்சியில் கொண்டுவரப்பட்ட பல முக்கிய நலத்திட்டங்களின் பெயர்கள் அடுத்தடுத்து மாற்றப்பட்டு வருகின்றன. திமுக அரசின் அரசியல் முத்திரையாகவும், மு.க.ஸ்டாலினின் ஆட்சி அடையாளமாகவும் பார்க்கப்பட்ட திட்டங்களை மறுபெயரிட்டு (Re-branding) புதிய அடையாளத்தைக் கொடுக்க தவெக அரசு தீவிரமாகச் செயல்பட்டு வருகிறது.
வரிசையாக மாற்றப்படும் முதன்மைத் திட்டங்கள்
கடந்த திமுக ஆட்சியில் தொடக்கப் பள்ளி மாணவர்களுக்காக மு.க.ஸ்டாலினால் தொடங்கப்பட்ட ‘முதலமைச்சரின் காலை உணவுத் திட்டம்’, தற்போது ‘பெருந்தலைவர் காமராஜர் காலை உணவுத் திட்டம்’ எனப் பெயர் மாற்றம் செய்யப்பட்டுள்ளது. இத்திட்டத்தை 6 முதல் 8-ஆம் வகுப்பு வரை பயிலும் அரசுப் பள்ளி மாணவர்களுக்கும் விரிவுபடுத்தி தவெக அரசு அரசாணை வெளியிட்டுள்ளது.
அதேபோல, திமுகவின் முதன்மைத் தேர்தல் முழக்கமாக இருந்த ‘விடியல்’ என்ற வார்த்தையை முன்னிறுத்திச் செயல்படுத்தப்பட்ட ‘மகளிர் விடியல் பயணம்’ திட்டத்திலிருந்து அந்தச் சொல் நீக்கப்பட்டு, தற்போது எளிமையாக ‘மகளிர் பயணம்’ என மாற்றப்பட்டுள்ளது. இலவசப் பயணச் சலுகை தொடர்ந்தாலும், பேருந்துகளில் இருந்து திமுகவின் பிரசாரச் சொல் அகற்றப்பட்டுள்ளது.
இளைஞர்களின் வேலைவாய்ப்பு மற்றும் திறன் மேம்பாட்டிற்காகக் கொண்டுவரப்பட்ட ‘நான் முதல்வன்’ திட்டம், தற்போது பிரசாரத் தொனியின்றி ‘திறன் தமிழ்நாடு’ எனப் பெயர் மாற்றம் செய்யப்பட்டுள்ளது. மேலும், திமுகவின் முகவரித் திட்டமாகக் கருதப்படும் ‘கலைஞர் மகளிர் உரிமைத் தொகைத் திட்டத்தில்’ முன்னாள் முதல்வர் கருணாநிதியின் பெயர் இடம்பெற்றிருந்த நிலையில், கட்சிச் சார்பற்ற பொதுப் பெயராக ‘மதிப்புமிகு மகளிர் திட்டம்’ என மாற்றுவது குறித்தும் பரிசீலிக்கப்பட்டு வருகிறது.
திமுகவின் கடும் எதிர்ப்பு
தவெக அரசின் இந்தத் தொடர் பெயர் மாற்ற நடவடிக்கைகளுக்கு திமுக தரப்பில் கடுமையான எதிர்ப்புப் பதிவு செய்யப்பட்டு வருகிறது.
மக்களின் பயன்பாட்டில் உள்ள திட்டங்களின் பெயர்களை மாற்றுவதால் மட்டுமே, பயனாளிகளின் மனதில் நிறைந்திருக்கும் முந்தைய அரசின் தாக்கத்தையும் நன்றியையும் அழித்துவிட முடியாது என திமுக நிர்வாகிகள் கடுமையாக விமர்சித்து வருகின்றனர்.
தவெக அரசின் விளக்கம் & வியூகம்
அரசியல் விமர்சனங்களுக்குப் பதிலளிக்கும் வகையில் தவெக வட்டாரங்கள் தங்களது நிலைப்பாட்டை தெளிவுபடுத்தியுள்ளன.
அரசுத் திட்டங்கள் அனைத்தும் மக்களின் வரிப்பணத்தில் செயல்படுத்தப்படுபவை என்பதால், அவற்றில் குறிப்பிட்ட அரசியல் கட்சித் தலைவர்களின் பெயர்களோ அல்லது தேர்தல் பிரசார முழக்கங்களோ இடம்பெறக் கூடாது என்பதில் முதலமைச்சர் விஜய் உறுதியாக உள்ளதாகக் கூறப்படுகிறது. மக்கள் பணத்தில் இயங்கும் திட்டங்களுக்குப் பொதுவான பெயர்களும், காமராஜர் போன்ற வரலாற்றுச் சிறப்புமிக்க தலைவர்களின் பெயர்களுமே பொருத்தமானவை என்பதே தவெக அரசின் கொள்கை முடிவாக முன்வைக்கப்படுகிறது.
திமுகவின் 5 ஆண்டு கால ஆட்சியின் முத்திரைகளை மெல்ல மெல்ல மறைத்து, நிர்வாக ரீதியாகத் தனது சொந்த அரசியல் அடையாளத்தைப் பதிக்கும் விஜய்யின் இந்த நகர்வுகள், தமிழக அரசியல் களத்தில் புதிய விவாதங்களை உருவாக்கியுள்ளன.