தமிழகத்தில் எந்த நேரத்திலும் தேர்தல் வரலாம் என திமுக தலைவர் மு.க.ஸ்டாலின் தெரிவித்திருப்பது அரசியல் களத்தில் பரபரப்பை ஏற்படுத்தியுள்ளது.
அதிமுகவில் இருந்து விலகிய முன்னாள் அமைச்சர் பெஞ்சமின், தனது ஆதரவாளர்களுடன் நேற்று(28.06.2026) திமுகவில் இணைந்தார். சென்னை வானகரத்தில் உள்ள ஒரு தனியார் திருமண மண்டபத்தில், ஆதரவாளர்கள் 5000 பேருடன் பெஞ்சமின் திமுகவில் இணையும் பிரம்மாண்ட விழா நடைபெற்றது. இந்த விழாவில் முன்னாள் முதலமைச்சரும், திமுக தலைவருமான மு.க.ஸ்டாலின் தலைமையேற்று பேசினார். அப்போது நிகழ்ச்சி மேடையில் பேசிய அவர், “தமிழகத்தில் தற்போதைய தவெக அரசு எந்த நேரத்திலும் கவிழலாம். எப்பொழுது வேண்டுமானாலும் தேர்தல் வரலாம்” என்று தெரிவித்தார். இது அரசியல் ரீதியான அதிரடி எச்சரிக்கையாக பார்க்கப்படுவதோடு, அரசியல் வட்டாரத்தில் பெரும் பீதியையும் விவாதத்தையும் கிளப்பியுள்ளது.
சுதாரித்துக் கொண்ட முதல்வர் விஜய்: ஜூலை 1-ல் தோழமைக் கட்சிகள் கூட்டம்!
இந்நிலையில் மு.க.ஸ்டாலினின் இந்த அரசியல் வியூகத்தை முறியடிக்கும் வகையில், முதல்வர் ஜோசப் விஜய் உடனடியாக தனது வியூகத்தை செயல்படுத்தத் தொடங்கியுள்ளார். அதன்படி தவெக அரசுக்கு ஆதரவளித்து வரும் தோழமைக் கட்சிகளைத் தங்களது கூட்டணியில் நிரந்தரமாக இணைப்பதற்கான முயற்சிகள் முடுக்கிவிடப்பட்டுள்ளன. இதன் முக்கியப் பகுதியாக, வருகிற ஜூலை மாதம் 1ஆம் தேதி சென்னையில் உள்ள ஒரு பிரபல நட்சத்திர விடுதியில், தமிழக முதலமைச்சர் ஜோசப் விஜய் தலைமையில் “தவெக மற்றும் தோழமைக் கட்சிகளின் ஆலோசனைக் கூட்டம்” நடைபெற உள்ளது. இந்தக் கூட்டத்தில் பங்கேற்கும்படி கூட்டணிக் கட்சித் தலைவர்களுக்கு தவெக அமைச்சர்கள் மற்றும் நிர்வாகிகள் நேரில் சென்று அழைப்பு விடுத்து வருகின்றனர்.
விசிக-விற்கு அழைப்பு:
சென்னை மீனம்பாக்கத்தில் உள்ள தனியார் விடுதியில், விடுதலை சிறுத்தைகள் கட்சியின் (விசிக) தலைவர் தொல். திருமாவளவன் எம்.பி. அவர்களை, தவெக அரசின் ஊரக வளர்ச்சி மற்றும் நீர்வளத்துறை அமைச்சர் என். ஆனந்த், பொதுப்பணி மற்றும் விளையாட்டு மேம்பாட்டுத் துறை அமைச்சர் ஆதவ் அர்ஜுனா ஆகியோர் நேரில் சந்தித்து முறைப்படி அழைப்பு விடுத்தனர்.
காங்கிரஸ் மற்றும் இதர கட்சிகளுக்கு அழைப்பு:
நாளை மாலை மாணிக்கம் தாகூர் காங்கிரஸ் கட்சியின் தமிழ் மாநிலத் தலைவராகப் பதவியேற்ற பிறகு, தவெக அமைச்சர்கள் அவரை நேரில் சந்தித்து அழைக்கத் திட்டமிட்டுள்ளனர். இதனைத் தொடர்ந்து இந்திய கம்யூனிஸ்ட் (CPI), மார்க்சிஸ்ட் கம்யூனிஸ்ட் (CPM), மதிமுக (MDMK), ஐயூஎம்எல் (IUML) உள்ளிட்ட அனைத்துத் தோழமைக் கட்சித் தலைவர்களையும் தவெகவின் மூத்த அமைச்சர்கள் நேரில் சந்தித்து அழைப்பு விடுக்க உள்ளனர்.
புதிய கூட்டணியை நோக்கி…
திமுகவின் தேர்தல் எச்சரிக்கையைத் தொடர்ந்து, தவெக தனது ஆட்சியைத் தக்கவைக்கவும், நாடாளுமன்ற/சட்டமன்றத் தேர்தல்களை எதிர்கொள்ளவும் ஒரு வலுவான, புதிய அரசியல் கூட்டணியை உருவாக்கும் முயற்சியில் முழுவீச்சில் இறங்கியுள்ளது. ஜூலை 1ஆம் தேதி நடக்கும் இக்கூட்டம் தமிழக அரசியலில் மிக முக்கியமான திருப்பமாகப் பார்க்கப்படுகிறது.