காவிரி மற்றும் தென்பெண்ணை ஆற்றில் கர்நாடக மாநிலத்திலிருந்து கழிவுநீர் கலப்பதைத் தடுப்பதற்கு நீதிமன்றத்தை நாடுவது மட்டுமே ஒரே தீர்வு என்று தருமபுரி சட்டமன்ற உறுப்பினர் சௌமியா அன்புமணி தெரிவித்துள்ளார்.
தருமபுரி மாவட்ட விளையாட்டு அரங்கில் இன்று நடைபெற்ற முதலமைச்சர் கோப்பைக்கான விளையாட்டுப் போட்டிகளைத் தொடங்கி வைத்த பின் செய்தியாளர்களைச் சந்தித்துப் பேசிய அவர், பல்வேறு முக்கிய கோரிக்கைகள் மற்றும் மக்கள் பிரச்சனைகள் குறித்துப் பேசினார்.
சௌமியா அன்புமணி எழுப்பிய முக்கிய கோரிக்கைகள்
ஆவின் பால் கொள்முதல் அதிகரிக்க வேண்டும்: தருமபுரி மாவட்டத்தில் மாடு வளர்ப்பு கிராமப்புற பெண்களின் முக்கிய வாழ்வாதாரமாக விளங்கி வருகிறது. தனியார் நிறுவனங்கள் அதிக விலை வழங்குவதால் ஆவின் பால் கொள்முதல் குறைந்துள்ளது. எனவே, ஆவின் கூட்டுறவு சங்கம் சிறப்பு கவனம் செலுத்தி பாலுக்கு கூடுதல் விலை வழங்கி கொள்முதலை அதிகரிக்க வேண்டும்.
ஒருங்கிணைந்த விவசாய முறை: நெல் சாகுபடி குறைந்ததால் மாட்டுத் தீவனங்களுக்குத் தட்டுப்பாடு ஏற்பட்டுள்ளது. கோழி, ஆடு, மீன் வளர்ப்பு உள்ளிட்ட ‘ஒருங்கிணைந்த விவசாய முறையை’ ஊக்குவிப்பதன் மூலமே தீவனத் தட்டுப்பாட்டைப் போக்கி, பால் உற்பத்தியை சீராக்க முடியும்.
முழு விவசாயக் கடனும் தள்ளுபடி: விவசாயிகள் கூட்டுறவு வங்கிகளில் பெற்ற கடனில் ரூ.4,000 கோடி மட்டுமே தள்ளுபடி செய்யப்பட்டுள்ளதாகவும், இன்னும் ரூ.16,000 கோடி நிலுவையில் இருப்பதாகவும் அவர் குறிப்பிட்டார். இரண்டு மூன்று மாதங்கள் தவணை செலுத்தத் தவறினால் வாராக்கடனாக மாறும் என்பதால், ஒரு மாதக் கடனை மட்டும் தள்ளுபடி செய்யாமல், ரூ.16,000 கோடி விவசாயக் கடன்களையும் முழுமையாகத் தள்ளுபடி செய்ய அரசு முன்வர வேண்டும்.
தருமபுரி சர்க்கரை ஆலைக்கு உயிர் கொடுக்க வேண்டும்: ஆண்டுக்கு 90,000 டன் கரும்பு தேவைப்படும் நிலையில், கரும்பு விவசாயம் குறைந்ததால் 30,000 டன் மட்டுமே கிடைக்கிறது. இதனால் தொழிலாளர்களும் விவசாயிகளும் பாதிக்கப்பட்டுள்ளனர். எனவே, பிற மாவட்டங்களில் இருந்து கரும்புகளைப் பெற்று ஆலையை லாபகரமாக இயக்க வேண்டும்; மேலும் நஷ்டமடைந்த விவசாயிகளுக்கு உரிய நிவாரணம் மற்றும் தக்கல் முறையில் பதிவு செய்தவர்களுக்கு இலவச மின்சார இணைப்பு வழங்க வேண்டும்.
நதிகள் மாசுபடுவது குறித்து எச்சரிக்கை
கர்நாடக மாநிலத்திலிருந்து வெளியேற்றப்படும் கழிவுநீர், காவிரியில் பாயும் நல்ல தண்ணீருடன் கலப்பது சட்டப்படி குற்றமாகும். சுற்றுச்சூழல் ஆணையம் இதுகுறித்து உரிய நடவடிக்கை எடுக்க வேண்டும் எனக் குறிப்பிட்ட சௌமியா அன்புமணி, காவிரி மற்றும் தென்பெண்ணை ஆற்றில் கழிவுநீர் கலப்பதைத் தடுத்து நிறுத்த ஐகோர்ட்டில் வழக்குத் தொடர்வது மட்டுமே தற்போதுள்ள ஒரே வழி என்றார்.