“தோல்வி நிரந்தரமானது அல்ல, மீண்டு வருவோம். கட்சியை மறுசீரமைப்பு செய்வது மூலமாக மட்டுமே மீண்டும் அரசியல் வெற்றியைப் பெற முடியும்” என்று திமுக தலைவர் மு.க.ஸ்டாலின் அதிரடியாக அறிவித்துள்ளார்.
சென்னை அண்ணா அறிவாலயத்தில் நடைபெற்ற திமுக செயற்குழு கூட்டத்தில் உரையாற்றிய திமுக தலைவர் மு.க.ஸ்டாலின், கட்சிப் பணிகளில் மேற்கொள்ளப்படவுள்ள முக்கிய சீர்திருத்தங்கள் குறித்து விளக்கினார்.
கசப்பான மருந்தாகட்டும் சீரமைப்பு
செயற்குழுவில் அவர் பேசியதாவது:
“தேர்தல் தோல்விக்கு நிர்வாகிகள் செயல்பாடும் ஒரு முக்கியக் காரணம் என்பதை நாம் வெளிப்படையாக ஒத்துக்கொள்ள வேண்டும். தோல்வியைத் தொடர்ந்து, கள ஆய்வுக் குழு மற்றும் இணையதளம் வாயிலாக ஆயிரக்கணக்கான கருத்துகள் பெறப்பட்டுள்ளன. தங்கம் தென்னரசு தலைமையிலான மறுசீரமைப்புக் குழுவின் பரிந்துரைப்படி, இனி கட்சியின் அமைப்பு முறையில் பெரிய மாறுதல்களைச் செய்யவிருக்கிறோம். இந்த மாற்றங்கள் கடுமையானதாக, சிலருக்கு கசப்பானதாக இருக்கலாம்; ஆனால், கசப்புதான் உடலுக்கு நன்மை தரும். அடுத்த நூறாண்டுக்குக் கழகம் உயிர்ப்போடு இருப்பதை இந்த நடவடிக்கைகள் உறுதி செய்யும்.”
புதிய நிர்வாகிகளுக்கு வாய்ப்பு
கட்சியின் புதிய கட்டமைப்பு குறித்து விளக்கிய ஸ்டாலின்:
“இனி வரும் நிர்வாகிகளுக்கு அந்தந்தப் பொறுப்புகளுக்கு ஏற்ப வயது வரம்பும், பதவிக்காலமும் அறிமுகப்படுத்தப்படவுள்ளது. புதுமுகங்களுக்கு அதிக எண்ணிக்கையில் பொறுப்புகள் வழங்கப்படும். உறுப்பினர் சேர்க்கையை నేர்மையாகவும், உண்மையாகவும் நடத்தி முடித்த பிறகு, அனைத்து மட்டங்களிலும் உட்கட்சித் தேர்தல்கள் முறையாக நடத்தப்படும். நியமனங்களை விட, தேர்தலின் மூலம் வரும் புதிய நிர்வாகிகள் சிறப்பாகச் செயல்படுவார்கள்” என நம்பிக்கை தெரிவித்தார்.
நிர்வாகிகளுக்குக் கண்டிப்பான அறிவுரை
நிர்வாகிகளின் செயல்பாடுகள் குறித்து மனம் திறந்து பேசிய ஸ்டாலின்:
“சில நிர்வாகிகள் ஆளும் கட்சியினரைப் பார்த்தால் மலரும் முகத்துடன் வணங்குகிறார்கள், ஆனால் நம் கட்சிக்காரர்களைப் பார்த்தால் மலர்வதில்லை. இத்தகைய மனநிலை மாற வேண்டும். ஒரு மாவட்டச் செயலாளர் அல்லது எம்.எல்.ஏ மட்டுமே வலிமையாக இருந்தால் மட்டும் போதாது; ஒவ்வொரு தொண்டனும் நிர்வாகியாகச் செயல்பட வேண்டும். மாவட்டச் செயலாளர்கள் தங்களுக்கு இணையாக மற்றவர்கள் வளரக் கூடாது என்று நினைக்கக் கூடாது” என எச்சரித்தார்.
“மீண்டும் வருவோம்”
தற்போதைய ஆட்சியை விமர்சித்த ஸ்டாலின்:
“திமுக கொண்டு வந்த திட்டங்களுக்குப் பெயர் மாற்றுவதிலும், சட்டப்பேரவையைப் பஞ்ச் டயலாக் பேசும் சினிமா செட் போலக் கருதுவதிலுமே தற்போதைய முதலமைச்சர் பிசியாக இருக்கிறார். ஆனால், நாம் தோல்வி அடைந்திருந்தாலும், நமக்கு வாக்களிக்காத மக்களுக்கும் சேர்த்துப் போராடப் போகிறோம். நாம் ‘Comeback’ கொடுப்பதில் ஸ்பெஷலிஸ்ட். அறிஞர் அண்ணா மற்றும் கலைஞர் வளர்த்த இந்த இயக்கத்தை, இனமும் மொழியும் இருக்கும் வரை கருப்பு-சிவப்புக் கொடி உயர்ந்து பறக்கும் வகையில் மீண்டும் வலிமைப்படுத்துவோம்” என்று உரையை நிறைவு செய்தார்.
மின்வாரிய டிரான்ஸ்பார்மர் கொள்முதல் ஊழல் புகார்: முழு உண்மையை அரசு வெளியிட வேல்முருகன் கோரிக்கை!